សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ អធិការដ្ឋាននគរបាលស្រុកភ្នំស្រួច កាលពីព្រលប់ថ្ងៃទី២៧ ខែ មិថុនា ឆ្នាំ ២០២២ កំលាំងនគរបាលបានទទួលសេចក្ដីរាយការណ៍ពីប្រជាពលរដ្ឋល្អថាបានប្រទះឃេីញរថយន្ដមួយគ្រឿង ពណ៌ទឹកប្រាក់ ម៉ាក សុីអវី CRV មានស្លាកលេខសម្គាល់ ភ្នំពេញ 2N -9804 ឈប់ចតចោល នៅចំណុចក្បែរចិញ្ចើមផ្លូវជាតិលេខ៤ ផ្នែកដីក្រហម ចន្លោះគីឡូម៉ែត្រ៧៨-៧៩ ស្ថិត នៅភូមិត្រពាំងស្ដុកគ្រួរ ឃុំអូរ ស្រុកភ្នំស្រួច ខេត្តកំពង់ស្ពឺ ដោយមិនដឹងមូលហេតុ ។
បច្ចុប្បន្នសមត្ថកិច្ចនគរបាលស្រុកបានចុះទៅកាន់ទីតាំងខាងលេី ដោយពិនិត្យមេីលពីខាងក្រៅរថយន្ដពុំឃេីញមានរបស់អ្វីដែលជាការសង្ស័យទេ រថយន្តគ្មានមនុស្សនិងមិនមានស្លាកស្នាមអ្វីឡេីយ (គ្រោះថ្នាក់ចរាចរណ៍គ្មាន)។
សមត្ថកិច្ចរួមជាមួយ អាជ្ញាធរភូមិ ឃុំ ប៉ុស្តិ៍នគរបាលរដ្ឋបាល ប្រជាពលរដ្ឋ យករថយន្តខាងលើមករក្សាទុកបណ្ដោះអាសន្ន នៅអធិការដ្ឋាននគរបាលស្រុកភ្នំស្រួច ដើម្បីស្រាវជ្រាវបន្ត៕
ដោយ៖ សូរិយា
