សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ ជនសង្ស័យ២នាក់បងប្អូនបង្កើតត្រូវបានសមត្ថកិច្ចនគរបាលក្រុងកំពង់ឆ្នាំង ធ្វើការឃាត់ខ្លួនបាន បន្ទាប់ក្រុមជនសង្ស័យបានធ្វើសកម្មភាពជិះម៉ូតូដើរទាក់សត្វឆ្កែរបស់ប្រជាពលរដ្ឋនៅតាមភូមិក្នុងក្រុង និងស្រុក រលាប្អៀរខេត្តកំពង់ឆ្នាំង ។ ហេតុការណ៍នេះបានកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី២ ខែកក្កដា ឆ្នាំ២០២២ នៅចំណុចរង្វង់មូលនារីស្មូនក្អម ស្ថិតក្នុងភូមិខ្វិត ឃុំពង្រ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចបានឱ្យដឹងថា ជនសង្ស័យដែលសមត្ថកិច្ចធ្វើការឃាត់ខ្លួនមាន ៖
១.ឈ្មោះ ឃិ សុខជា ភេទប្រុស អាយុ៣២ឆ្នាំ រស់នៅភូមិត្រពាំងអន ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
២.ឈ្មោះ ឃិ សុភាស់ ភេទប្រុស អាយុ ២០ឆ្នាំ រស់នៅភូមិត្រពាំងអន ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចបានឱ្យដឹងទៀតថា នៅមុនពេលកើតហេតុ ឈ្មោះ ឃិ សុខជា ជាអ្នកបើកម៉ូតូយឺតៗ ចំណែកប្អូនឈ្មោះ ឃិ សុភាស់ ជាអ្នកកាន់ដុំថ្ម រង់ចាំពេលដែលឆ្កែដេញតាម ទើបគប់ដុំថ្មត្រូវក្បាលឆ្កែ បណ្ដាលឱ្យប្រកាច់ ទើបឈ្មោះ ឃិ សុភាស់ ធ្វើការវាយក្បាលឆ្កែហ្នឹងញញួររហូតទាល់តែងាប់ទើបលើកសត្វឆ្កែដាក់ចូលការ៉ុង។ លុះជនសង្ស័យទាំងពីរនាក់ធ្វើដំណើរមកដល់ចំណុចផ្សារថ្មី ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ក៏បានជួបជាមួយកម្លាំងអធិការដ្ឋាននគរបាលក្រុងកំពង់ឆ្នាំង កំពុងធ្វើល្បាតការពារសន្តិសុខជូនប្រជាពលរដ្ឋ ប្រទះនិង ជនសង្ស័យខាងលើ ត្រូវបានកម្លាំងនគរបាលមានការសង្ស័យទើបឃាត់ដើម្បីសួរនាំ ទើបដឹងថា ២នាក់បងប្អូនបានដើរទាក់សត្វឆ្កែរបស់ប្រជាពលរដ្ឋក៏ធ្វើការឃាត់ខ្លួនតែម្តង ។ ក្នុងពេលឃាត់ខ្លួន សមត្ថកិច្ចបានរកឃើញវត្ថុតាង សត្វឆ្កែ០១ក្បាល(ងាប់) ញញួរ ០១ ដុំថ្មុំ ៨ដុំ និងម៉ូតូ០១គ្រឿង ក្រោយពីសាកសួរយកចម្លើយ សមត្ថកិច្ចបានកសាងសំណុំរឿងបញ្ជូនទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធី ៕
ដោយ ៖ ចន្ថា
