សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោក ស៊ូ ម៉ុល អភិបាលនៃគណៈអភិបាលស្រុករមាសហែកបានអញ្ជើញជាអធិបតីក្នុងពិធីប្រកាសសុពលភាពសមាជិកក្រុមប្រឹក្សាឃុំកំពង់ត្រាចអាណត្តិទី៥ នៃស្រុករមាសហែក នាព្រឹកថ្ងៃទី៥ ខែកក្កដាឆ្នាំ២០២២ នៅសាលប្រជុំសាលាឃុំកំពង់ត្រាច ស្រុករមាសហែក។
ក្នុងឱកាសនោះក៏មានការអញ្ជើញចូលរួមពីលោក ញាណ សុនភីរៈ ប្រធានការិយាល័យគ្រប់គ្រងធនធានមនុស្ស លោក ប្រុញ រិទ្ធី ប្រធានការិល័យអប់រំ យុវជន និងកីឡា លោក ម៉ម សម្បត្តិ អនុប្រធានការិយាល័យអប់រំ យុវជន និងកីឡា លោកស្រី ម៉ែន សាខន អនុប្រធានការិយាល័យអប់រំ យុវជន និងកីឡា លោក លោកស្រីសមាជិកក្រុមប្រឹក្សាឃុំកំពង់ត្រាច លោកនាយប៉ុស្តិ៍នគរបាលរដ្ឋបាលឃុំកំពង់ត្រាច និងសហការី លោកនាយកសាលា លោកគ្រូ អ្នកគ្រូពេទ្យ លោក លោកស្រីជាមេភូមិ អនុភូមិ ប្រជាការពារភូមិ សមាជិកភូមិទាំងអស់ចំណុះឃុំ លោក លោកស្រីជាអាជីវករ ចាស់ព្រឹទ្ធាចារ្យ និងប្រជាពលរដ្ឋក្នុងឃុំកំពង់ត្រាចសរុប៦១នាក់។
លោកអភិបាលស្រុកបានថ្លែងនូវការកោតសរសើរ និងចូលរួមអបអរសាទរយ៉ាងក្លៀវក្លាចំពោះលោក លោកស្រីជាសមាជិកក្រុមប្រឹក្សាឃុំអាណត្ដិទី៥ និង លោកមេឃុំ ដែលបានទទួលនូវការស្រឡាញ់ពេញចិត្ដ និងការគាំទ្រពីសំណាក់ប្រជាពលរដ្ឋតាមរយៈការបោះឆ្នោតកាលពីថ្ងៃអាទិត្យទី០៥ ខែមិថុនា ឆ្នាំ២០២២កន្លងមកនេះដើម្បីបន្តដឹកនាំ ឃុំឱ្យមានការអភិវឌ្ឍរីកចម្រើនលើគ្រប់វិស័យជាបន្ថែមទៀត។
លោកបានបន្ថែមថា ការបោះឆ្នោតជ្រើសរើសក្រុមប្រឹក្សានៅថ្នាក់ឃុំ សង្កាត់ គឺជាការជំរុញកិច្ចដំណើរការអនុវត្តកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ដែលកំណែទម្រង់នេះបានដើរតួនាទីយ៉ាងសំខាន់ក្នុងការលើកកម្ពស់អភិបាលកិច្ចនៅថ្នាក់ឃុំសង្កាត់តាមគោលការណ៍អភិវឌ្ឍន៍តាមបែបប្រជាធិបតេយ្យនៅថ្នាក់មូលដ្ឋាន។
លោកអភិបាលស្រុកបន្តថា អភិបាលកិច្ចល្អតម្រូវឱ្យក្រុមប្រឹក្សាឃុំ សង្កាត់ធ្វើជាតំណាងឱ្យផលប្រយោជន៍របស់ប្រជាពលរដ្ឋទាំងអស់នៅមូលដ្ឋាន ដូចនេះក្រុមប្រឹក្សាឃុំសង្កាត់នីមួយៗត្រូវមានតួនាទីនិងភារកិច្ចក្នុងការឆ្លើយតបនឹងតម្រូវការចាំបាច់របស់ប្រជាពលរដ្ឋនៅក្នុងមូលដ្ឋានរបស់ខ្លួនតាមរយៈការអភិវឌ្ឍ ការលើកកម្ពស់គុណភាពនៃជីវភាពរស់នៅតាមរយៈការផ្តល់សេវាសង្គម ការកសាង និងពង្រឹងពង្រីកហេដ្ឋារចនាសម្ព័ន្ធសាធាណៈដែលសំខាន់ចាំបាច់ឱ្យបានកាន់តែប្រសើរឡើង និងប្រកបដោយសមធម៌ បរិយាប័ន្ន និងមានចីរភាពដើម្បីឈានឆ្ពោះទៅរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋ។
ក្នុងន័យនេះ ក្រុមប្រឹក្សាឃុំសង្កាត់ដែលបានជាប់ឆ្នោតនៅក្នុងអាណត្តិទី៥នេះ ត្រូវបន្ដនិរន្ដរភាពនៃការដឹកនាំគ្រប់គ្រង និងអភិវឌ្ឍន៍នៅមូលដ្ឋានក្នុងអាណត្ដិ៥ឆ្នាំបន្ដទៀត។ នេះបានន័យថា ទោះបីជាក្រុមប្រឹក្សាឃុំសង្កាត់ដែលប្រកាសទទួលស្គាល់នាឱកាសនេះជាក្រុមប្រឹក្សាឃុំសង្កាត់អាណត្ដិថ្មីក៏ពិតមែន ប៉ុន្ដែមិនមែនបានសេចក្ដីថាការងារគ្រប់គ្រង និងការងារអភិវឌ្ឍន៍មូលដ្ឋានដែលក្រុមប្រឹក្សាសង្កាត់អាណត្ដិចាស់បានអនុវត្ដកន្លងមកត្រូវបានបញ្ចប់នោះទេ ពោលគឺក្រុមប្រឹក្សាឃុំសង្កាត់អាណត្ដិថ្មីត្រូវបន្ដអនុវត្ដការងារគ្រប់គ្រង និងការអភិវឌ្ឍមូលដ្ឋានពីក្រុមប្រឹក្សាឃុំសង្កាត់អាណត្ដិចាស់ សំដៅធានាឱ្យមាននិរន្ដរភាពក្នុងកិច្ចការរដ្ឋបាល និងការផ្ដល់សេវា ព្រមទាំងការអភិវឌ្ឍនៅមូលដ្ឋានជាបន្តទៀត៕
ដោយ៖យឹម សុថាន
