សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជនជាតិចិនម្នាក់ទំនងជាស្រវឹងស្រាខ្លាំងហើយបានបើករថយន្តលឿនជ្រុលទៅបុកពីក្រោយរថយន្តពាក់ស្លាកលេខនគរបាលដែលចតនៅប្របចិញ្ចើមផ្លូវរុញទៅបុកបង្គោលភ្លើងមួយដើមពេញទំហឹងបណ្តាលឱ្យរថយន្តគាបជាប់នឹងបង្គោលភ្លើង តែសំណាងល្អនៅក្នុងហេតុការណ៍គ្រោះថ្នាក់ចរាចរណ៍នេះមិនមានអ្នករងរបួសឡើយ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ៣ទៀបភ្លឺឈានចូលថ្ងៃទី១៦ ខែកក្កដា ឆ្នាំ២០២២ ស្ថិតនៅតាមបណ្តោយផ្លូវព្រះមុនីវង្ស ក្នុងសង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ។
ប្រភពពត៌មាននៅកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តម៉ាកហ៊ីយ៉ាន់ដាយ starex ពណ៌ខ្មៅ (បានបិទស្លាកលេខ) បើកយកមកចតស្ងៀមនៅប្របចិញ្ចើមផ្លូវព្រះមុនីវង្ស រួចម្ចាស់ចូលទៅហូបអាហារនៅក្នុងហាងមួយកន្លែង។ លុះមួយសន្ទុះក្រោយមកគេឃើញបុរសជនជាតិចិនម្នាក់ទំនងជាស្រវឹងស្រាខ្លាំងបានបើករថយន្តម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ភ្នំពេញ2W-2328 តាមបណ្តោយផ្លូវព្រះមុនីវង្ស ក្នុងទិសដៅពីជើងទៅត្បូងយ៉ាងលឿន ពេលមកដល់ចំណុចកើតហេតុបានរេចង្កូតមកខាងស្តាំដៃជ្រុលទៅបុករថយន្ត starex ពីក្រោយពេញទំហឹងរុញទៅបុកផ្ទប់បង្គោលភ្លើង តែសំណាងល្អនៅក្នុងហេតុការណ៍គ្រោះថ្នាក់ចរាចរណ៍នេះ មិនបណ្តាលឱ្យមានអ្នកណារងរបួសនោះទេ ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ រួចទំនាក់ទំនងទៅសមត្ថកិច្ចជំនាញចរាចរណ៍មកវាស់វែងស្ទូចយករថយន្តទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ៕
ដោយ៖ជ្រោយពេជ្រ
