សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង ៖ បេីយោងតាមប្រភពព័ត៌មានពីរបាយការណ៍របស់កម្លាំងកងរាជអាវុធហត្ថខេត្តកោះកុង បានឱ្យដឹងនៅរសៀលថ្ងៃចន្ទទី០៨ ខែសីហា ឆ្នាំ២០២២នេះថា៖ កម្លាំងមូលដ្ឋានកងរាជអាវុធហត្ថស្រុកស្រែអំបិល បានធ្វេីការឃាត់ខ្លួនមនុស្សចំនួន០៦នាក់ និងរថយន្តដឹកឈេីខុសច្បាប់ ០២គ្រឿង។
របាយការណ៍ដដែលបន្តថា កាលពីវេលាម៉ោង០៣ និង២៥នាទីរសៀលថ្ងៃទី០៧ ខែសីហាម្សិលមិញនេះ កម្លាំងកងរាជអាវុធហត្ថ ស្នាក់ការសន្តិសុខ ៤៨១ និងកម្លាំងមូលដ្ឋានកងរាជអាវុធហត្ថស្រុកស្រែអំបិល ចំនួន០៦នាក់ រថយន្ត០២គ្រឿង ដឹកនាំដោយ លោកវរសេនីយ៍ត្រី កែវ សុីថា ប្រធានស្នាក់ការ បានល្បាតតាមផ្លូវជាតិ៤៨ បានឃើញរថយន្តសង្ស័យ០១គ្រឿង ពណ៌ លឿង គ្មានស្លាកលេខ ក៏បានដេញតាមរហូតដល់ (ចំណុចផ្លូវក្រួសក្រហមចូលភូមិតានី) ស្ថិតក្នុងភូមិជីខ ឃុំជីខលើ ស្រុកស្រែអំបិល ខេត្តកោះកុង ដល់ចំណុចខាងលើ អ្នកបើកបរបានឈប់រថយន្ត រួចរត់គេចខ្លួនបាត់។
បន្ទាប់មក កម្លាំងជំនាញ បានចុះទៅពិនិត្យជាក់ស្ដែងរកឃើញមានឈើនៅ ក្នុងរថយន្ត ជាប្រភេទឈើតាសេកចំនួន៤៤សន្លឹក ស្មើនឹង០,៧០៤ម៉ែត្រគីប។
បច្ចុប្បន្ន វត្ថុតាងខាងលើ បានប្រគល់ឱ្យជំនាញផ្នែករដ្ឋបាលព្រៃឈើស្រុកស្រែអំបិល ដើម្បីបន្តនីតិវិធីទៅតាមផ្លូវច្បាប់៕
ដោយ៖សហការី
