សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ អ្នកភូមិកំពុងដេកលង់លក់ស្កប់ស្កល់ក្នុងដំណេកស្រាប់តែភ្ញាក់ស្រឡាំងកាំងផ្អើលគ្រប់ៗគ្នាខណៈដែលមានរថយន្តយីឌុបដឹកស្រូវមួយគ្រឿងសង្ស័យអ្នកបើកបរងងុយដេកបានបើកទៅបុករង្វង់មូលរូបក្រពើរបស់ស្រុកកំពង់រោទ៍ផ្អើលទាំងកណ្ដាលអធ្រាត្របណ្តាលឱ្យមនុស្សម្នាក់របួសស្រាល។
ហេតុការណ៍នេះបានកើតឡើងកាលពីវេលាម៉ោង២និង៣៥នាទីរំលងអធ្រាត្រឈានចូលថ្ងៃទី១៨ ខែសីហាឆ្នាំ២០២២ស្ថិតនៅរង្វង់មូលរូបក្រពេីនៅលើផ្លូវជាតិលេខ៣១៤D ត្រង់ចន្លោះបង្គោលគីឡូម៉ែត្រលេខ១៥និង១៦ក្នុងភូមិស្វាយអាណាត ឃុំញ ស្រុកកំពង់រោទ៍ ខេត្តស្វាយរៀង។
តាមសមត្ថកិច្ចនគរបាលបានឱ្យដឹងថា អ្នកបើករថយន្តមានឈ្មោះ រស់ រ៉ូ អាយុ២៧ឆ្នាំ មុខរបរអ្នកបេីកបរ មានទីលំនៅភូមិស្វាយតានី ឃុំបឹងព្រះ ស្រុកបាភ្ភ្នំ ខេត្តព្រៃវែង។
សមត្ថកិច្ចបានបញ្ជាក់ថា មុនកើតហេតុមានរថយន្តដឹកស្រូវមួយគ្រឿងម៉ាកហុីយ៉ាន់ដាយ ពណ៌សលាយខៀវ ពាក់ស្លាកលេខភ្នំពេញ៣A-១៨៨១ បើកក្នុងទិសដៅពីជើងទៅត្បូង ខណៈនោះស្រាប់តែបើកទៅបុករង្វង់មូលរូបក្រពេី យ៉ាងពេញទំហឹងបណ្ដាលឱ្យអ្នកភូមិដែលកំពុងដេកលង់លក់ក្នុងដំណេកភ្ញាក់ស្រឡាំងកាំងផ្អើលគ្រប់ៗគ្នាចេញមកមើលឃើញមានមនុស្សម្នាក់រងរបួសស្រាល។
សមត្ថកិច្ចបានបញ្ជាក់ទៀតថាមូលហេតុដោយសារតែអ្នកបើកបរងងុយដេកទើបជួបគ្រោះថ្នាក់ចរាចរណ៍បែបនេះ។
បច្ចុប្បន្នរថយន្តត្រូវបានសមត្ថកិច្ចធ្វើការវាស់វែងនិងអូសយកមករក្សាទុកនៅប៉ុស្តិ៍រដ្ឋបាលញដើម្បីដោះស្រាយតាមច្បាប់៕
ដោយ៖ សុថាន
