សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ស្រ្តីវ័យចំណាស់ និងស្រី្តវ័យកណ្ដាលសរុបចំនួន ១៤នាក់ ដែលចូលចិត្តប្រមូលផ្ដុំគ្នាលេងល្បែងស៊ីសងខុសច្បាប់(បៀ) ត្រូវបានកម្លាំងសមត្ថកិច្ចនគរបាលស្រុកបវេលនាំខ្លួនមកវាស់កម្ពស់ និងធ្វើការអប់រំមិនឱ្យប្រព្រឹត្តិបទល្មើសដូច្នេះទៀត។ នេះបើយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តបាត់ដំបង បានឱ្យដឹងនៅព្រឹកថ្ងៃចន្ទទី២៩ ខែសីហា ឆ្នាំ២០២២។
របាយការណ៍ដដែលបន្តថា ករណីនាំខ្លួនក្រុមអ្នកញៀនល្បែងស៉ីសងខុសច្បាប់ខាងលេីនេះ បានកេីតឡេីងកាលពីថ្ងៃ អាទិត្យទី២៨ខែសីហាម្សិលមិញនេះ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌលោកវរសេនីយ៍ឯក សុខ សារិន អធិការនគរបាលស្រុកបវេល។
សូមជម្រាបថា កម្លាំងផ្នែកជំនាញនៃអធិការដ្ឋាននគរបាលស្រុក រួមជាមួយកម្លាំងប៉ុស្តិ៍នគរបាលរដ្ឋបាលបវេល បានចុះបង្ក្រាបករណីលេងល្បែងស៊ីសងខុសច្បាប់(បៀ)បានចំនួន០២ករណីស្ថិតក្នុងឃុំបវេល ស្រុកបវេល ខេត្តបាត់ដំបង ក្នុងនោះបាននាំខ្លួនមនុស្សចំនួន១៤នាក់ស្រី និងដកហូតបានបៀ ព្រមទាំងសម្ភារៈមួយចំនួនផងដែរ។
ក្រោយពេលនាំខ្លួនមកធ្វេីការសាកសួរនៅអធិការដ្ឋានរួចមកត្រូវបានធ្វើការអប់រំនិងកិច្ចសន្យាឱ្យបញ្ឈប់សកម្មភាពនេះបន្តទៀតរួចអនុញ្ញាតឱ្យគ្រួសារមកធានាត្រឡប់ទៅមូលដ្ឋានវិញ៕
ដោយ៖ស សារ៉េត
