សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ បេីតាមការបញ្ជាក់ពីលោក ហួត បូរី អធិការនគរបាលក្រុងបានលុង នៃស្នងការដ្ឋាននគរបាលខេត្តរតនគិរី បានឱ្យដឹងនៅព្រឹកថ្ងៃសុក្រទី២ ខែកញ្ញា ឆ្នាំ២០២២នេះថា៖ កម្លាំងសមត្ថកិច្ចជំនាញកំពុងស្រាវជ្រាវតាមចាប់ខ្លួនជនដៃដល់០៦នាក់ពាក់ព័ន្ធនឹងអំពើហិង្សាដោយចេតនាមានស្ថានទម្ងន់ទោស យកមកផ្ដន្ទាទោសតាមច្បាប់ បន្ទាប់ពីពួកគេបានធ្វើសកម្មភាពប្រេីដាវសាមូរ៉ៃព្រួតគ្នាកាប់ទៅលេីយុវជនពីរនាក់ទាំងកំរោល បណ្ដាលឱ្យរងរបួសធ្ងន់។
អធិការនគរបាលក្រុងបានលុង បានឱ្យដឹងទៀតថា ករណីហិង្សាដោយចេតនាមានស្ថានទម្ងន់ទោសខាងលើនេះបានកើតឡើងកាលពីយប់ថ្ងៃទី៣១ ខែសីហា ឆ្នាំ២០២២នៅត្រង់ចំណុចទល់មុខមន្ទីរព័ត៌មានខេត្តរតនគិរី ស្ថិតនៅក្នុងភូមិទេសអន្លង់ សង្កាត់បឹងកន្សែង ក្រុងបានលុង ខេត្តរតនគិរី។ ប៉ុន្ដែករណីខាងលើនេះ សមត្ថកិច្ចមិនទាន់ដឹងពីមូលហេតុនៅឡើយទេ ខណៈដែលក្រុមជនសង្ស័យមានបក្ខពួកចំនូន៦នាក់ប្រដាប់ដោយដាវសាមូរ៉ៃ ជិះម៉ូតូ៣គ្រឿងម៉ាកហុងដាឌ្រីម សេ១២៥ ចំនួន២គ្រឿង និងអុិចសិនធ័រ មួយគ្រឿង ហើយក្រោយពីធ្វើសកម្មភាពរួចពួកគេបានជិះម៉ូតូរត់គេចខ្លួនបាត់តែម្ដង។
ជនរងគ្រោះទាំង២នាក់នេះទី១-ឈ្មោះ ម៉ៅ សារិន អាយុ២២ឆ្នាំ ជនជាតិខ្មែរ មានទីលំនៅភូមិឡាប៉ូ សង្កាត់យក្ខឡោម ក្រុងបានលុង មុខរបរកសិករ រងរបួសធ្ងន់ (ដាច់ត្រចៀកខាងឆ្វេង) ជាអ្នកបើកបរម៉ូតូ និងទី២-ឈ្មោះ ជា សម័យ អាយុ១៩ឆ្នាំ ជនជាតិទំពួន មានទីលំនៅភូមិសមុទ្រ ឃុំសេដា ស្រុកលំផាត់ ខេត្តរតនគិរី មុខរបរ សិស្ស រងរបួសធ្ងន់ (ដាច់សាច់កញ្ចឹងក ផ្នែកខាងក្រោយ) ។
បច្ចុប្បន្នជនរងគ្រោះទាំងពីរនាក់កំពុងសម្រាកព្យាបាលនៅមន្ទីរពេទ្យបង្អែកខេត្ត៕
ដោយ៖សហការី
