សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ បើយោងតាមប្រភពព័ត៌មានពីរដ្ឋបាលខេត្តឧត្ដរមានជ័យ នៅថ្ងៃសៅរ៍ទី០៣ ខែកញ្ញា ឆ្នាំ២០២២នេះ បានឱ្យដឹងថា បន្ទាប់ពីមានភ្លៀងធ្លាក់គំហុកដល់កម្រិតពី៩០ ទៅ១០០មីលីម៉ែត្រក្នុងរយៈពេលខ្លី និងដោយសារប្រព័ន្ធលូដោះទឹកមានទំហំតូចទឹកហូរមិនទាន់នោះ បណ្ដាលឱ្យជំនន់ទឹកភ្លៀងលិចតំបន់មួយចំនួននៅក្រុងសំរោងនោះ ពេលនេះទឹកបានស្រកអស់ទៅវិញហើយ។
ជាមួយគ្នានោះ ប្រធានមន្ទីរធនធានទឹក និងឧតុនិយមខេត្តខេត្តឧត្តរមានជ័យ លោក ញឺន កួន បានថ្លែងឱ្យដឹងនៅថ្ងៃទី៣ ខែកញ្ញា ឆ្នាំ២០២២នេះដែរថា៖ ជំនន់ទឹកភ្លៀងដែលបាន ធ្វើឱ្យមានការលិចលង់នៅតំបន់មួយចំនួនស្ថិតនៅសង្កាត់អូស្មាច់ ក្រុងសំរោង កាលពីល្ងាចថ្ងៃទី២ខែកញ្ញា បន្ទាប់ពីមានភ្លៀងធ្លាក់ដល់កម្រិតពី៩០ទៅ១០០មីលីម៉ែត្រក្នុងរយៈពេលជិតបីម៉ោហរួចមកនោះ ទឹកបានស្រកអស់ទៅវិញនៅពេលប៉ុន្មានម៉ោងបន្ទាប់។
ប្រធានមន្ទីររូបនេះ ក៏បានបញ្ជាក់មូលហេតុដែលនាំឱ្យមានការលិចលង់ផ្លូវលំនិងលំនៅដ្ឋានប្រជាពលរដ្ឋមួយចំនួនក្នុងរយៈពេលខ្លីនៅតំបន់អូរស្មាច់នេះ គឺបណ្តាល មកពីបរិមាណទឹកភ្លៀងធ្លាក់គំហុកច្រើនក្នុងរយៈពេលខ្លី ធ្វើឱ្យប្រព័ន្ធលូមានទំហំតូចដោះទឹកមិនទាន់។ពេលនេះទឹកបានស្រកអស់ទៅវិញហើយ នៅពេលមានការលិចលង់នោះឯកឧត្តមប៉ែន កុសល្យ អភិបាលខេត្តឧត្តរមានជ័យ និងមន្ត្រីពាក់ព័ន្ធក៏បានអញ្ជើញចុះពិនិត្យមើលស្ថានភាពលិចលង់និងផ្លូវដោះទឹកឱ្យទឹកស្រកបានលឿនទៅវិញ។
សូមជម្រាបដែរថា កាលពីថ្ងៃទី២ ខែកញ្ញាម្សិលមិញនេះ ក្រសួងធនធានទឹក និងឧតុនិយម បានសេចក្តីជូនដំណឹងស្តីពីស្ថានភាពអាកាសធាតុសម្រាប់ពីថ្ងៃទី៥ដល់ថ្ងៃទី៩ខែកញ្ញាឆ្នាំ២០២២ ជាទូទៅអាចមានភ្លៀងធ្លាក់រាយប៉ាយច្រើននៅទូទាំងប្រទេស បង្កឱ្យមានជាជំនន់ទឹកភ្លៀងនិងអាចធ្វើឱ្យទឹកទន្លេហក់ឡើងជាថ្មីម្តងទៀត។ នៅក្នុងសេចក្តីជូនដំណឹងដែលចុះហត្ថដោយលោកលឹម គានហោ រដ្ឋមន្ត្រីក្រសួងធនធានទឹកនិងឧតុនិយមបានសរសេរថាព្រះរាជាណាចក្រកម្ពុជា បាននឹងកំពុងទទួលរងនូវឥទ្ធិពលពីប្រព័ន្ធសម្ពាធទាប (ITCZ) អូសបន្លាយនៅលើភាគខាងជើង ប្រទេសថៃ ឡាវ និងវៀតណាម ។ នៅថ្ងៃទី៥ ខែកញ្ញា ឆ្នាំ ២០២២ ប្រព័ន្ធសម្ពាធទាបរួមជាមួយនឹងសម្ពាធទាបនឹងរំកិលចុះមកក្រោមអូសបន្លាយនឹងគ្របដណ្តប់មកលើប្រទេសកម្ពុជា ។
សេចក្តីជូនដំណឹង បានគូសបញ្ជាក់ទៀតថា៖ លក្ខណៈបែបនេះ នឹងធ្វើឲ្យព្រះរាជាណាចក្រកម្ពុជាចាប់ពីថ្ងៃទី៥ដល់ថ្ងៃទី៩ខែកញ្ញាឆ្នាំ២០២២ ស្ថានភាពអាកាសធាតុជាទូទៅ អាចមានភ្លៀងធ្លាក់រាយប៉ាយលើផ្ទៃប្រទេស ជាមួយនឹងទឹកភ្លៀងដែលមានលក្ខណៈធ្លាក់ជាប់ជាបន្ត ក្នុងកម្រិតពីមធ្យមទៅបង្គួរ ក្នុងនោះក៏មានផ្នែកខ្លះមានភ្លៀងធ្លាក់ច្រើនដោយអន្លើ លាយឡំទៅដោយផ្គរ រន្ទះនឹងខ្យល់កន្ត្រាក់ ដែលអាចបង្កឲ្យតំបន់ផ្ទៃរងទឹកភ្លៀងនៃបណ្តាខេត្តមួយចំនួន នៅក្នុងភូមិសាស្ត្រជាប់តំបន់ភ្នំ ជួរភ្នំ និងទីទំនាបជាប់ផ្លូវទឹក មានហានិភ័យខ្ពស់នឹងជំនន់ទឹកភ្លៀង មានជាអាទិ៍ ៖ខេត្តព្រះវិហារ ,រតនគិរី ,កំពង់ធំ(ស្ទឹងសែន) ,ឧត្តរមានជ័យ ,បន្ទាយមានជ័យ ,បាត់ដំបង ,សៀមរាបប៉ៃលិន ,ពោធិ៍សាត់ ,កំពង់ស្ពឺ(ស្រុកជាប់ជួរភ្នំក្រវាញ និងភ្នំឱរ៉ាល់ ),កោះកុង និងខេត្តព្រះសីហនុ(កំណាត់ផ្លូវជាតិលេខ ៤ រវាងខេត្តកោះកុង និងខេត្តព្រះសីហនុ)។ ទន្ទឹមនឹងនេះ អាចនឹងមានភ្លៀងធ្លាក់ច្រើននៅតំបន់ផ្ទៃរងទឹកភ្លៀងនៃអាងមេគង្គ ដែល អាចធ្វើឲ្យទឹកទន្លេ មានការងើបឡើងវិញ៕
ដោយ៖សហការី
