សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារសៀលថ្ងៃអាទិត្យ ៦រោច ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៦ ខែតុលា ឆ្នាំ២០២២, លោក កើត រិទ្ធ រដ្ឋមន្ត្រីក្រសួងយុត្តិធម៌ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទមហាសន្និបាតប្រចាំឆ្នាំរបស់គណៈមេធាវីនៃព្រះរាជាណាចក្រកម្ពុជាលើកទី២៧ និងការបោះឆ្នោតជ្រើសតាំងប្រធានគណៈមេធាវី អាណត្តិទី១៤ (២០២២-២០២៤) ។
មានប្រសាសន៍នៅក្នុងពិធីនេះ លោក កើត រិទ្ធ រដ្ឋមន្ត្រីក្រសួងយុត្តិធម៌ បានចូលរួមអបអរសាទរយ៉ាងកក់ក្តៅចំពោះ លោក លី ច័ន្ទតុលា ដែលត្រូវបានបោះឆ្នោតជ្រើសតាំងសាជាថ្មីជាប្រធានគណៈមេធាវីនៃព្រះរាជាណាចក្រកម្ពុជា សម្រាប់អាណត្តិទី ១៤ ដែលនេះបានបង្ហាញយ៉ាងច្បាស់ថា លោក លោកស្រី សមាជិក-សមាជិកាទាំងអស់នៃគណៈមេធាវី ទទួលស្គាល់នូវការដឹកនាំរបស់ លោក លី ច័ន្ទតុលា ក្នុងរយៈពេល ២ ឆ្នាំ កន្លងទៅនេះ ហើយបានផ្តល់សេចក្តីទុកចិត្តទាំងស្រុងចំពោះ លោក លី ច័ន្ទតុលា ឱ្យបន្តដឹកនាំគណៈមេធាវីនៃព្រះរាជាណាចក្រកម្ពុជា ដើម្បីលើកកម្ពស់ឧត្តមភាព និងកិត្យានុភាពនៃវិជ្ជាជីវៈមេធាវី។ លោករដ្ឋមន្ត្រីក៏បានបង្ហាញនូវសេចក្តីសង្ឃឹម និងជំនឿជាក់ថា គណៈមេធាវី ក្រោមការដឹកនាំរបស់ លោក លី ច័ន្ទតុលា ក្នុងអាណត្តិថ្មីនេះ នឹងបន្តខិតខំអនុវត្តតួនាទីដ៏មានសារៈសំខាន់របស់ខ្លួនឱ្យកាន់តែមានប្រសិទ្ធភាព និងទទួលបានសមិទ្ធផលថ្មីៗបន្ថែមទៀត ដើម្បីជាឧត្តមប្រយោជន៍សម្រាប់វិជ្ជាជីវៈមេធាវី និងមេធាវី ជាពិសេសការរួមគ្នាដើម្បីឧត្តមភាព និងកិត្យានុភាពនៃវិជ្ជាជីវៈមេធាវី ដែលជាចក្ខុវិស័យ និងជាគោលការណ៍ការងាររបស់ លោក លី ច័ន្ទតុលា ហើយភាពរឹងមំា សេចក្តីថ្លៃថ្នូរ និងសមត្ថភាពវិជ្ជាជីវៈមេធាវី ក៏ជាកត្តារួមចំណែកដ៏សំខាន់ក្នុងកិច្ចដំណើរការនៃការលើកកម្ពស់ដល់វិស័យយុតិ្តធម៌នៅក្នុងព្រះរាជាណាចក្រកម្ពុជា។
ឆ្លៀតក្នុងឱកាសនេះ ដើម្បីបង្កើននូវជំនឿទុកចិត្ត និងតម្លៃនៃវិជ្ជាជីវៈមេធាវីក្នុងសង្គមកម្ពុជា លោករដ្ឋមន្ត្រី ក៏បានផ្តាំផ្ញើទៅដល់ លោកប្រធានគណៈមេធាវី, លោក លោកស្រី សមាជិក-សមាជិកាក្រុមប្រឹក្សាគណៈមេធាវី និងមេធាវីទាំងអស់ រួមមានជាអាទិ៍៖
ទី១-ក្នុងពេលប្រកបវិជ្ជាជីវៈ, មេធាវីគ្រប់រូបសូមគោរពឱ្យបានត្រឹមត្រូវ និងប្រកាន់ខ្ជាប់នូវគោលការណ៍ច្បាប់ និងក្រមសីលធម៌វិជ្ជាជីវៈរបស់ខ្លួន ព្រមទាំងត្រូវរក្សាឱ្យបាននូវគោលការណ៍សុចរិតភាព និងភាពស្មោះត្រង់ ដើម្បីជួយរកយុតិ្តធម៌ជូនប្រជាពលរដ្ឋ ក៏ដូចជាដើម្បីការពារ និងលើកកម្ពស់កិតិ្តយស សេចក្តីថ្លៃថ្នូរ និងតម្លៃវិជ្ជាជីវៈមេធាវី។
ទី២-គណៈមេធាវីនៃព្រះរាជាណាចក្រកម្ពុជា សូមបន្តយកចិត្តទុកដាក់លើការពង្រឹង និងបង្កើនសមត្ថភាពវិជ្ជាជីវៈដល់មេធាវី តាមរយៈការធ្វើបច្ចុប្បន្នកម្មកម្មវិធីសិក្សារបស់សិស្សមេធាវី ក៏ដូចជាការបង្កើតកម្មវិធីបណ្តុះបណ្តាល និងផ្លាស់ប្តូរបទពិសោធន៍ទាំងនៅកម្រិតថ្នាក់ជាតិ និងអន្តរជាតិ សំដៅធ្វើឱ្យមេធាវីមានសមត្ថភាព ចំណេះដឹងគ្រប់គ្រាន់ និងរឹងមាំ ទាំងលើច្បាប់ជាតិ ទាំងលើច្បាប់អន្តរជាតិ ហើយសូមមេធាវីទាំងអស់ ត្រូវយកចិត្តទុកដាក់ពង្រឹង និងបង្កើនសមត្ថភាពផ្ទាល់ខ្លួនទាំងលើសមត្ថភាពបច្ចេកទេស ភាសា និងបច្ចេកវិទ្យា តាមរយៈការចូលរួមឱ្យបានផុលផុសក្នុងកម្មវិធីបណ្តុះបណ្តាលនានា ដែលរៀបចំឡើងដោយគណៈមេធាវី។
ទី៣-មេធាវីគ្រប់រូបសូមបន្តចូលរួម និងគាំទ្របន្ថែមទៀតដល់យន្តការប្រឹក្សាយោបល់ផ្នែកច្បាប់ និងការផ្តល់ជំនួយផ្នែកច្បាប់ដល់ជនក្រីក្រដោយឥតគិតកម្រៃ ដែលឆ្លុះបញ្ចាំងឱ្យឃើញពីការចូលរួមអនុវត្តនូវកាតព្វកិច្ចតាមផ្លូវច្បាប់ផង និងជាការចូលរួមចំណែកជួយដល់ការងារសង្គម ក៏ដូចជាចូលរួមជាមួយរាជរដ្ឋាភិបាលផង ក្នុងការការពារ និងលើកកម្ពស់សិទ្ធិទទួលបានយុតិ្តធម៌របស់ប្រជាពលរដ្ឋទាំងអស់ ជាពិសេសប្រជាពលរដ្ឋក្រីក្រ ដែលខ្វះលទ្ធភាព។ ត្រង់ចំណុចនេះ លោករដ្ឋមន្ត្រី ក៏បានគូសបញ្ជាក់ផងដែរថា មេធាវីដែលបានទទួលការពារក្តីជូនជនក្រីក្របានកាន់តែច្រើន និងប្រកបដោយការទទួលខុសត្រូវខ្ពស់ មេធាវីរូបនោះក៏នឹងទទួលបាននូវកិត្តិយស កេរ្តិ៍ឈ្មោះ និងសេចក្តីគោរពនៅក្នុងសង្គមជាតិផងដែរ
ទី៤-មេធាវីគ្រប់រូបសូមប្រកាន់យកនូវស្មារតីសន្តិភាពនិយម តាមរយៈការព្យាយាមដើរតួនាទីជាអ្នកផ្សះផ្សា ឬសម្រុះសម្រួលបញ្ចប់វិវាទនៅក្រៅប្រព័ន្ធតុលាការ ជាពិសេសករណីវិវាទគ្រួសារ វិវាទដីធ្លី វិវាទផ្នែករដ្ឋប្បវេណី និងវិវាទពាណិជ្ជកម្ម។ ការដោះស្រាយវិវាទក្រៅប្រព័ន្ធតុលាការ ត្រូវបានចាត់ទុកជាការងារអាទិភាពដ៏សំខាន់មួយក្នុងការងារកែទម្រង់វិស័យយុត្តិធម៌ ស្របតាមអនុសាសន៍ដឹកនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា សម្រាប់វិវាទដែលអាចសម្រុះសម្រួលគ្នាបាន ដើម្បីធានានូវស្ថានភាពឈ្នះ-ឈ្នះទាំងអស់គ្នា ដែលជាការរួមចំណែកជួយលើកកម្ពស់ភាពសុខដុមរមនាក្នុងសហគមន៍ និងសន្តិភាពរបស់ប្រទេស ៕
ដោយ : សហការី
