សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ថានភាពទឹកជំនន់នៅតាមសណ្ដុរស្ទឹងព្រែក ត្នោតក្នុងភូមិសាស្ត្ររាជធានីភ្នំពេញបានវិលត្រឡប់មករកស្ថានភាពធូរស្រាលវិញហើយ ពោលគឺលំនៅឋានដែលរងការជន់លិចដោយជំនន់ស្ទឹងព្រែកត្នោតនោះទឹកបានស្រកវិញអស់ហើយ ប៉ុន្តែមិនទាន់ស្ងួតដីនៅឡើយទេ។
បើតាមមន្ត្រីរដ្ឋបាលខណ្ឌដង្កោបានឲ្យដឹងថា កម្ពស់ទឹកស្ទឹងព្រែកត្នោត ដែលហូរកាត់ក្នុងភូមិសាស្រ្តខណ្ឌ ដង្កោ បង្កការជន់លិចផ្ទះសម្បែងពលរដ្ឋមួយចំនួនកាល ពីសប្តាហ៍មុននោះ បានស្រកអស់ទៅវិញហើយ។ យ៉ាង ណាក៏ដោយលំនៅឋានខ្លះមិនទាន់អាចចូលទៅស្នាក់នៅបានឡើយពីព្រោះនៅមានភក់និងដីមិនទាន់ស្ងួត។
លំនៅដ្ឋានខ្លះត្រូវបានម្ចាស់ចូលទៅស្នាក់នៅនិងប្រកប របររកស៊ីជាធម្មតាវិញហើយ។ ពលរដ្ឋមួយចំនួនដែលផ្ទះមានការជន់លិចខ្លាំងរយៈពេលជាង ១សប្ដាហ៍មុន ក៏បានចូលទៅរស់នៅក្នុងផ្ទះវិញ ខណៈពលរដ្ឋមួយ ចំនួនរង់ចាំដីភក់ក្រោមផ្ទះមានការស្ងួតរឹងសិន។ និយាយរួមទៅស្ថានភាពវិលត្រឡប់ទៅរកភាពប្រក្រតីឡើងវិញនៅក្នុងពេលឆាប់ៗខាងមុខនេះ។
ទឹកស្ទឹងព្រែកត្នោត ដែលមានការហក់ឡើងខ្ពស់ បង្កការជន់លិចផ្ទះសម្បែងពលរដ្ឋមួយចំនួនរស់នៅជាប់នឹងមាត់ស្ទឹង ក្នុងភូមិសាស្រ្តខណ្ឌដង្កោ បានស្រកអស់ទៅវិញហើយ។ ពលរដ្ឋក្នុងភូមិសាស្រ្ត សង្កាត់ព្រៃវែង ដែលមានការជន់លិចខ្លាំងជាងគេ ហើយបានជម្លៀសមកសាងសង់តង់ រស់នៅជាបណ្ដោះអាសន្ននៅលើទំនប់ មួយចំនួនក៏បានត្រឡប់ទៅរស់នៅផ្ទះសម្បែងរបស់ខ្លួនវិញ។
ប៉ុន្តែគ្រួសារមួយចំនួនបន្តស្នាក់នៅជាបណ្ដោះ អាសន្នលើទំនប់នៅឡើយ ដោយពួកគាត់រង់ចាំដីភក់ក្រោមផ្ទះ ដែលបង្កដោយទឹកស្ទឹង ស្ងួតរឹង ងាយស្រួលធ្វើដំណើរសិន។ យ៉ាងណាក៏ដោយពេលវេលាគឺមិនអាចអូសបន្លាយយូរទេ គឺឆាប់ៗនេះប្រជាពលរដ្ឋនិងវិល ត្រឡប់ចូលទៅរស់នៅក្នុងផ្ទះសំបែងរបស់ពួកគាត់វិញហើយ។
ប្រជាពលរដ្ឋដែលមកស្នាក់នៅទីទួលសុវត្ថិភាពបណ្ដោះ អាសន្ននិយាយថា ការជន់លិចក្នុងឆ្នាំនេះ គឺឆាប់ស្រកទៅវិញ មិនដូចការលិចរាល់ឆ្នាំនោះទេ។ ពួកគាត់បន្តថា ស្ទឹងត្រូវបានស្ដារ និងមានការកាយសំរាម ស្មៅ ចេញបានស្អាត ទើបទឹកអាចហូរបានលឿន។
បើផ្អែកលើអាកាសធាតុក្នុងពេលបច្ចុប្បន្ន ក្រសួង ធនធានទឹក និងឧតុនិយម បានចេញសេចក្ដីជូនដំណឹងបញ្ជាក់ថា នៅថ្ងៃទី១៩-២១ ខែតុលា ព្រះរាជាណាចក្រកម្ពុជា បន្តទទួលឥទ្ធិពលនូវទ្រនុងសម្ពាធខ្ពស់ពីប្រទេសចិន ។ ចំណែកព្យុះទី២០ ឈ្មោះ នេសាទ ( NESAT)ដែលបានកើតឡើងនៅភាគខាងជើងហ្វីលីពីន និងថមថយ ឥទ្ធិពលនៅពេលធ្វើដំណើរដល់ប៉ែកខាងក្រោមនៃភាគខាងជើងវៀតណាមនៅថ្ងៃទី២១ខែតុលា ។
ចាប់ពី ថ្ងៃទី២២-២៥ ខែតុលា ឥទ្ធិពលនៃទ្រនុងសម្ពាធខ្ពស់ពីចិនចុះខ្សោយ ខណៈដែលជ្រលងសម្ពាធទាបពីសមុទ្រចិនខាងត្បូងបង្កើនឥទ្ធិពលមកលើភាគខាងត្បូងកម្ពុជា ។
ស្ថានភាពបែបនេះនឹងធ្វើឲ្យ៖ តំបន់ទំនាបកណ្តាល ចាប់ពីថ្ងៃទី១៩-២១ ខែតុលា ស្ទើរតែគ្មានភ្លៀង បើមានតិចតួចតែប៉ុណ្ណោះ ។ បន្ទាប់ពីនោះបណ្តរាជធានី-ខេត្ត នៅភាគខាងក្រោមនិងខាងជើងជាប់ប្រទេសវៀតណាម នឹងមានភ្លៀងក្នុងកំរិតពីតិចទៅបង្គួរលាយឡំទៅដោយផ្គរ រន្ទះ និងខ្យល់កន្ត្រាក់ ។ ចំពោះបណ្តាខេត្តដទៃទៀតអាចមានភ្លៀងតិចតួច ។ ចំពោះតំបន់ខ្ពង់រាបវិញ ចាប់ពីថ្ងៃទី១៩-២១ ខែតុលា ស្ទើរតែគ្មានភ្លៀង បើមានតិចតួចតែប៉ុណ្ណោះ ។
បន្ទាប់ពីនោះនឹងអាចមានភ្លៀងក្នុងកំរិតពីតិចទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់ ។ រីឯតំបន់មាត់សមុទ្រ ៖ អាចមានភ្លៀងក្នុងកំរិតពីតិចទៅបង្គួរ លាយឡំទៅដោយផ្គរ រន្ទះ និងខ្យល់កន្ត្រាក់ ៕
ដោយ៖ សូរិយា
