សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងរម្លឹកពីការខិតខំរបស់សម្តេចក្នុងការស្វែងរកកិច្ចព្រមព្រៀងសន្តិភាពដែលកម្ពុជាមានការបែកបាក់ជាយូរលង់មកហើយៗសម្តេចបញ្ជាក់ថា ការចូលព្រៃតស៊ូរបស់សម្តេចពីអតីតកាលមិនមែនតាមប៉ុលពតទេ ពោលគឺសម្តេចមិនស្គាល់ប៉ុលពតឡើយ។ ការថ្លែងបែបនេះរបស់សម្ដេចតេជោ បានធ្វេីឡេីងនៅព្រឹកថ្ងៃអាទិត្យទី២៣ ខែតុលា ឆ្នាំ២០២២នេះ ក្នុងពិធីជួបសំណេះសំណាលចែកស្រូវពូជ និងស្បៀងជូនពលរដ្ឋរងគ្រោះដោយទឹកជំនន់ធ្ងន់ធ្ងរចំនួន ៥០០០គ្រួសារនៅខេត្តបន្ទាយមានជ័យ និងដោយសារថ្ងៃនេះជាខួបកិច្ចព្រមព្រៀងសន្តិភាពទីក្រុងប៉ារីស។
សម្តេចតេជោ ហ៊ុន សែន បានថ្លែងបញ្ជាក់ថា ចូលព្រៃតស៊ូតាមការអំពាវនាវរបស់ព្រះបិតារបស់យើង ហើយការដែលប៉ុលពតគ្រប់គ្រងគឺដោយសារប៉ុលពតប្លន់អំណាច។ សម្តេចតេជោ ក៏បានបន្តរម្លឹកពីគុណតម្លៃនៃកិច្ចព្រមព្រៀងសន្តិភាពទីក្រុងប៉ារីសដែលតែងតែមានអ្នកវិភាគយកមកបំភ្លៃការពិតទាញយកនូវគុណសម្បត្តិកេងចំណេញផ្នែកនយោបាយ។
ទោះជាយ៉ាងណា សម្តេចថា អ្នកវិភាគដ៏ឆ្អិនឆ្អៅខ្លះនោះពេលមានកិច្ចព្រមព្រៀងសន្តិភាពទីក្រុងប៉ារីសថ្ងៃ២៣តុលាអ្នកទាំងនោះនៅដើរស្រាតនៅឡើយទេ។សម្តេចបានបញ្ជាក់ថា កិច្ចព្រមព្រៀងសន្តិភាពទីក្រុងប៉ារីសបានបញ្ចូលធាតុទៅក្នុងរដ្ឋធម្មនុញ្ញរបស់យើងអស់ហើយ។
ជាមួយគ្នានោះ សម្ដេចតេជោ ហ៊ុន សែន បានថ្លែងប្រសាសន៍សំខាន់ៗមានដូចខាងក្រោម៖
-សម្តេចតេជោ ហ៊ុន សែន បាននាំយកនូវព្រះរាជបណ្តាំរបស់ព្រះមហាក្សត្រ និងសម្តេចម៉ែ ជូនដល់ប្រជាពលរដ្ឋទាំអស់ ដែលព្រះអង្គទាំងទ្វេតែងយកព្រះទ័យទុកដាក់ចំពោះសុខទុក្ខរបស់ប្រជាពលរដ្ឋ។
-សម្តេចតេជោ ហ៊ុន សែន បានថ្លែងកោតសរសើរ និងវាយតម្លៃខ្ពស់ចំពោះកិច្ចប្រឹងប្រែងរបស់អាជ្ញាធរខេត្តបន្ទាយមានជ័យ ក្នុងការជួយប្រជាពលរដ្ឋពេលជួបគ្រោះទឹកជំនន់។
-សម្តេចតេជោ ហ៊ុន សែន បានវាយតម្លៃខ្ពស់ចំពោះកិច្ចសហប្រតិបត្តិការរបស់អាជ្ញាធរទាំងអស់ ដើម្បីឆ្លើយតបនឹងបញ្ហារបស់ប្រជាពលរដ្ឋ។ ខណៈសម្តេចតេជោ ហ៊ុន សែន ទុកអង្ករ ១០០តោន និងថវិកា ១០ម៉ឺនដុល្លារ ឱ្យអាជ្ញាធរខេត្តចែកជូនពលរដ្ឋរងគ្រោះដោយទឹកជំនន់។
-សម្តេចតេជោ ហ៊ុន សែន បានថ្លែងថា អាវសម្តេចពាក់ពេលជួបប្រជាកសិករ អាចនឹងត្រូវគេយកទៅតម្កល់ទុកនៅពេលសម្តេចចាកចេញពីនយោបាយ។
-សម្តេចតេជោ ហ៊ុន សែន បានថ្លែងថា យោងតាមរបាយការណ៍របស់រដ្ឋមន្ត្រីកសិកម្ម ការព្រោះស្រូវនៅតំបន់ខ្លះក្រាស់ពេក។
-សម្តេចតេជោ ហ៊ុន សែន បានថ្លែងណែនាំឱ្យរដ្ឋមន្ត្រីកសិកម្មបន្តចុះសិក្សាស្រាវជ្រាវលើបច្ចេកទេសព្រោះស្រូវ និងការប្រើប្រាស់ជី ដើម្បីធានាឱ្យកសិករធ្វើស្រែទទួលបានផលចំណេញ។
-សម្តេចតេជោ ហ៊ុន សែន បានថ្លែងថា ចាប់តាំងពីសម្តេចដឹកនាំប្រទេសមក សម្តេចតែងប្រាប់ទៅរដ្ឋមន្ត្រីកសិកម្មកុំឱ្យក្លាយជាមនុស្ស «អត់ពូជ»។ «អត់ពូជ» គឺសម្តៅដល់ពូជស្រូវ និងដំណាំផ្សេងៗ។
-សម្តេចតេជោ ហ៊ុន សែន បានថ្លែងថា ប្រជាកសិករដែលបានទទួលស្រូវពូជនាព្រឹកថ្ងៃនេះ ទទួលបាន ១០០គីឡូក្រាមស្មើគ្នា។
-សម្តេចតេជោ ហ៊ុន សែន ស្នើដល់កសិករប្រើស្រូវពូជមិនអស់ សូមចែករំលែកទៅអ្នកប្រើមិនគ្រប់។
-សម្តេចតេជោ ហ៊ុន សែន ស្នើសុំការយោគយល់ និងអធ្យាស្រ័យពីប្រជាពលរដ្ឋមានលទ្ធភាព ជុំវិញការផ្តល់ប្រាក់ឧបត្ថម្ភសាច់ប្រាក់ ជូនពលរដ្ឋរងគ្រោះដោយទឹកជំនន់។
-សម្តេចតេជោ ហ៊ុន សែន បានថ្លែងថា ពលរដ្ឋរងគ្រោះរងគ្រោះដោយសារអតិផរណា ដែលនឹងទទួលបានការឧបត្ថម្ភពីរាជរដ្ឋាភិបាល មានប្រមាណ ៦០ម៉ឺនគ្រួសារ។
-សម្តេចតេជោ ហ៊ុន សែន បានប្រកាសនៅថ្ងៃម្សិលមិញមិនមានអ្នកឆ្លងកូវីដ១៩នោះទេ។ សម្តេចតេជោ បញ្ជាក់ថានេះហើយជាជោគជ័យនៃគោលនយោបាយវ៉ាក់សាំង។
-សម្តេចតេជោ ហ៊ុន សែន បានថ្លែងថា ប្រជាពលរដ្ឋប្រមាណ ១០ម៉ឺនគ្រួសារ រងគ្រោះដោយទឹកជំនន់នោះ ហើយក្នុងនោះមានប្រមាណ ២ម៉ឺនគ្រួសារ ត្រូវទទួលបានការអន្តរាគមន៍ពីរាជរដ្ឋាភិបាល។
-សម្តេចតេជោ ហ៊ុន សែន បានថ្លែងថា សម្តេចមានវិប្បដិសារី ចំពោះការមិនបានឧបត្ថម្ភថវិកាជូនស្ត្រីឆ្លើយឆ្លងជាមួយសម្តេច នៅតំបន់អភិវឌ្ឍន៍ពាក់ស្នែង។ តែទោះជាយ៉ាងណា សម្តេចបានចាត់ចែងឱ្យលោក សេង ទៀង ផ្ញើប្រាក់ជូនរួចហើយចំនួន ១ពាន់ដុល្លារ។
-សម្តេចតេជោ ហ៊ុន សែន ថ្លែងអំណរគុណដល់អន្តរជាតិ ដែលបានជួយសម្របសម្រួលនាំឱ្យមានកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១។
-សម្តេចតេជោ ហ៊ុន សែន បានថ្លែងថា សន្តិភាពទីក្រុងប៉ារីស ត្រូវទទួលស្គាល់ពីតួនាទីដ៏សំខាន់របស់ភាគីកម្ពុជា។ ជាពិសេសការជួបគ្នារវាងសម្តេច នរោត្តម សីហនុ និងសម្តេច។ សម្តេចតេជោ ហ៊ុន សែន បានថ្លែងថា បើភាគីខ្មែរមិនស្រុះស្រួលគ្នាទេ មិនមានកិច្ចព្រមព្រៀងសន្តិភាពទីក្រុងប៉ារីសនោះឡើយ។
-សម្តេចតេជោ ហ៊ុន សែន បានថ្លែងថា អ្វីដែលកម្ពុជាចង់បានពីកិច្ចព្រមព្រៀងទីក្រុងប៉ារីស គឺការបញ្ចប់ភ្លើងសង្គ្រាម តែអង្គការសហប្រជាជាតិជួយមិនបាន។ ចំណាយថវិកាជាង ២ពាន់លានដុល្លារ តែចេញទៅវិញទុកឱ្យខ្មែរនៅតែបែកបាក់ច្រើនបក្ខច្រើនពួក ជាពិសេសខ្មែរក្រហម នៅតែបន្តប្រឆាំងនឹងរាជរដ្ឋាភិបាល។ សម្តេចតេជោ ហ៊ុន សែន បានថ្លែងថា តែការបែកបាក់នេះ ត្រូវបានបង្រួបបង្រួមទាំងស្រុង តាមរយៈនយោបាយឈ្នះ-ឈ្នះរបស់សម្តេច ដែលបានដាក់ចេញនៅឆ្នាំ១៩៩៦។
-សម្តេចតេជោ ហ៊ុន សែន បានថ្លែងថា ពេលប្រជាពលរដ្ឋមានទុក្ខ គឺមានមុខសម្តេចតេជោ ហ៊ុន សែន និងគណបក្សប្រជាជនជានិច្ច។
-សម្តេចតេជោ ហ៊ុន សែន បានថ្លែងថា សម្តេចចូលរួមតស៊ូដណ្តើមអំណាចថ្វាយសម្តេច នរោត្តម សីហនុ តែអាពត បានប្លន់អំណាច។
-សម្តេចតេជោ ហ៊ុន សែន បានថ្លែងថា ខ្លឹមសារកិច្ចព្រមព្រៀងសន្តិភាពទីក្រុងប៉ារីស ត្រូវបានបញ្ចូលក្នុងរដ្ឋធម្មនុញ្ញរបស់កម្ពុជាអស់ហើយ។
-សម្តេចតេជោ ហ៊ុន សែន ចោទសួរអ្នកស៊ីកេរកិច្ចព្រមព្រៀងទីក្រុងប៉ារីសថា តើកិច្ចព្រមព្រៀងទីក្រុងប៉ារីស មានចែងពីការកាត់ទោសខ្មែរក្រហមទេ?
-សម្តេចតេជោ ហ៊ុន សែន បានថ្លែងថា អ្នកវិភាគដែលរត់ស្រាតខោពេលកើតមានកិច្ចព្រមព្រៀង កំពុងតាំងខ្លួនជាអ្នកចេះដឹង និងជំនាញលើកិច្ចព្រមព្រៀងប៉ារីស។
-សម្តេចតេជោ ហ៊ុន សែន បានថ្លែងថា អ្នកមិនចូលរួមចុះហត្ថលេខាលើកិច្ចព្រមព្រៀងទីក្រុងប៉ារីស បកស្រាយបានពិរោះលើសសម្តេចជាហត្ថលេខីទៅទៀត។
-សម្តេចតេជោ ហ៊ុន សែន បានថ្លែងថា នយោបាយឈ្នះ-ឈ្នះ បានធ្វើឱ្យកម្ពុជាបញ្ចប់សង្គ្រាម ដោយមិនចំណាយគ្រាប់កាំភ្លើង។
-សម្តេចតេជោ ហ៊ុន សែន បានថ្លែងអំណរគុណប្រជាពលរដ្ឋ ដែលបានបោះឆ្នោតគាំទ្រគណបក្សប្រជាជន ក្នុងព្រឹត្តិការណ៍បោះឆ្នោត ក្រុមប្រឹក្សាឃុំ/សង្កាត់នាពេលកន្លងទៅ។ សម្តេចតេជោ ហ៊ុន សែន រំពឹងថា ប្រជាពលរដ្ឋនៅតែបន្តបោះឆ្នោតគាំទ្រ គណបក្សប្រជាជនកម្ពុជានៅឆ្នាំ២០២៣៕
ដោយ៖ស តារា
