សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ មុខសញ្ញាជួញដូរ និងប្រើប្រាស់គ្រឿងញៀនម្នាក់ ត្រូវបានកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពត បង្រ្កាប និងឃាត់ខ្លួនក្នុងបទល្មេីសជាក់ស្តែង។ នេះបេីយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តកំពត បានឱ្យដឹងនៅព្រឹកថ្ងៃអង្គារទី០១ ខែវិច្ឆិកា ឆ្នាំ២០២២។
របាយការណ៍ដដែលបន្តថា ករណីឃាត់ខ្លួនជនសង្ស័យខាងលេីនេះ បានធ្វេីឡេីងនៅវេលាម៉ោង ៨និង៣០នាទីយប់ថ្ងៃទី៣១ ខែតុលា ឆ្នាំ២០២២ ស្ថិតនៅភូមិតព្រៃតាព្រិត ឃុំស្តេចគង់ខាងលិច ស្រុកបន្ទាយមាស ។
ជនសង្ស័យមានឈ្មោះ ស៊ុន ចាន់ដេត (ហៅតូយ) ភេទប្រុស អាយុ ៤០ ឆ្នាំ រស់នៅភូមិព្រៃតាព្រិត ឃុំស្តេចគង់ខាងលិចស្រុក បន្ទាយមាស ខេត្តកំពត ។
ប្រភពដដែលបន្តថា ដោយមានការយកចិត្តទុក ដាក់ ចង្អុលបង្ហាញ និងបញ្ជាយ៉ាងម៉ឺងម៉ាត់ពីលោក ឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត ក្នុងការបង្រ្កាបនូវរាល់បទល្មើសគ្រឿងញៀនគ្រប់ប្រភេទ នៅទូទាំងខេត្តកំពត កម្លាំងជំនាញផ្នែកប្រឆាំងគ្រឿងញៀន បានចុះស្រាវជ្រាវរហូតឈានដល់ការបង្រ្កាប និងឃាត់ខ្លួនបានមុខសញ្ញាគ្រឿងញៀនរូបនេះ ព្រមទាំងចាប់យកវត្ថុតាងរួមមាន៖ ថ្នាំញៀន០២កញ្ចប់, ទូរស័ព្ទ ដៃ១គ្រឿង និងជញ្ជីងសម្រាប់ថ្លឹងគ្រឿងញៀនចំនួន១។
បច្ចុប្បន្ន កម្លាំងសមត្ថកិច្ចកំពុងកសាងសំណុំរឿងជនសង្ស័យ និងវត្ថុតាងបញ្ជូនទៅតុលាការដើម្បីចាត់ការតាមនីតិវិធីច្បាប់៕
ដោយ៖សហការី
