សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន ៖ តាមរបាយការណ៍របស់មន្ត្រីនគរបាលជំនាញនៃអធិការដ្ឋាននគរបាលស្រុកសាលាក្រៅ បានឲ្យដឹងថា កាលពីវេលាម៉ោង ២២ និង៣០នាទី ថ្ងៃទី២ ខែវិច្ឆិកា ឆ្នាំ២០២២ មានករណីគ្រោះថ្នាក់ចរាចរណ៍មួយដោយបុរសពីរនាក់បើកបរម៉ូតូឌុបគ្នាក្នុងល្បឿនលឿនទិសដៅពីកើតទៅលិច។ លុះដល់កន្លែងកើតហេតុក៏ទៅបុកគោដើរឆ្លងផ្លូវបណ្ដាលឲ្យបុរសពីរនាក់ស្លាប់នៅនិងកន្លែងកើតហេតុនិងសត្វគោងាប់១ក្បាល )នៅចំណុចក្បែរ អាហារដ្ឋាន លាភហេង ស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
សមត្តកិច្ចនគរបាលចរាចរណ៍ស្រុកបានបន្តថា÷ ករណីនេះបណ្ដាលឱ្យមនុស្សស្លាប់ចំនួន០២នាក់ ពុំស្គាល់អត្តសញ្ញាណនោះទេ ងាប់សត្វគោចំនួន០១ ក្បាល និងខូចម៉ូតូ០១គ្រឿងធ្ងន់ ម៉ាកហុងដាឌ្រីមC125 ស៊េរីឆ្នាំ 2017 ពាក់ស្លាកលេខប៉ៃលិន 1C-8789 ។
ក្រោយពីសមត្ថកិច្ចនគរបាលជំនាញចរាចរណ៍ស្រុកពិនិត្យរួចសពត្រូវបានយកទៅរក្សាទុកនៅ វត្តព្រហ្មគិរីមរកតដើម្បីរង់ចាំសាច់ញាតិ ។ ឥឡូវសពម្នាក់ត្រូវបានសាច់ញាតិមកពីខេត្តពោធិ៍សាត់ ដឹកដាក់លើរថយន្តសង្គ្រោះរបស់មន្ទីរពេទ្យបង្អែកខេត្តប៉ៃលិន ដោយ លោក សៅ សារ៉ាត់ អ្នកតំណាងរាស្ត្រជួយ ឲ្យរថយន្តសង្គ្រោះដឹកដល់លំនៅដ្ឋាន។ ឯសពម្នាក់ទៀតនៅប៉ៃលិន។ ជាមួយនេះកម្លាំងជំនាញកំពុងស្រាវជ្រាវរកម្ចាស់គោមកដោះស្រាយតាមនីតិវិធីច្បាប់ ៕
ដោយ៖ ស សារ៉េត
