សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានជនសង្ស័យពីរនាក់ បានជិះម៉ូតូមួយគ្រឿងធ្វើសកម្មភាពឆក់យកកាបូបស្ពាយពីបុរសម្នាក់ដែលកំពុងបើករុឺម៉កដឹកផ្លែឈើមួយគ្រឿងតែមិនបានសម្រេច បណ្តាលឱ្យក្រឡាប់រុឺម៉កសង្កត់លើអ្នកបើកបររងរបួសបែក្បាល កាលពីវេលាម៉ោង១០និង៤០នាទីយប់ថ្ងៃទី ១ ខែធ្នូ ឆ្នាំ២០២២ នៅតាមបណ្តោយផ្លូវ ៣០ ម៉ែត្រ មុខបុរីជ័យជម្នះ ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
ជនរងគ្រោះមានឈ្មោះ យ៉េត ភេទប្រុស អាយុ៤០ឆ្នាំ មុខរបរដឹកផ្លែឈើលក់តាមរុឺម៉ក ស្នាក់នៅម្ដុំផែស្ងួតសូរងួន តាមមហាវិថីចោមចៅ ក្នុងខណ្ឌធោធិសែនជ័យ ។
បេីតាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញរុឺម៉កដឹកផ្លែឈើចំនួនពីរគ្រឿងធ្វើដំណើរតាមបណ្ដោយផ្លូវ៣០ម៉ែត្រពីជើងទៅត្បូងក្នុងល្បឿនលឿន លុះមកដល់ចំណុចកើតហេតុខាងលើ ក៏លេចមុខជនសង្ស័យចំនួនពីរនាក់ជិះម៉ូតូហុងដាស្គូពី ពណ៌សមួយគ្រឿងមិនចាំស្លាកលេខធ្វើដំណើរមកពីក្រោយ រួចបានធ្វើសកម្មភាពឆក់យកកាបូបស្ពាយពីអ្នកបើកបររុឺមកដឹកផ្លែឈើមួយគ្រឿងមិនបានសម្រេច បណ្ដាលឱ្យរុឺម៉កក្រឡាប់សង្កត់លើអ្នកបើកបររងរបួសបែកក្បាល ។ ឃើញដូច្នេះអ្នកបើករុឺម៉កដឹកផ្លែឈើមួយគ្រឿងទៀតដែលធ្វើដំណើរមកជាមួយគ្នាក៏បានជួយជនរងគ្រោះ រួចលើកដាក់លើរុឺម៉កដឹកយកទៅសង្គ្រោះនៅមន្ទីរពេទ្យឯកជនមួយកន្លែងនៅក្បែរកន្លែងកេីតហេតុ ចំណែកជនសង្ស័យបាននាំគ្នាជិះម៉ូតូគេចខ្លួនបាត់ស្រមោល។
ក្រោយកើតហេតុ សមត្ថកិច្ចមូលដ្ឋានបានចុះមកដល់ និងបានធ្វើការសួរនាំ ពិនិត្យនៅកន្លែងកើតហេតុ ព្រមទាំងមានសាច់ញាតិជនរងគ្រោះបានចុះមកដលកន្លែងកើតហេតុដែរ ។ បន្ទាប់មកសាច់ញាតិជនរងគ្រោះបានប្រាប់សមត្ថកិច្ចថា សុំយករុឺម៉កត្រឡប់ទៅផ្ទះវិញ ដោយមិនបានទៅដាក់ពាក្យបណ្ដឹងនៅប៉ុស្តិ៍នគរបាលនោះទេ៕
ដោយ ៖ ភារ៉ា ដង្កោ
