🔴បុរសម្នាក់ផ្ទុះអាវុធជាច្រើនគ្រាប់បណ្ដាលឱ្យរងរបួសមនុស្ស៤នាក់

ចែករំលែក៖

ភ្នំពេញ ៖ ក្មេងស្ទាវមួយក្រុមបានដេញវ៉ៃនិងកាប់បុរសពីរនាក់នៅចំណុចច្រមុះជ្រូកក្បាលថ្នល់ ខណៈនោះក៏មានបុរសម្នាក់ដែលអង្គុយហូបបាយនៅក្នុងហាងបាយក្បែរកន្លែងកេីតហេតុឃើញដូច្នេះក៏ចេញមកក្រៅដកកាំភ្លើងខ្លីបាញ់ឡើងលើចំនួនមួយគ្រាប់ដើម្បីបំបែកហ្វូងក្មេងស្ទាវ តែពួកក្មេងស្ទាវមិនខ្លាចក៏ស្ទុះចូលមកធ្វើឱ្យបុរសដែលមានកាំភ្លើងខ្លីបាញ់បន្ថែមជាច្រើនគ្រាប់ទៀតតម្រង់ទៅក្មេងស្ទាវទាំងនោះបណ្ដាលឱ្យរងរបួសចំនួន៤នាក់ រួចខ្មាន់កាំភ្លើងក៏ឡើងជិះរថយន្តព្រូសមិនចាំស្លាកលេខគេចខ្លួនបាត់ស្រមោលទៅ ។

ហេតុការណ៍ភ្ញាក់ផ្អេីលនេះបានកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី១២ ខែធ្នូ ឆ្នាំ២០២២ នៅចំណុចមុខហាងមួយកន្លែង ម្ដុំច្រមុះជ្រូកក្បាលថ្នល់ តាមបណ្ដោយផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យោងតាមសម្ដីជនរងគ្រោះបានប្រាប់ថា ដំបូងឡើយពួកគាត់ពីរនាក់មានទំនាស់ពាក្សសម្ដីជាមួយនឹងក្មេងស្ទាវមួយក្រុមជិះម៉ូតូចំនួន៣គ្រឿងមានគ្នាជាច្រើននាក់បានជិះម៉ូតូដេញគ្នាតាមបណ្ដោយផ្លូវលេខ២៧១ក្នុងទិសដៅពីលិចទៅកើត ខណៈមកដល់ចំណុចកើតហេតុពួកគាត់ក៏បានឈប់ម៉ូតូ ពេលនោះពួកក្មេងស្ទាវក៏ ចុះពីម៉ូតូហើយនាំគ្នាយកដុំថ្មគប់និងយកកាំបិតបុ័ងតោដេញកាប់ពួកគាត់ប្រសេក ប្រសាចពេញមុខហាងបាយ។

ជនរងគ្រោះបានបន្តថា ភ្លាមៗនោះក៏មានបុរសម្នាក់កំពុងតែហូបបាយនៅទីនោះបានដកកាំភ្លើងខ្លីបាញ់ឡើងលើមួយគ្រាប់ដើម្បីបំបែកក្រុមក្មេងស្ទាវ តែដោយសារតែក្មេងស្ទាវទាំងនោះមិនខ្លាចបានដើរចូលទៅរកបុរសដែលមានកាំភ្លើងបម្រុងនឹងកាប់ តែត្រូវបុរសដែលមានកាំភ្លើងនោះបាញ់តម្រង់ទៅរកក្មេងស្ទាវទាំងនោះបណ្ដាលឱ្យរងរបួសចំនួន៤នាក់ ហើយភ្លាមៗនោះបុរសដែលបាញ់បានឡើងជិះរថយន្តព្រូសមិនចាំស្លាកលេខគេចខ្លួនបាត់ស្រមោលទៅ។

ក្រោយមកសមត្ថកិច្ចកងរាជអាវុធហត្ថបានមកដល់កន្លែងកើតហេតុ ប្រមូលយកសំបកគ្រាប់និងស្រោមកាំភ្លើងព្រមទាំងយកបក្ខពួកក្មេងស្ទាវម្នាក់ទៅសួរនាំ ។ ចំណែកឯជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យ ៕