🔴ឃាត់ជនសង្ស័យជាឃាតក ចាក់សម្លាប់លើនារីជាសង្សារផ្តើមចេញពីការប្រចណ្ឌ

ខេត្តឧត្តរមានជ័យ៖ នៅរសៀលថ្ងៃទី២៣ ខែធ្នូ ឆ្នាំ២០២២ នេះ សមត្ថកិច្ចឃាត់ជនសង្ស័យដែលយកកាំបិតអារ.កនិងចាក់សម្លាប់លើនារីរងគ្រោះដែលត្រូវជាសង្សារបានហើយ។  ហេតុការណ៍នេះបានកើតឡើងនៅ វេលាម៉ោង ០៦និង៤០នាទីព្រឹកថ្ងៃទី២៣ ខែ ធ្នូ ឆ្នាំ២០២២ ស្ថិត នៅត្រង់ចំណុចក្នុងព្រៃកែងរួតចំប៉ី ស្ថិតក្នុងភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ។

លោកអនុសេនីយ៍ឯក អ៊ុជ ប៊ុនអ៊ុយ នាយប៉ុស្តិ៍សង្កាត់អូរស្មាច់ បានឲ្យដឹងថា មុនកើតហេតុជនសង្ស័យឈ្មោះ ជា និរន្តរ៍ ភេទប្រុស អាយុ ២៥ឆ្នាំ មានទីលំនៅភូមិអូរពក សង្កាត់កូនក្រៀល ក្រុងសំរោង ខេត្តឧត្តរមានជ័យ បានធ្វើសកម្មភាពយកកូនកាំបិតចុងស្រួចចាក់ទៅលើពោះ, បំពង់កនិងអារ.ក នារីរងគ្រោះឈ្មោះ ដុំ ស៊ីណេត ហៅ ទូង ភេទស្រី អាយុ ២០ឆ្នាំ មានទីលំនៅភូមិដូនកែន សង្កាត់សំរោង ក្រុងសំរោង ខេត្តឧត្តរមានជ័យ មុខរបរកម្មករអនាម័យក្រុមហ៊ុនអូរស្មាច់រីសត បណ្តាលឱ្យស្លាប់នៅ នឹងកន្លែងតែម្តង។

លោកនាយប៉ុស្តិ៍បានឱ្យដឹងថា ករណីឃាតកម្មនេះ ផ្តើមចេញពីការប្រចណ្ឌហើយជនសង្ស័យនិងជនរងគ្រោះត្រូវជាសង្សារនិងគ្នា ហើយទើបនឹងស្គាល់គ្នាបាន១ខែជាងប៉ុណ្ណោះ។

ក្រោយពេលធ្វើសកម្មភាពរួចជនសង្ស័យបានជិះម៉ូតូត្រឡប់ទៅដេកនៅផ្ទះធ្វើមិនដឹង។ លុះនៅថ្ងៃដដែលក្រោយពីមានការរាយការណ៍ពីប្រជាពលរដ្ឋឱ្យ ដឹងថា បានប្រទះឃើញសពស្ត្រីរងគ្រោះដេកស្លាប់និងដោយ មានការចង្អុលបង្ហាញពីលោកឧត្តមសេនីយ៍ទោ ហួត សុធី ស្នងការនគរបាលខេត្តបញ្ជាឱ្យកម្លាំងជំនាញសហការជាមួយអធិការនិងកម្លាំងប៉ុស្តិ៍ស្រាវជ្រាវឈានដល់ការឃាត់ខ្លួនជនសង្ស័យបានភ្លាមៗផងដែរ។

នៅរសៀលថ្ងៃទី២៣ ខែ ធ្នូ នេះជនសង្ស័យ រួមនិងវត្ថុតាងមានកាំបិតម៉ូតូ១គ្រឿង ដែលជិះធ្វើសកម្មភាពត្រូវបានកម្លាំងជំនាញ សហការជាមួយកម្លាំងអធិការក្រុងសំរោងនគរបាលប៉ុស្តិ៍រដ្ឋបាលអូរស្មាច់ឃាត់ខ្លួនដើម្បីសួរនាំ និងបញ្ជូនទៅស្នងការខេត្តកសាងសំណុំរឿងចាត់ការបន្តទៅតាមនីតិវិធីច្បាប់ ៕

ដោយ៖ សូរិយា