សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ ឈើប្រភេទលេខ១និងលេខ២ជាង១០ម៉ែត្រគូបត្រូវកម្លាំងរដ្ឋបាលព្រៃឈើសហការជាមួយកម្លាំងកងរាជអាវុធហត្ថធ្វើការបង្ក្រាបនិងយកមករក្សាទុក។
ការបង្ក្រាបនោះសមត្ថកិច្ចធ្វើឡើងនារសៀលថ្ងៃទី២៣ ខែធ្នូ ឆ្នាំ២០២២ត្រង់ចំណុចភ្នុំខៀវ ឃុំអូរកណ្ដៀរសែនជ័យ ស្រុកសំបូរ ខេត្តក្រចេះ។
លោក កែវ ចំណាន នាយសង្កាត់រដ្ឋបាលព្រៃឈើអូរគ្រៀងបានឱ្យដឹងថា ឈើទាំងនោះជាឈើអារលេខ១និងលេខ២ ប្រភេទស្រឡៅនិងត្រាច ។
ចំណែកម្ចាស់យើងពុំទាន់ស្គាល់អត្តសញ្ញាណនៅឡើយ ព្រោះក្រុមឈ្មួញយកមកលាក់ទុកក្នុងចម្ការកៅស៊ូ មិនមានអ្នកណាចេញមុខមកអះអាងថាជាឈើរបស់ខ្លួននោះទេ។
តាមប្រភពថា ឈើអារទាំងនោះត្រូវបានឈ្មួញដឹកជញ្ជូនតាមគោយន្តកន្ត្រៃចេញពីខេត្តស្ទឹងត្រែង នាវេលាយប់ដោយឆ្លងកាត់តាមផ្លូវជាតិលេខ៩ ទៅផ្លូវជាតិលេខ៧ ឆ្ពោះទៅផ្លូវបំបែកអូរពងមាន់និងឆ្លងកាត់គោលដៅចរាចរណ៍ប្រចាំការ២៤ម៉ោងលើ២៤ម៉ោងនោះផងដែរ។
ប្រភពដដែលបន្តថា ក្រោយការដឹកជញ្ជូនចេញពីខេត្តស្ទឹងត្រែងទៅដល់ចំណុចភ្នុំខៀវ គឺទៅទម្លាក់នៅចម្ការកៅស៊ូនិងមានរថយន្តសាំយ៉ុងចាំទទួលដឹកចេញទៅចែកចាយនៅដេប៉ូតាមគោលដៅទទួលទិញបន្ត។
ក្រោយបង្រ្កាបបានឈើទាំងនោះត្រូវបានកម្លាំងសមត្ថកិច្ចដឹកជញ្ជូនយកមករក្សាទុកនៅសង្កាត់រដ្ឋបាលព្រៃឈើអូរគ្រៀងទុកជាសម្បត្តិរដ្ឋតាមនីតិវិធីច្បាប់រដ្ឋបាលព្រៃឈើ៕
ដោយ ៖ ជីវ័ន្ត
