លោករដ្ឋមន្ត្រី លឹម គានហោ អញ្ជើញជាអធិបតីភាពក្នុងពិធីជួបសំណេះសំណាលជាមួយបេក្ខជនប្រលងសញ្ញាបត្រមធ្យមសិក្សាទុតិយភូមិឆ្នាំ ២០២១-២០២២ និងគណៈគ្រប់គ្រង លោកគ្រូ-អ្នកគ្រូថ្នាក់ទី ១២ សរុបចំនួន ៨៦២ នាក់

ចែករំលែក៖

ខេត្តកណ្តាល ៖ នៅព្រឹកថ្ងៃសុក្រ ៨កើត ខែបុស្ស ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី ៣០ ខែធ្នូ ឆ្នាំ ២០២២ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកពញាឮ រួមជាមួយ អស់លោក លោកស្រីក្រុមការងារ បានអញ្ជើញជាអធិបតីភាពក្នុងពិធីជួបសំណេះសំណាលជាមួយបេក្ខជនប្រលងសញ្ញាបត្រមធ្យមសិក្សាទុតិយភូមិឆ្នាំ ២០២១-២០២២ និងគណៈគ្រប់គ្រង លោកគ្រូ-អ្នកគ្រូថ្នាក់ទី ១២ សរុបចំនួន ៨៦២ នាក់ ។

មានមតិសំណេះសំណាលនាឱកាសនេះ លោករដ្ឋមន្រ្តី ក្នុងនាមប្រធានក្រុមការងាររាជរដ្ឋាភិបាលចុះមូលដ្ឋានស្រុកពញាឮ បានសំដែងនូវការអបអរសាទរចំពោះក្មួយៗទាំងអស់ ដែលបានខិតខំប្រឹងប្រែងរៀនសូត្ររហូតទទួលបានជោគជ័យជូនដល់គ្រួសារ និងសង្គមជាតិ ហើយក៏បានផ្តាំផ្ញើដល់ក្មួយៗដែលពុំបានប្រលងជាប់ ត្រូវធ្វើការសិក្សារៀនសូត្រឲ្យបានខ្លាំងក្លាបន្ថែមទៀត ដើម្បីទទួលបានជោគជ័យនៅឆ្នាំក្រោយទៀត ព្រោះក្មួយៗទាំងអស់ គឺជា ទំពាំងស្នងឬស្សីសម្រាប់ប្រទេសជាតិ និងជាធនធានមនុស្សដ៏សំខាន់នាថ្ងៃខាងមុខ ក្មួយៗមិនត្រឹមតែរៀនឲ្យបានតែជាប់ប៉ុណ្ណោះទេ ត្រូវរៀនឲ្យចេះសម្រាប់ខ្លួនឯង ហេីយក្មួយៗអាចមានឱកាសសិក្សា និងប្រលងជាប់នៅពេលនេះ ក៏ដោយសារប្រទេសយើងមានសន្តិភាព ដូចនេះយើងទាំងអស់គ្នា សូមអរគុណសន្តិភាព ។ ស្ថិតក្នុងបរិបទនៃការរីករាលដាលនៃជំងឺកូវីត-១៩ ជាសកល សូមក្មួយៗថែរក្សាសុខភាព និងសូមប្រកាន់ខ្ជាប់នូវវិធានការសុខាភិបាល ។

សូមជម្រាបជូនថា ក្នុងសម័យប្រលងសញ្ញាបត្រមធ្យមសិក្សាទុតិយភូមិ នាថ្ងៃទី ៥-៦ ខែធ្នូ ឆ្នាំ ២០២២ នេះ លោករដ្ឋមន្រ្តី និងក្រុមការងារក៏បានជួយឧបត្ថម្ភកន្លែងស្នាក់នៅ ការធ្វើដំណើរ និងការហូបចុកដល់បេក្ខជនទាំងអស់ ផងដែរ និងដើម្បីជាការលើកទឹកចិត្តដល់ក្មួយៗដែលទើបនឹងប្រលងជាប់ និងពុំបានប្រលងជាប់ គណៈគ្រប់គ្រង លោកគ្រូ-អ្នកគ្រូថ្នាក់ទី ១២ សរុបចំនួន ៨៦២ នាក់ លោករដ្ឋមន្រ្តី និងក្រុមការងាររាជរដ្ឋាភិបាលចុះមូលដ្ឋានស្រុកពញាឮ បានឧបត្ថម្ភដូចខាងក្រោម ៖

– និទ្ទេស A ចំនួន ០៣ នាក់ ម្នាក់ៗទទួលបានម៉ូតូ SCOPY-២០២៣ ចំនួន ០១ គ្រឿង

– និទ្ទេស B ចំនួន ៣៩ នាក់ ម្នាក់ៗទទួលបានថវិកាចំនួន ៤០០.០០០ រៀល

– និទ្ទេស C ចំនួន ១២៦ នាក់ ម្នាក់ៗទទួលបានថវិកាចំនួន ៣២០.០០០រៀល

– និទ្ទេស D ចំនួន ២២៦ នាក់ ម្នាក់ៗទទួលបានថវិកាចំនួន ២៤០.០០០ រៀល

– និទ្ទេស E ចំនួន ២៣១ នាក់ ម្នាក់ៗទទួលបានថវិកាចំនួន ១៦០.០០០ រៀល

– សិស្សប្រលងធ្លាក់ ចំនួន ១៤៤ នាក់ ម្នាក់ៗទទួលបានថវិកាចំនួន ៨០.០០០ រៀល

- គណៈគ្រប់គ្រង និងលោកគ្រូ អ្នកគ្រូ ថ្នាក់ទី ១២ ចំនួន ១១៤ នាក់ ម្នាក់ៗថវិកា ចំនួន ១០០.០០០ រៀល

– វិទ្យាល័យ ទេពប្រណម្យ ចំនួន ១.០០០.០០០ រៀល

– វិទ្យាល័យ ហ៊ុន សែន អូរកុង ចំនួន ១.០០០.០០០ រៀល

– វិទ្យាល័យ ហ៊ុន សែន កោះចិនចំនួន ១.០០០.០០០ រៀល

– វិទ្យាល័យ ហ៊ុន សែន ព្រះធម្មស្រះ ១.០០០.០០០ រៀល

– វិទ្យាល័យ ហ៊ុន សែន ព្រែកតាទែន ១.០០០.០០០ រៀល