សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ សមត្ថកិច្ចបានឃាត់ខ្លួនបុរសជាប្តីចិត្តមារម្នាក់បន្ទាប់ពីបានផ្ទុះអំពើហិង្សាកាលពីព្រលប់ថ្ងៃទី៨ ខែមករា ឆ្នាំ២០២៣ នៅត្រង់ចំណុចក្រុមទី១២ ក្នុងភូមិទួលព្រុំ២ ឃុំកកោះ ស្រុកមោងឫស្សី ខេត្តបាត់ដំបង។
ជនសង្ស័យឈ្មោះ ខុន សុខណា ភេទប្រុស អាយុ៣៨ឆ្នាំ មានស្រុកកំណើត នៅខេត្តព្រៃវែង បានមកស្នាក់នៅក្នុងមូលដ្ឋានស្រុកមោងឫស្សីបណ្តោះអាសន្ន។ នៅព្រលប់ថ្ងៃកើតហេតុជនសង្ស័យបានមកសុំរស់នៅជាមួយប្រពន្ធដូចធម្មតាវិញ ប៉ុន្តែជនរងគ្រោះ ឈ្មោះ ហួម ទីម ភេទស្រី អាយុ២៨ឆ្នាំ មិនព្រម ស្រាប់តែជនបង្កយកពូថៅវាយសំពងទៅលើអតីតប្រពន្ធផ្ទួនៗចំនួន ២ខ្នងពូថៅត្រូវត្រង់ក្បាលចំហៀងខាងស្តាំ បណ្ដាលឱ្យរងរបួសធ្ងន់ធ្ងរ ត្រូវក្រុមគ្រួសារ បញ្ជូនទៅកាន់មន្ទីរពេទ្យបង្អែកខេត្ត ហើយក៏ស្លាប់តែម្តងនៅវេលារំលងអធ្រាត្រថ្ងៃដដែល។
ករណីហិង្សានេះ អធិការដ្ឋាននគរបាលស្រុកមោងឫស្សី ក្រោយសាកសួរជនសង្ស័យរួចហើយបានបញ្ជូនសំណុំរឿងមកកាន់ការិយាល័យជំនាញ នៃស្នងការដ្ឋាននគរបាលខេត្ត ដើម្បីអនុវត្តតាមនីតិវិធីបន្ត៕
ដោយ៖ សូរិយា
