សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ យោងតាមប្រភពព័ត៌មានពីរដ្ឋបាលខេត្តកណ្ដាល នៅព្រឹកថ្ងៃព្រហស្បតិ៍ទី១២ ខែមករា ឆ្នាំ២០២៣នេះ បានឱ្យដឹងថា លោកបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្ដាល បានអញ្ជើញជាអធិបតីក្នុងកិច្ចប្រជុំសាមញ្ញក្រុមប្រឹក្សាខេត្ត លើកទី៤៤ អាណត្តិទី៣ របស់រដ្ឋបាលខេត្តកណ្ដាល កាលពីថ្ងៃទី១១ ខែមករាម្សិលមិញ ដែលពិធីនេះប្រារព្ធធ្វើឡើងនៅសាលាខេត្តកណ្ដាល។
នាឱកាសនោះ លោកបណ្ឌិត ម៉ៅ ភិរុណ បានកោតសរសើរ និងធ្វើការវាយតម្លៃចំពោះលទ្ធផលការងារសម្រេចបានក្នុងឆ្នាំ២០២២ កន្លងមក របស់រដ្ឋបាលខេត្តកណ្ដាល ពិសេសគណៈបញ្ជាការឯកភាពរដ្ឋបាលខេត្ត ដែលបានខិតខំរក្សាបាននូវ សន្តិសុខ សណ្ដាប់ធ្នាប់សាធារណៈ របៀបរៀបរយ ជូនដល់ថ្នាក់ដឹកនាំ និងប្រជាពលរដ្ឋ នៅក្នុងភូមិសាស្ត្រខេត្តកណ្ដាល ពិសេសបានខិតខំគៀងគររកនៅការវិនិយោគនានា មកវិនិយោគក្នុងភូមិសាស្ត្រខេត្តកណ្ដាលផងដែរ។
លោកបណ្ឌិត ម៉ៅ ភិរុណ បន្តថា ទន្ទឹមនឹងកិច្ចខិតខំប្រឹងប្រែងថែរក្សាសុខសន្តិភាព ជូនប្រជាពលរដ្ឋ និងថ្នាក់ដឹកនាំ និងការអភិវឌ្ឍន៍នានានៅក្នុងខេត្ត។ លោកបណ្ឌិត បានជំរុញឱ្យរដ្ឋបាលខេត្តកណ្ដាល ដោយត្រូវអនុវត្តតាមអនុសាសន៍របស់ប្រមុខថ្នាក់ដឹកនាំ ដោយត្រូវបន្តខិតខំប្រឹងប្រែងបន្ថែមទៀត ក្នុងការងារដោះស្រាយទំនាស់ដីធ្លីក្រៅប្រព័ន្ធតុលាការ ការផ្ដល់សេវាសាធារណៈជូនប្រជាពលរដ្ឋ ប្រកបដោយតម្លាភាព ប្រសិទ្ធភាព និងគណនីយភាព បន្តចេញប័ណកម្មសិទ្ធិជូនប្រជាពលរដ្ឋ និងការចុះបញ្ជីដីរដ្ឋផងដែរ។
លោក នូវប៉េង ច័ន្ទតារា អភិបាលរងខេត្តកណ្ដាល តំណាងលោកអភិបាលខេត្ត បានមានប្រសាសន៍ថា បានមានប្រសាសន៍ថា នៅក្នុងឆ្នាំ២០២២ រដ្ឋបាលខេត្តកណ្ដាល បានធ្វើការពិនិត្យ និងដោះស្រាយករណីដីធ្លីបានចំនួន ២៧៩ច្បាប់ និងបានដោះស្រាយបញ្ចប់បានចំនួន ១០៣ច្បាប់ អង្គភាពច្រកចេញចូលតែមួយរបស់រដ្ឋបាលខេត្តកណ្ដាល បានផ្ដល់សេវាជូនប្រជាពលរដ្ឋសរុបចំនួន ៣៩ ៧៣៧ សេវា មានគម្រោងស្នើសុំវិនិយោគបង្កើតរោងចក្រ សរុបចំនួន ២៦ គម្រោង ដែលក្នុងនោះរួមមានរោងចក្រផលិត និងផ្គុំដំឡើងបន្ទះសូឡា រោងចក្រកាត់ដេរសម្លៀកបំពាក់ រោងចក្រផលិតថង់ប្លាស្ទិក រោងចក្រផលិតស្បែកជើង រោងចក្រផលិតខ្សែនីឡុង និងរោងចក្រផ្សេងៗទៀតផងដែរ៕
ដោយ៖សហការី
