សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃ កម្ពុជា ថ្លែងថា គោលដៅ ប្រមូលសិស្សក្រីក្រមិនបានបន្តការសិក្សាអប់រំឲ្យទទួលបានការបណ្ដុះបណ្ដាលជំនាញវិជ្ជាជីវៈក្នុង១ឆ្នាំយ៉ាងហោច ១លាន៥សែននាក់។ ដូច្នេះបើរាជរដ្ឋាភិបាល ដោះស្រាយក្នុង ១លាន ៥សែននាក់ នឹងធ្វើឲ្យសេដ្ឋកិច្ចក្រៅប្រព័ន្ធធ្វើសមាហរណកម្មជាមួយសេដ្ឋកិច្ចខាងក្នុង។
សម្តេចតេជោ ហ៊ុន សែន ៖ បើគ្មានធនធានមនុស្ស គឺយើងមិនអាចធ្វើអ្វីបាននោះទេ យើងត្រូវបង្កើនធនធានមនុស្ស ដើម្បីឆ្លើយតបនឹងការអភិវឌ្ឍ។
សម្តេចតេជោ ហ៊ុន សែន ថ្លែងបែបនេះ នៅព្រឹកថ្ងៃទី២៣ ខែមករា ឆ្នាំ២០២៣ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់ ដែលរៀបចំឡើងនៅ មជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ OCIC រាជធានីភ្នំពេញ។
សម្ដេចតេជោ ហ៊ុន សែន ថ្លែងបន្តថា រាជរដ្ឋាភិបាល គ្រោងនឹងអនុវត្ដន៍គោលនយោបាយថ្មីមួយគឺផ្ដោតលើការបណ្ដុះបណ្ដាលជំនាញបច្ចេកទេសវិជ្ជាជីវៈដល់យុវជនក្រីក្រ ដោយឥតគិតថ្លៃ ហើយថែមនឹងផ្ដល់ប្រាក់ខែអោយថែមទៀត យ៉ាងយូរអនុវត្តនៅដើមឆ្នាំក្រោយ។
សម្តេចតេជោ ហ៊ុន សែន ៖ យើងបានធ្វើដំណើើរពីការលំបាករបស់យើងដែលចេញពីដំណាក់កាលអ្នកចេះច្រើនបង្រៀនអ្នកចេះតិចរហូតមក មានការរៀបចំគិតគូរបានយ៉ាងច្បាស់លាស់លើវិស័យអបរំ ៕
ដោយ ៖ សិលា
