អ្នកឈ្នះរង្វាន់ណូបែលសន្តិភាពឆ្នាំ២០២២ ត្រូវបានកាត់ទោសឱ្យជាប់គុក១០ឆ្នាំនៅក្នុងប្រទេសបេឡារុស្ស

ចែករំលែក៖

ម្ចាស់លាភីពានរង្វាន់ណូបែលសន្តិភាព លោក Ales Bialiatski ត្រូវបានកាត់ទោសឱ្យជាប់ពន្ធនាគាររយៈពេល១០ឆ្នាំ បន្ទាប់ពីអាជ្ញាធរបេឡារុស្សបានផ្តន្ទាទោសគាត់ពីបទឧបត្ថម្ភការធ្វើបាតុកម្មនៅក្នុងប្រទេស។
លោក Bialiatski អាយុ 60 ឆ្នាំបានទទួលរង្វាន់ណូបែលកាលពីខែតុលាឆ្នាំមុន។ គាត់គឺជាសហស្ថាបនិកនៃអង្គការសិទ្ធិមនុស្ស Viasna ហើយត្រូវបានចាប់ខ្លួននៅឆ្នាំ 2021 រួមជាមួយនឹងបក្ខពួកបីនាក់ដែលត្រូវបានចោទប្រកាន់ពីបទធ្វើបាតុកម្មផ្តល់មូលនិធិនិងរត់ពន្ធលុយ។
ទីភ្នាក់ងារព័ត៌មានរដ្ឋ Belta របស់ប្រទេសបេឡារុស បានបញ្ជាក់ថា តុលាការបានកាត់ទោសដាក់ពន្ធនាគាររយៈពេលវែងដល់ជនសង្ស័យទាំងអស់ ។ Bialiatski បានបដិសេធការចោទប្រកាន់លើរូបលោកដោយនិយាយថា ពួកគេមានហេតុផលនយោបាយ។
មេបក្សប្រឆាំងនិរទេសខ្លួនលោក Sviatlana Tsikhanouskaya បាននិយាយថា លោក Bialiatski និងសកម្មជនបីនាក់ផ្សេងទៀត ត្រូវបានកាត់ទោសខុស។ បុរសបីនាក់ផ្សេងទៀតដែលត្រូវបានកាត់ទោសគឺ Valentin Stefanovich កាត់ទោសឱ្យជាប់គុក 9 ឆ្នាំ Vladimir Labkovich – 7 ឆ្នាំនិង Dmitry Solovyov – ជាប់គុក 8 ឆ្នាំ។
រដ្ឋមន្ត្រីការបរទេសអាមេរិក លោក Antony Blinken ដែលអំពាវនាវឱ្យមានការដោះលែងអ្នកដែលត្រូវបានកាត់ទោសជាបន្ទាន់ បានពិពណ៌នាសេចក្តីសម្រេចរបស់តុលាការថាជា “ការបោកប្រាស់” និង “ការប៉ុនប៉ងដើម្បីគាបសង្កត់លទ្ធិប្រជាធិបតេយ្យ និងសិទ្ធិមនុស្សនៅក្នុងប្រទេសបេឡារុស្ស”។
លោក Josep Borrell ប្រធានគោលនយោបាយការបរទេសរបស់សហភាពអឺរ៉ុប និងរដ្ឋមន្ត្រីការបរទេសអាល្លឺម៉ង់ Annalena Baerbock ក៏បានជំទាស់នឹងលទ្ធផលនៃការកាត់ក្តីនេះ។ លោក Berit Reiss-Andersen ប្រធានគណៈកម្មាធិការណូបែលន័រវេសបានហៅការកាត់ទោសរបស់លោក Bialiatski ថាជា “សោកនាដកម្ម” ដែលមានលក្ខណៈនយោបាយ។
លោកស្រី Ravina Shamdasani អ្នកនាំពាក្យរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានប្រាប់សន្និសីទខ្លីមួយនៅទីក្រុងហ្សឺណែវថា ពួកគេព្រួយបារម្ភដោយ “កង្វះដំណើរការត្រឹមត្រូវ និងការទទួលបានប្រព័ន្ធតុលាការឯករាជ្យនៅក្នុងប្រទេសបេឡារុស្ស”៕ ដោយ៖ ធីរីណា