សំរាមគរពេញទីក្រុង ចរាចរណ៍ត្រូវរំខានដោយសារបាតុកម្មទ្រង់ទ្រាយធំនៅបារាំង

ចែករំលែក៖

ថ្ងៃនេះ (ថ្ងៃទី ៩ ខែមីនា) នៅប្រទេសបារាំង ចរាចរណ៍ផ្លូវដែក ផ្លូវថ្នល់ និងផ្លូវអាកាសនៅតែបន្តរំខាន ដោយមានគំនរសំរាមជាច្រើននៅទីក្រុងប៉ារីស ខណៈដែលបាតុកម្មប្រឆាំងនឹងផែនការកំណែទម្រង់ប្រាក់សោធននិវត្តន៍របស់ប្រធានាធិបតី Emmanuel Macron បានឈានចូលដល់ថ្ងៃទីបីជាប់ៗគ្នា។
យោងតាមទីភ្នាក់ងារសារព័ត៌មានរ៉យទ័រ ការស្ទង់មតិបង្ហាញថា អ្នកបោះឆ្នោតភាគច្រើនជំទាស់នឹងផែនការដំឡើងអាយុចូលនិវត្តន៍ពីឆ្នាំ៦២ ទៅ ៦៤ឆ្នាំ។ និយោជិតក៏ត្រូវបានតម្រូវឱ្យធ្វើការរយៈពេល ៤៣ឆ្នាំដើម្បីទទួលបានប្រាក់សោធនពេញលេញ។ ទោះបីជាយ៉ាងណាក៏ដោយ រដ្ឋាភិបាលបារាំងបាននិយាយថា ការផ្លាស់ប្តូរគោលនយោបាយគឺចាំបាច់ដើម្បីធានាប្រព័ន្ធផ្គត់ផ្គង់។
កម្មករក្នុងវិស័យមួយចំនួន រួមទាំងការចម្រាញ់ប្រេងនិងផ្លូវរថភ្លើង គ្រោងនឹងបន្តធ្វើបាតុកម្មរបស់ពួកគេពេញមួយសប្តាហ៍ បន្ទាប់ពីមនុស្សជាច្រើនជាចំនួនកំណត់ត្រាបានដើរតាមផ្លូវនៅថ្ងៃទី៧ មីនា ដែលជាផ្នែកនៃបាតុកម្មនៃថ្ងៃសកម្មភាពទូទាំងប្រទេស។ យោងតាម France24 បាតុករសរុបចំនួន 1.28 លាននាក់បានដើរដង្ហែឆ្លងកាត់ទីក្រុង និងទីប្រជុំជននានារបស់បារាំង។
ឥឡូវនេះគឺជាពេលវេលាដ៏សំខាន់សម្រាប់ទាំងសហជីពនិងរដ្ឋាភិបាល ខណៈដែលប្រធានាធិបតី Macron សង្ឃឹមថា សភានឹងអនុម័តច្បាប់សោធននិវត្តន៍ថ្មីនៅខែមេសា ខណៈដែលសហជីពចង់ឱ្យរដ្ឋាភិបាលដកផែនការកំណែទម្រង់របស់ខ្លួន។ កាលបរិច្ឆេទនៃការធ្វើកូដកម្មនិងបាតុកម្មទូទាំងប្រទេសត្រូវបានកំណត់សម្រាប់ថ្ងៃសៅរ៍បន្ទាប់។
កម្មកររបស់ក្រុមហ៊ុន Total Energies (TTEF.PA) បានបោះឆ្នោតបញ្ឈប់ការផលិតនៅរោងចក្រចម្រាញ់ប្រេង Feyzin ជិតទីក្រុង Lyon ។ កន្លងមក កម្មករបានបិទការនាំចេញតែក្នុងតំបន់នេះប៉ុណ្ណោះ។ សាខាមួយចំនួននៃ CGT – សហជីពធំជាងគេទី ២ នៅប្រទេសបារាំង និងសហជីពតូចៗជាង FO បានបន្តអូសបន្លាយកូដកម្មបាតុដែលបានផ្ទុះឡើងនៅដើមសប្តាហ៍។
រដ្ឋមន្ត្រីដឹកជញ្ជូនបារាំងលោក Clement Beaune បាននិយាយថា ចរាចរណ៍ផ្លូវអាកាសនឹងបន្តរងផលប៉ះពាល់នៅថ្ងៃនេះ និងថ្ងៃស្អែក ដោយជើងហោះហើរ ១/៥ នៅអាកាសយានដ្ឋានសំខាន់របស់ទីក្រុងប៉ារីស Charles de Gaulle និងជើងហោះហើរ 1/3 នៅអាកាសយានដ្ឋាន Orly ត្រូវបានលុបចោល៕ ដោយ៖ ធីរីណា