🔴ជនសង្ស័យ០៣នាក់​ ពាក់ព័ន្ធករណីឃាតកម្ម (ប្រេីដុំថ្មគប់អ្នកជិះម៉ូតូតាមផ្លូវ​បណ្ដាលឱ្យមនុស្សស្លាប់​ )​ ត្រូវនគរបាលខេត្តតាកែវ​ ឃាត់ខ្លួនបានហេីយ

ខេត្តតាកែវ​ ៖​ យោងតាមផេកផ្លូវការរបស់ស្នងការដ្ឋាននគរបាលខេត្តតាកែវ​ បានឱ្យដឹងនៅព្រឹកថ្ងៃទី១១​ ខែមីនា​ ឆ្នាំ​២០២៣នេះ​ កម្លាំងអធិការដ្ឋាននគរបាលស្រុកត្រាំកក់ នៃស្នងការដ្ឋាននគរបាលខេត្តតាកែវ​ បានធ្វើការស្រាវជ្រាវឃាត់ខ្លួនជនសង្ស័យបានចំនួន០៣នាក់ នៅវេលាម៉ោង ០៩​៖​០០ នាទី ថ្ងៃសុក្រ ទី១០ ខែមីនា ឆ្នាំ២០២៣ម្សិលមិញ​ ពាក់ព័ន្ធករណីឃាតកម្ម ប្រព្រឹត្តកាលពីថ្ងៃទី២១ ខែមករាឆ្នាំ ២០២៣ វេលាម៉ោង០២ រំលងអធ្រាត្រ នៅលើផ្លូវជាតិលេខ ៣ ចន្លោះគីឡូម៉ែត្រ៦៧-៦៨ ស្ថិតក្នុងភូមិស្រង៉ែ ឃុំឧត្តមសូរិយា ស្រុកត្រាំកក់ បង្កឡើងដោយជនសង្ស័យមួយក្រុមមានគ្នាចំនួន០៥នាក់ជិះម៉ូតូ០២ គ្រឿង(ម៉ាកឌ្រីមសង់សេ125 មួយគ្រឿងនិងម៉ាក អុិចសុិនទ័រមួយគ្រឿង) បានធ្វើសកម្មភាពយកដុំថ្មគប់ទៅលើជនរងគ្រោះឈ្មោះ គង់ ចំរើន ភេទប្រុស អាយុ ២០ឆ្នាំនៅភូមិស្រង៉ែ ឃុំឧត្តមសូរិយា ស្រុកត្រាំកក់ ខណៈដែលកំពុងបើកម៉ូតូឌុបគ្នាជាមួយឈ្មោះ គឺ ជា ភេទប្រុស អាយុ ២៧ ឆ្នាំ ទីលំនៅភូមិស្រង៉ែ ឃុំឧត្តមសូរិយា ស្រុកត្រាំកក់ បណ្ដាលឲ្យត្រូវមួយដុំថ្មចំទ្រូងរងរបួសធ្ងន់ដួលធ្លាក់ពីលើម៉ូតូ ត្រូវបានមិត្តភក្កិនិងក្រុមគ្រួសារដឹកយកទៅសង្គ្រោះនៅមន្ទីរពេទ្យក្រុងដូនកែវ តែជាអកុសលជនរងគ្រោះបានស្លាប់ក្រោយពីដឹកដល់មន្ទីរពេទ្យ។

    បន្ទាប់ពីទទួលបានព័ត៌មានភ្លាម លោកឧត្តមសេនីយ៍ទោ  ឈាង ផាន់ណារ៉ា ស្នងការនគរបាលខេត្ត បញ្ជាកម្លាំងជំនាញស្នងការដ្ឋាន សហការជាមួយកម្លាំងអធិការដ្ឋានពាក់ព័ន្ធសហការស្រាវជ្រាវ រហូតឃាត់ខ្លួន  ជនសង្ស័យ០៣នាក់ ក្នុងចំណោមបក្ខពួក០៥នាក់រួមមាន ៖

ទី១.ឈ្មោះ ប្រាក់ វិដន ភេទប្រុស អាយុ ១៧ឆ្នាំ នៅភូមិត្រពាំងវែង ឃុំបឹងត្រាញ់ខាងត្បូង ស្រុកសំរោង ខេត្តតាកែវ ។

ទី២.ឈ្មោះ គូ កក្កដា ហៅកាក់ ភេទប្រុស អាយុ២៤ឆ្នាំ រស់នៅភូមិត្រពាំងវែង ឃុំបឹងត្រាញ់ខាងត្បូង ស្រុកសំរោង ខេត្តតាកែវ ។

ទី៣.ឈ្មោះ ហុឹម ប៊ុននី ហៅនុយ ភេទប្រុសអាយុ ១៩ឆ្នាំនៅភូមិពេជ្រចង្វា ឃុំបឹងត្រាញខាងត្បូង ស្រុកសំរោង ខេត្តតាកែវ ព្រមទាំងដកហូតវត្ថុតាងម៉ូតូម៉ាកអុិចសុិនទ័រពណ៌ខ្មៅគ្មានផ្លាកលេខចំនួន ១គ្រឿង។ 

ចំណែកជនសង្ស័យ០២នាក់ទៀត ដែលកំពុងគេចខ្លួន កម្លាំងជំនាញបានកំណត់អត្តសញ្ញាណរួច មានទី១ឈ្មោះ សេង រ៉ានុត ភេទប្រុស អាយុ២៩ឆ្នាំនៅភូមិត្រពាំងវែង ឃុំបឹងត្រាញខាងត្បូង ស្រុកសំរោង និងទី២ឈ្មោះ ប្រាក់ ប្រុសពៅហៅស៊ុត ភេទប្រុស អាយុ ២១ឆ្នាំ នៅភូមិត្រពាំងវែង ឃុំបឹងត្រែងខាងត្បូង ស្រុកសំរោង។

    បច្ចុប្បន្ននេះ ជនសង្ស័យខាងលើ កម្លាំងជំនាញកំពុងធ្វើការសាកសួរ ដើម្បីកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធី ច្បាប់ និងបន្តស្វែងរកចាប់ខ្លួនបក្ខពួកដែលរត់គេចខ្លួនយកមកផ្តន្ទាទោសតាមច្បាប់​ ៕​

ដោយ​ ៖​ ភារ៉ា​ ដង្កោ