ឈុតដែល នី មុនីនាថ ស្លៀករងការរិះគន់ថាចម្លងពីថៃ នោះត្រូវអ្នករចនាម៉ូតល្បីឈ្មោះបញ្ជាក់ហើយថាដកស្រង់ចេញពីគំនូរក្នុងព្រះបរមរាជវាំង

ភ្នំពេញ៖ វីដេអូ និងរូបថតនៃការតុបតែងខ្លួនបែបប្លែករបស់តារាសម្តែង នី មុនីនាថ មុននេះបានបញ្ចេញដោយនាងបានតុបតែងខ្លួនក្នុងទម្រង់បុរាណប្លែក។  ទម្រង់នៃសម្លៀកបំពាក់ គ្រឿងអលង្ការក៏ប្រណីតស្អាតប្លែក ពិសេសគឺការតុបតែងមុខបែបស ចិញ្ចើមតូចឆ្មា ខណៈដែលសក់ក៏ត្រូវបានកោរចេញផងដែររហូតមានអ្នកខ្លះលើកឡើងថា វាត្រូវបានចម្លងចេញពីទម្រង់ការស្លៀកពាក់តុបតែងខ្លួនបែបថៃទៅវិញ ខណៈដែលអ្នកច្នៃម៉ូតថា មានភស្តុតាងបញ្ជាក់ថាដកស្រង់ចេញពីគំនូរក្នុងរាជវាំងខ្មែរ។ 

  តាមការបញ្ជាក់របស់អ្នកច្នៃម៉ូតបានលើកឡើងថា ឈុតនេះមានឈ្មោះថា នារីគំនូរបុរាណ  ដែលរៀបចំតុបតែងដំឡើងដោយអ្នកជំនាញឈុតតំណាងជាតិល្បីឈ្មោះរហ័សនាម ស្ករគ្រាប់ ដែលកន្លងទៅលោកធ្លាប់ទាំងបានបញ្ចេញឈុតប្រណីតច្នៃជាច្រើនគួរឲ្យចាប់អារម្មណ៍ខណៈដែលឈុតជាច្រើនធ្លាប់បានលេចមុខលើឆាកអន្តរជាតិ និងទទួលបានពានរង្វាន់ជ័យលាភីពីឆាកអន្តរជាតិផងដែរ។ លោកបានបញ្ជាក់មុននេះនៅលើបណ្តាញសង្គមថា ឈុតដកស្រង់ចេញពីគំនូរបុរាណ  ដែលស្ថិតនៅលើជញ្ជាំងវត្ត ព្រះ កែវ មរកត  នៃព្រះ បរមរាជវាំង  ដោយប្រើប្រាស់គ្រឿងទាំងស្រុងនៃរូបគំនូរ ។ ផាត់មុខបុរាណ  លាបខ្លួនសរ  និង  ប្រើប្រាស់តិចនិច  បិតសក់ឱ្យដូចកោជុកតាមបែបបុរាណ ….។ បើទោះបីជាមានការបញ្ជាក់បែបនេះក្តីក៏ រូបភាព និងវីដេអូនេះ បានធ្វើឲ្យអ្នកលេងបណ្តាញសង្គមមួយចំនួនចេញមុខរិះគន់ព្រោះតែពួកគេលើកឡើងថាការតុបតែងខ្លួនបែបនេះត្រូវបានចម្លងចេញពីប្រទេសជិតខាងគឺប្រទេសថៃ ដែលកន្លងមកធ្លាប់លេចចេញភាពចម្រូងចម្រាស នឹងកម្ពុជារឿងសិល្បៈវប្បធម៌នោះ។ អ្នករិះគន់ម្នាក់លើកឡើងថា”ថៃកំពុងដៀល មើលៗគេសើចអាយះមាត់ហើយ”។ មិនស្ងាត់ឡើយតបទៅនឹងការរិះគន់នេះដែរ អ្នករចនាម៉ូតឈុតតំណាងជាតិ រហ័សនាម ស្ករគ្រាប់បានលើកឡើងនូវសារបែបចាក់ដោតទាំងនេះតបត្រឡប់ទៅវិញថា៖ ”ខ្ញុំអត់ដែរចេញតប  comments ទេ  តែរាងហួសចិត្តតិច  ខ្ញុំក៏ចង់បានជាយោបល់ពីអ្នកទាំងអស់គ្នាមកវិញ ថាខ្ញុំគួតែពាំនាំនូវអ្វីជាច្រើនទៀតដែលខ្ញុំបានរកឃេីញមកបង្ហាញទៀតដែរឬទេ  ? អោយខ្ញុំមេីលៗទៅលេីអីគេវិញ  ? ត្រូវមេីលកន្លែងណា  ឬមួយអោយខ្ញុំទៅចាំយាមគេមិនអោយpostមិនអោយនិយាយអ្វី  ? ឬខ្ញុំត្រូវមេីលត្រឡប់មកខ្លួនឯងវិញថា  ខ្លួនឯងពាំនាំមកនេះវាខុស  ? សើច  ? សេីចអាយះមាត់  ?    ហេតុអ្វីខ្ញុំត្រូវខ្លាចចិត្តពួកគេ  ? ខ្ញុំធ្វេីតាមបែបផែនខ្មែរ  គំនូរដែលខ្ញុំដាក់ចុង  video ក៏ខ្ញុំថតចេញពីវាំងខ្មែរ  ហេីយថតផ្ទាល់ដៃ  ! ខ្ញុំខុសគេ  គេកាន់តែ ដាក់  stickers សើចកាន់តែច្រេីននោះគឺខ្ញុំជោគជ័យទៅលើឈុតនោះ កាន់តែច្រេី ន  ព្រោះយេីងអាចធ្វេីបាន  ទោះវាមិនល្អ  ឥតខ្ចោះតែក៏គួរសម ! ហេតុអ្វី ? អ្នកគ្រប់គ្នាអាចប្រាប់ខ្ញុំបានទេថាហេតុអ្វីខ្ញុំត្រូវ????? ខ្លាច  ទាំងដែលឈុតទាំងមូលខ្ញុំមិនបានឆ្នៃតែយកលំនាំដេីមសឹងទាំងអស់  សូម្បីតែពណ៌ស្បៃពណ៌សំពត់”។ 

  បន្ថែមពីលើនេះអ្នកជំនាញរូបនេះបានបញ្ជាក់ប្រាប់ ដែរថាលោកមានអំណះអំណាងត្រឹមត្រូវថាឈុតនេះគឺកើតឡើងដោយកូនខ្មែរ និងក្រោមការរៀបចំដោយប្រុងប្រយ័ត្នខ្ពស់ផងដែរ៕

ដោយ ៖ វឌ្ឍនា