សារព័ត៌មាន នគរវត្ត តែងតែនាំមុខគេជានិច្ច
ក្រុមមេឃខៀវ Manchester City នឹងស្វាគមន៍ក្រុមភ្ញៀវ RB Leipzig ទៅកាន់កីឡដ្ឋាន Etihad នៅរាត្រីថ្ងៃអង្គារនេះជាមួយនឹងការប្រកួត UEFA Champions League វគ្គ១៦ក្រុមចុងក្រោយ ជើងទី២ ដោយបានត្រៀមរួចរាល់បន្ទាប់ពីការប្រកួតបើកឆាកដើម្បីប្រជែងយកកៅអីទៅកាន់វគ្គ៨ក្រុមចុងក្រោយ។
ក្នុងជំនួបជើងទី១រវាង Manchester City និង Leipzig នៅកីឡដ្ឋាន Red Bull Arena កាលពីថ្ងៃទី២២ ខែកុម្ភៈ បានបញ្ចប់ក្នុងលទ្ធផលស្មើ ១-១។ ១គ្រាប់របស់ Riyad Mahrez បានជួយឲ្យ Man City នាំមុខនៅនាទីទី២៧ ខណៈ១គ្រាប់របស់ Josko Gvardiol បានជួយឱ្យ Leipzig តាមស្មើនៅនាទីទី៧០។
ក្រុម Manchester City មានខ្សែប្រយុទ្ធឆ្នើម Erling Haaland ក្នុងការប្រកួត Champions League។ ខ្សែប្រយុទ្ធរូបនេះស៊ុតបញ្ចូលទីបានចំនួន៥គ្រាប់ ដែលត្រូវបានជាប់ចំណាត់ថ្នាក់លេខ៥ខ្ពស់បំផុតក្នុងការប្រកួតក្នុងរដូវកាលឆ្នាំ២០២២–២០២៣ ដែល២គ្រាប់គឺជាគ្រាប់សំខាន់ដំបូងនៃការប្រកួត។ ចំណែកកីឡាករ André Silva និង Christopher Nkunku គឺជាកីឡាករឆ្នើមបំផុតរបស់ RB Leipzig ក្នុងយុទ្ធនាការ Champions League នេះដោយម្នាក់ៗស៊ុតបញ្ចូលទីបាន៣គ្រាប់។
ក្រុមភ្ញៀវ RB Leipzig បានស៊ុតបាល់បញ្ចូលទីក្នុងការប្រកួត Champions League ៥លើកជាប់គ្នាក្នុងរដូវកាលនេះ។ ពួកគេមិនដែលបរាជ័យទេ ចាប់តាំងពីចាញ់ក្នុងវគ្គចែកពូលទល់នឹងក្រុម Real Madrid។
ចំណែកក្នុងការប្រកួត Champions League ៣លើកនៅផ្ទះក្នុងរដូវកាលនេះ Manchester City ទទួលបាន៩ពិន្ទុជាមួយនឹងការស៊ុតបញ្ចូលទី១០គ្រាប់ និងរបូត២គ្រាប់។ Man City នឹងត្រូវឈ្នះប្រកួតមិនស្គាល់ចាញ់ក្នុងផ្ទះចំនួន៨ប្រកួតក្នុងគ្រប់ការប្រកួតទាំងអស់ប្រសិនបើឈ្នះក្នុងជើងទី២នេះ។ រីឯ Leipzig មានកំណត់ត្រាឈ្នះក្រៅដីដ៏ល្អមួយក្នុងការប្រកួតនៅរដូវកាលនេះ ដោយឈ្នះ២លើក និងចាញ់តែមួយប្រកួតក្នុងការប្រកួតក្រៅផ្ទះ។
ក្នុងការប្រកួត៦លើកចុងក្រោយរបស់ពួកគេក្នុងការប្រកួតទាំងអស់ Manchester City ឈ្នះ៤ និងស្មើ២។ ពួកគេបានស៊ុតបាល់បញ្ចូលទី១២គ្រាប់ និងរបូត៣គ្រាប់។ ភាគច្រើននៃគ្រាប់បាល់របស់ពួកគេ (៧គ្រាប់) បានកើតឡើងនៅក្នុងតង់ទី១ ខណៈដែលគូប្រជែងរបស់ពួកគេមិនអាចរកគ្រាប់បាល់បាននៅក្នុង៤៥នាទីដំបូង។
ដោយឡែកក្រុម Leipzig ឈ្នះ៣ ស្មើ១ និងចាញ់២ក្នុង៦ប្រកួតក្រុមចុងក្រោយ។ ពួកគេបានស៊ុតបាល់បញ្ចូលទី១១គ្រាប់ និងរបួត៦គ្រាប់ ដោយរកបានគ្រាប់បាល់ក្នុងចំណោម៦ប្រកួតជាប់គ្នា។ ពួកគេរកបាន៤ គ្រាប់ក្នុងតង់ទី១។
ការប្រកួតជើងទី២នេះ ក្រុមមេឃខៀវ Man City មើលទៅអាចមានប្រៀបជាងគូប្រកួត ដោយសារការប្រកួតក្រៅទឹកដីគឺរកបាន១គ្រាប់ក្នុងលទ្ធផលស្មើគ្នា ហើយក្នុងការប្រកួតនេះគឺនឹងមានលទ្ធផលល្អសម្រាប់កៅអីវគ្គ៨ក្រុមចុងក្រោយរដូវកាលនេះ។
ការប្រកួតរវាងគូទាំង២នឹងត្រូវធ្វើឡើងនៅវេលាម៉ោង៣រំលងអធ្រាត្រម៉ោងនៅកម្ពុជា។ រហូតមកដល់ពេលនេះមានក្រុម៤ហើយដែលបានឡើងទៅកាន់វគ្គ៨ក្រុម ក្នុងនោះមានក្រុម Bayern Munich មកពីអាល្លឺម៉ង់, Chelsea មកពីអង់គ្លេស, Benfica មកពីព័រទុយហ្គាល់ និង AC Milan មកពីអុីតាលី ៕
ដោយ៖ ភារៈ(រូបភាព ៖ BBC Sport/soccerway.com)
