សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ដើមពង្រដែលមានទំហំ៣ឱបមានអាយុកាលជាង១០០ឆ្នាំរងគ្រោះដោយខ្យល់កន្ត្រាក់រលំត្រូវបានលើកបញ្ឈនិងដាំឡើងវិញនៅថ្ងៃទី២៦ ខែមីនា ឆ្នាំ២០២៣នៅបរិវេណវិទ្យាល័យថ្មពួក ឃុំថ្មពួក ស្រុកថ្មពួក ។
លោក លីវ គុណ មេឃុំថ្មពួកបានប្រាប់ថា៖ កាលពីយប់ថ្ងៃទី២៣ ខែមីនា ឆ្នាំ២០២៣នៅស្រុកថ្មពួកមានភ្លៀងលាយឡំដោយខ្យល់កន្ត្រាក់បណ្តាលប៉ះពាល់២ឃុំនិងខូចខាតផ្ទះសំបែងប្រជាពលរដ្ឋចំនួន១៩០ខ្នងមានអគារសាលារៀន៥ខ្នងត្រូវបានប៉ើងដំបូលនិងដើមឈើជាច្រើនដើមត្រូវបានដួលក្នុងនោះមានដើមពង្រ១ដើមមានអាយុកាលជាង១០០ឆ្នាំត្រូវបានដួលដល់ដីនៅបរិវេណវិទ្យាល័យថ្មពួកផងដែរ។
លោកបានបញ្ជាក់ថា៖ក្រោយដើមពង្រ១ដើមក្នុងបរិវេណវិទ្យាល័យថ្មពួកបានដួលដល់ដីដែលរងគ្រោះដោយខ្យល់កន្ត្រាក់ក្នុងនាមអាជ្ញាធរឃុំនិងលោកគ្រូ.អ្នកគ្រូមាតាបីតាសិស្សបានសម្រេចកាត់មេឃចេញដាំឡើងវិញដើម្បីអភិរក្សទុកឱ្យកូនចៅបានឃើញ។
លោក លីវ គុណ បានបញ្ជាក់ថា៖ដើមពង្រដែលមានអាយុកាលជាង១០០ឆ្នាំត្រូវបានកាត់មែកចេញហើយដាំឡើងវិញនេះនិងត្រូវចំណាយថវិកាជាង១លានរៀលដោយជួលកម្មករកាត់មែកចេញនិងអ៊ែស្កាវទ័រលើកបញ្ឈឡើងវិញហើយដាក់ទុយោទឹកសម្រាប់ស្រោចនិងធ្វើខឿនជុំវិញសម្រាប់ទប់ដើមជាកន្លែងសម្រាប់សិស្សអង្គុយលេង៕
ដោយ ៖ វណ្ណា
