សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ក្រុមការងារបច្ចេកទេសក្រសួងសាធារណការ និងដឹកជញ្ជូន សហការជាមួយមន្ត្រីមន្ទីរសាធារណការនិងដឹកជញ្ជូនខេត្តស្វាយរៀង បានចុះឃាត់រថយន្តដឹកទំនិញធុនធំ ដែលធ្វើចរាចរណ៍នៅលើដងផ្លូវជាតិលេខ១ ថ្លឹងពិនិត្យទម្ងន់ រកឃើញរថយន្តល្មើស១២គ្រឿងធ្វើការផាកពិន័យ នៅព្រឹកថ្ងៃទី២៩ មីនា ២០២៣ ស្ថិតនៅលើត្រង់ចំណុចច្រមុះជ្រូករូបគោ២ ស្ថិតនៅភូមិឃោសាង សង្កាត់ស្វាយតឿ ក្រុងស្វាយរៀង។
ទាក់ទិនករណីនេះដែរ មន្ត្រីមន្ទីរសាធារណការនិងដឹកជញ្ជូន ខេត្តស្វាយរៀង បានឲ្យដឹងថា ការឃាត់រថយន្តដឹកទំនិញលើសទម្ងន់នេះ គឺក្រុមការងារបច្ចេកទេស (ជញ្ជីងចល័ត) ក្រសួងសាធារណការ ចុះពិនិត្យទម្ងន់យានយន្តដឹកទំនិញ ដឹកស្រូវ ដឹកថ្ម ដឹកខ្សាច់ ដឹកដី ។ល។ លើសទម្ងន់ធ្វើការផាកពិន័យ និងអប់រំធ្វើកិច្ចសន្យាឲ្យបញ្ឈប់ការដឹកលើសទម្ងន់។
ប្រភពបន្តទៀតថា ការចុះពិនិត្យឃើញថា មានរថយន្តផ្ទុកទំនិញលើទម្ងន់គឺចំនួន១២គ្រឿង ក្នុងនោះ រថយន្តបែនដឹកខ្សាច់៤គ្រឿង និងរថយន្តយីឌុបប្រភេទវ៉េអង៨គ្រឿង គឺមានលើសទម្ងន់ចាប់ពី៥តោនទៅ១០តោន ហើយបើលើសត្រឹម៥តោនសមត្ថកិច្ចយើងអនុគ្រោះ គឺបង់ធម្មតា ក៏ប៉ុន្តែបើលើសពី១០តោនឡើងទៅគឺត្រូវផាកពិន័យក្នុង១តោន៣០ម៉ឺនរៀល ៕
ដោយ៖ សុថាន
