🔥លម្អិត៖ ភ្លេីងឆេះឃ្លាំង​និងផ្ទះពលរដ្ឋចំនួន០៩ខ្នង​យ៉ាងសន្ធោសន្ធៅ ព្រមទាំងខូចខាតរថយន្ត Lexus RX330មួយគ្រឿង

ភ្នំពេញ​ ៖​ គ្រោះអគ្គិភ័យបានឆាបឆេះផ្ទះប្រជាពលរដ្ឋ​ចំនួន០៩ខ្នង​និងឃ្លាំងស្តុកអីវ៉ាន់ចំនួន០១ ព្រមទាំងខូចខាតរថយន្ត​Lexus RX330មួយគ្រឿង​ បង្កការភ្ញាក់ផ្អេីលដល់អាជ្ញាធរមូលដ្ឋាន​និងសមត្ថកិច្ចជំនាញចុះមកធ្វើអន្តរាគមន៍​បាញ់ទឹកពន្លត់​ កាលពីវេលាម៉ោង​ ១៤និង៤០នាទីរសៀល  ថ្ងៃអង្គារ ១៣កើត ខែពិសាខឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី០២ ខែឧសភា ឆ្នាំ២០២៣ នៅផ្លូវលំ ក្រុម៦ ភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានប្រាប់ឱ្យដឹងថា ក្រោយពីបានទទួលព័ត៌មានពីប្រជាពលរដ្ឋរាយការណ៍មកកាន់មន្ត្រីជំនាញ ភ្លាមៗនោះលោកបានបញ្ជាទៅក្រុមជំនាញចេញរថយន្តពន្លត់អគ្គិភ័យគ្រប់គោលដៅទាំងអស់ចេញជួយធ្វើអន្តរាគមន៍ផងដែរ។

​   ​ សមត្ថកិច្ចជំនាញបានឱ្យដឹងថា​ មូលហេតុនៃការឆាបឆេះនេះ​ គឺបណ្ដាលមកពីអ្នកដុតសំរាមនៅគំនរសំរាមធ្វេស​ប្រហែសទេីបឆេះរាលដាលឱ្យមានការខូចខាតផ្ទះឈើប្រក់ស័ង្កសីចំនួន០៨ខ្នង, ផ្ទះថ្មប្រក់ស័ង្កសីចំនួន០១ខ្នងអស់ទាំងស្រុង, ឃ្លាំងចំនួន០១ឃ្លាំងខូចខាចប្រហែល៣០% រួមទាំងរថយន្តម៉ាកLexus RX330 ពណ៌សចំនួន០១គ្រឿងខូចខាតប្រហែល៥០% តែមិនបង្កគ្រោះថ្នាក់ដល់មនុស្សណាម្នាក់នោះឡេីយ​ ។ 

​    នៅក្នុងប្រតិបត្តិការ​សង្គ្រោះអគ្គិភ័យខាងលេីនេះដែរ​ កម្លាំងជំនាញបានចេញរថយន្តពន្លត់​អគ្គិភ័យ​គ្រប់គោលដៅទាំងអស់​មកជួយធ្វើអន្តរាគមន៍បាញ់ទឹកពន្លត់ និងបានប្រេីប្រាស់ទឹកអស់ចំនួន​ ១២២ឡានទេីបរលត់ទៅវិញជាស្ថាពរនៅវេលាម៉ោង១៦និង៥០នាទីល្ងាចនាថ្ងៃខែឆ្នាំដដែល​ ៕

ដោយ​ ៖​ ភារ៉ា​ ដង្កោ