សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មេដាយមាសគុនខ្មែរទី៦! អបអរសាទរ ឃួន ឡាំងកូស៊ីន យកឈ្នះកីឡាករហ្វីលីពីន ដណ្តើមបានមេដាយមាសជូនជាតិ ក្នុងប្រភេទគីឡូ ៥៧ ក្រាម ព្រឹត្តិការណ៍ស៊ីហ្គេម ២០២៣។
-អបអរសាទរ មើយ ស៊ឹង ទទួលបានមេដាយប្រាក់ជូនជាតិ ដោយចាញ់កីឡាការិនីវៀតណាម វគ្គផ្ដាច់ព្រ័ត្រ ក្នុងប្រភេទគីឡូ ៥១ក្រាម ។
-មេដាយមាសគុនខ្មែរទី៧! អបអរសាទរ ឈុត សេរីវ៉ាន់ថង យកឈ្នះកីឡាករឡាវ ដណ្តើមបានមេដាយមាសជូនជាតិ ក្នុងប្រភេទគីឡូ ៦០ ក្រាម ។
-មេដាយមាសគុនខ្មែរទី៨! អបអរសាទរ ទូច ចាន់វត្តី យកឈ្នះកីឡាការិនីវៀតណាម ដណ្តើមបានមេដាយមាសជូនជាតិ ក្នុងប្រភេទគីឡូ ៥៤ ក្រាម ។
ដោយឡែក លោកឧបនាយករដ្ឋមន្ត្រី ហោ ណាំហុង បានប្រគល់ថវិកាចំនួន ១ម៉ឺនដុល្លារ ដល់កីឡាករ ស៊ិន សុវណ្ណមករា ដែលបានតែតបញ្ចូលទីក្រុមឥណ្ឌូនេស៊ី បានយ៉ាងល្អ នៅពេលកម្ពុជា ប៉ះជាមួយ ឥណ្ឌូនេស៊ី កាលពីយប់មិញ។
ជាមួយគ្នានេះដែរ កីឡាករជម្រើសជាតិរូបនេះ បានជូនអាវលេខ១៤ ដល់លោកឧបនាយករដ្ឋមន្ត្រី។
សូមបញ្ជាក់ថា, ករណីបាល់ទាត់ បើទោះជាកម្ពុជា ចាញ់ឥណ្ឌូនេស៊ីក្នុងពិន្ទុ ២-១ យ៉ាងណាក៏ដោយ ប៉ុន្តែកីឡាករកម្ពុជា លេងបានល្អ បង្កើនការគាំទ្រយ៉ាងកងរំពងពេញ ពហុកីឡដ្ឋានជាតិអូឡាំពិក ។
លោក ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ និងជាប្រធាន សហភាពសហព័ន្ធយុវជនកម្ពុជា បានបង្ហោះ ពេលលោកចូលទៅមើលគាំទ្រ កីឡាបាល់ទាត់ ថា, ពីទីលានពហុកីឡដ្ឋានជាតិអូឡាំពិក សំលេងច្រៀងបទ នគររាជ ព្រមគ្នា និងស្រុះគ្នាបានបន្លឺឡើងយ៉ាងកងរំពង ដែលបង្ហាញពីសេចក្តីក្រាបថ្វាយបង្គំប្រកបដោយស្វាមីភក្តិដ៏ខ្ពង់ខ្ពស់បំផុតចំពោះជាតិ សាសនា ព្រះមហាក្សត្រ។ ជាបន្ត ទូលព្រះបង្គំយើងខ្ញុំជាកូនចៅ សូមថ្វាយចម្រៀង បទ «ប្រណម្យបួងសួង» ដើម្បីក្រាបថ្វាយព្រះសព្ទសាធុការពរជ័យថ្វាយព្រះករុណាជាអម្ចាស់ជីវិតលើត្បូង។
ក្នុងឱកាសនៃការឈានជិតចូលមកដល់នៃព្រះរាជពិធីចម្រើនព្រះជន្មព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាក្នុងគម្រប់ ៧០ យាងចូល ៧១ ព្រះវស្សា ទូលព្រះបង្គំយើងខ្ញុំសូមថ្វាយនូវកត្តញ្ញុតាដ៏ស្មោះស្ម័គ្របំផុតចំពោះព្រះរាជបល្ល័ង្គ និងសូមក្រាបថ្វាយព្រះរាជសព្ទសាធុការពរជ័យ សិរីបវរមហាប្រសើរ ថ្វាយព្រះករុណាជាអម្ចាស់ជីវិតលើត្បូង សូមព្រះអង្គមានព្រះជន្មាយុយឺនយូរជាងរយព្រះវស្សា ព្រះរាជកាយពលមាំមួន និងព្រះរាជសុខភាពល្អបរិបូរណ៍ដើម្បីគង់ជាម្លប់ដ៏ត្រជាក់ត្រជុំ សុខដុមរមនានៃប្រជារាស្រ្តខ្មែរ ៕
ដោយ ៖ សិលា
