សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អតីតសមាជិកBoy Band លោក ប៉ែន សារ៉ាវ បានប្រកាសហក់ចូលប្រឡូកក្នុងអាជីពសម្តែងខ្សែភាពយន្តកាលពីថ្មីៗនេះបន្ទាប់ពីតារារូបនេះបញ្ចប់ការងារច្រៀងនៅតាមខេត្តជាច្រើននោះ។ មាន ខ្សែភាពយន្ត៤រឿងដែលតារាប្រុសរូបនេះទទួលថតសម្រាប់ឆ្នាំនេះដែលសុទ្ធសឹងតែជាតួអង្គសំខាន់ ហើយលោករំពឹងថាស្នាដៃទាំងនេះនឹងជួយឲ្យលេចចេញការគាំទ្រច្រើននៅពេលចាក់បញ្ចាំង។
ការប្រឡូកក្នុងអាជីពសិល្បៈចម្រៀង មួយទសវត្សរិ៍មក ប៉ែន សារ៉ាវទទួលបានការគាំទ្រច្រើនបង្គួរ។ តារារូបនេះបានវិវត្តន៍ខ្លួនមកជាតារាសម្តែងសម្រាប់ការថតបទចម្រៀងនៅគ្រប់ផលិតកម្ម។ ចាប់ពីដើមឆ្នាំ២០១៦មកលោកបានឈោងចាប់ការងារសម្តែងខ្សែភាពយន្តភាគ និងខ្សែភាពយន្តខ្នាតធំវិញម្តងជាមួយនឹងសម្មិទ្ធផលថ្មីគួរកត់សម្គាល់។
តារាប្រុសរូបនេះបញ្ជាក់ថា កន្លងមកលោកហាក់មិនមានពេលច្រើនក្នុងការទទួលយកការថតខ្សែភាពយន្តព្រោះតែការច្រៀងក្នុងកម្មវិធីប្រគុំតន្ត្រីនានានៅតាមខេត្ត ច្រើន។ ប៉ុន្តែពេលនេះលោកបានឆ្លៀត ពេលប្រឡូកក្នុងអាជីពសម្តែងខ្សែភាព យន្តវិញម្តង។ លោកថា ក្រោយចាប់ផ្តើម ទទួលយកការសម្តែងលោកទទួលបានតំណែងសំខាន់ៗក្នុងខ្សែភាពយន្ត៤រឿងដែលមានទាំងតួឯក និងតួរង។ លោកថារឿងទាំងបួននោះមានដូចជារឿងភាគរបស់ទូរទស្សន៍CTNគឺរឿង”ស្នេហ៍ពនេចរ”ខ្សែភាពយន្តរបស់ផលិតកម្មRock គឺរឿង”និទានស្នេហ៍តម្រាសូត្រ”ខ្សែភាពយន្តខ្នាតធំរឿង “ទឹកកន្លះក្អម” និងរឿងភាគថ្មីរបស់ស្ថានីយទូរទ្សន៍CTV8HDគឺរឿង”អ្នកប្រដាល់ឡឺកឺ”ដែលលោកសម្តែងជាតួឯក។
លោកបញ្ជាក់ថា ខ្សែភាពយន្តទាំងនេះនឹងត្រូវចាក់បញ្ចាំងនៅពេលដ៏ខ្លីខាងមុខនេះហើយលោករំពឹងថានឹងទទួលបានការគាំទ្រច្រើនពីទស្សនិកជន។ អតីតសមាជិកក្រុមBoy Bandរបស់ទូរទស្សន៍CTNរូបនេះបន្តដែរថា ក្រៅពីសម្តែងខ្សែភាពយន្តឆ្នាំនេះលោកក៏ទទួលបានឱកាសថតឈុតផ្សព្វផ្សាយពាណិជ្ជកម្មនិងការសម្តែងក្នុងបទចម្រៀងជាច្រើនរបស់ផលិតកម្មធំៗ។ លោកក៏មានគម្រោងក្នុងការវិវត្តន៍ខ្លួនបន្តទៅកាន់ការងារជាពិធីករផងដែរនៅថ្ងៃ អនាគត់។
លោក ប៉ែន សារ៉ាវ បញ្ជាក់ដែរថា ក្រៅពីការងារសិល្បៈច្រៀង និងសម្តែង កន្លងមថ្មីៗនេះលោកក៏បានចូលរួមចំណែកជួយដល់សកម្មភាពការងារសង្គមមួយចំនួនដូចជាការចុះជួយទុរគតជន ការច្រៀងនិងសម្តែងក្នុងកម្មវិធីសុខភាពផ្លូវភេទនៅតាមរោងចក្រ សហគ្រាសនានាជាដើម។ លោករំពឹងដែរថានឹងទទួលបានការងារសិល្បៈថ្មីជាបន្តបន្ទាប់សម្រាប់ចុងឆ្នាំនេះទាំងការច្រៀង និងសម្តែងហើយលោកក៏នឹងឆ្លៀតបន្តសកម្មភាពមនុស្សធម៌ផងដែរ ហើយលោកជឿជាក់ថាទស្សនិកជននិងជួយគាំទ្រស្នាដៃសម្តែងថ្មីៗរបស់លោកនិងសិល្បករខ្មែរបន្តទៀត៕ វឌ្ឍនា
