សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី០៨ ខែកញ្ញា ឆ្នាំ២០២៣នេះ បានឱ្យដឹងថា មានករណីប្រជាពលរដ្ឋម្នាក់ឈ្មោះ អឹម រុន ភេទស្រី អាយុ៧៥ឆ្នាំ (ជាដូនជី) រស់នៅភូមិបាដាកត្បូង ឃុំរស្មីសង្ហារ ស្រុករតនមណ្ឌល ខេត្តបាត់ដំបង បានប្រទះឃើញគ្រាប់យុទ្ធភ័ណ្ឌមិនទាន់ផ្ទុះ កាលពីម្សិលមិញនេះរួចក៏មករាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលរស្មីសង្ហា នៃអធិការដ្ឋាននគរបាលស្រុករតនមណ្ឌល។
ក្រោយទទួលដំណឹងភ្លាម សមត្ថកិច្ចបានចុះត្រួតពិនិត្យនៅចំណុចជើងភ្នំក្នុងបរិវេណវត្តបាដាក ស្ថិតក្នុងភូមិបាដាកត្បូង ឃុំរស្មីសង្ហារ ស្រុករតនមណ្ឌល ខេត្តបាត់ដំបង ជាក់ស្ដែងប្រទះឃើញប្រភេទគ្រាប់ B40 ចំនួន ០៧គ្រាប់ ហើយសមត្ថកិច្ចបានចងខ្សែហ៊ុព័ន្ធនិងដាក់ស្លាកសញ្ញា រួចរាយការណ៍បន្តជូនអង្គភាពក្រុមបោសសំអាតមីន HALOTRUST ដើម្បីយកទៅកំទេច ចោល។
ឆ្លៀតក្នុងឱកាសនោះ កម្លាំងនគរបាលស្រុករតមណ្ឌល បានអំពាវនាវដល់ប្រជាពលរដ្ឋ ដែលរស់នៅក្នុងមូលដ្ឋានទាំងអស់ សូមអោយមានការប្រុងប្រយ័ត្នខ្ពស់នូវយុទ្ធភ័ណ្ឌមិនទាន់ផ្ទុះ រឺអាវុធខូចគុណភាពផ្សេងៗត្រូវរាយការណ៍ជាបន្ទាន់ ជូនសមត្ថកិច្ចជៀសវាងការកើតមានគ្រោះថ្នាក់ ដោយសារយុទ្ធភ័ណ្ឌនិងអាវុធទាំងនោះជាយថាហេតុ៕
ដោយ៖ អរុណរះ
