សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅពីក្រោយឆាកសម្ដែង! នាដកាអប្សរា ឈ្មោះនាងអប្សរជាកូនស្រីរបស់លោកសេដ្ឋី ចក្រភពនិងលោកសេដ្ឋីនី ភិមាន នាងជាកុលស្ត្រី មានទេពកោសល្យ ខាងលេងឧបករណ៍តន្ត្រីបូរាណ មានឃឹម ទ្រ ពិន ខ្លុយ តាឃេ ជាពិសេសគឺនាងចេះទ្រង់ព្រះនច្ចារបាំអប្សរា។ បងប្អូនខ្លះគាត់បានផ្តល់មតិយោបល់ថា ហេតុអ្វីមិនជ្រេីសរេីសនាដការបាំមកសម្តែងតែម្តងទៅ?។ នេះជាការលើកឡើងពីលោក ហ្វៃ សំអាង នៅល្ងាចថ្ងៃទី៥ ខែវិច្ឆិកា ឆ្នាំ២០២៣ តាមរយះ Facebook ផ្លូវការរបស់លោក។
លោកបន្តថា៖ នៅពេលនេះខ្ញុំចង់ជម្រាបបងប្អូនថា តួអង្គនាងអប្សរ មិនមែនត្រឹមតែចេះរាំរបាំតែមួយមុខទេ! គឺតួអង្គមួយនេះតម្រូវឲ្យគាត់សម្តែងតួអង្គបីក្នុងរឿងតែមួយ តួអង្គទីមួយគឺត្រូវសម្តែងជាតួម្តាយ ឈ្មោះព្រះនាង ពនិតា បន្ទាប់មកគឺនាង អប្សរឬព្រះធីតា អប្សរ តួអង្គទីបី គឺតួអង្គទេពអប្សរា ដែលជាព្រលឹងតាមថែរក្សាព្រះរាជរបាំ។ ល។
លោកបន្តថា៖ តួអង្គនេះត្រូវលះបង់ពេលវេលា តស៊ូអធន ព្យាយាមខ្លាំងណាស់ ទេីបគ្រងតំណែងតួអង្គនេះបាន ខ្ញុំសូមលេីកយកមកនិយាយបន្តិច ព្រះនាងពនិតា មានព្រះរោគពិស ចេញដំបៅពេញព្រះកាយ ដូច្នេះគាត់ត្រូវភ្ញាក់ពីម៉ោង៤ទៀបភ្លឺអង្គុយឲ្យក្រុមការងារបិទដំបៅ ចំនួនបួនម៉ោង និងត្រូវសម្តែងពេញមួយថ្ងៃរហូតដល់យប់ ទម្រាំថតចប់ពេលខ្លះត្រូវក្រុមស្រមោចដេញតាមរោម ក្លិនចេកទុំដែលយកទៅច្នៃបិទដំបៅនោះ។ ក្នងការជ្រើសរើសតួសម្ដែងមួយនេះពិតជាពិបាកស្វែងរកមែនទែន ទីមួយគឺត្រូវរកទម្រង់មុខស្អាតដែលខ្ញុំចង់បានត្រូវនឹងតួអង្គនៅក្នុងរឿង មុខមាត់មិនកែច្នៃ រូបរាងសមសួន មានទម្ងន់មិនលេីសពី៤៥គីឡូ គោរពពេលវេលា ត្រូវចាំពាក្យសន្ទនាភាពយន្ត ត្រូវចេះលេងឧបករណ៍តន្ត្រីបូរាណ ចេះរាំរបាំអប្សរា តស៊ូពុះពារព្យាយាមនៅក្នុងការហ្វឹកហាត់របាំនិងសម្តែង ។ បន្ទាប់ពីធ្វើការជ្រើសរើសតួសម្តែងអស់ជាច្រើនថ្ងៃ គឺយេីងជ្រេីសរេីសតួអង្គផ្សេងៗបានហេីយ តែយេីងរកមិនបានតួអង្គនាងអប្សរនោះទេ។ ប៉ុន្តែកញ្ញា សុឹម ស្រី និច គាត់បានទាញការចាប់អារម្មណ៍របស់ខ្ញុំទៅលេីផ្ទៃមុខរបស់គាត់ តែនៅពេលខ្ញុំពិនិត្យរូបរាងរបស់គាត់ខ្ញុំស្រងាកចិត្តភ្លាម ខ្ញុំក៏ឆាតទៅសួរជំនួយការរបស់ខ្ញុំ តេីកញ្ញា សុឹម ស្រីនិចគាត់មានទម្ងន់ប៉ុន្មានគីឡូ? ចម្លើយធ្វើ ឲ្យខ្ញុំអស់សង្ឃឹម គឺនាងមានទម្ងន់ជាង៦២គីឡូ 😭ខ្ញុំគិតថាមិនអាចទេបេីឲ្យគាត់សម្រកទម្ងន់១៧គីឡូ? លទ្ធផលចុងក្រោយបន្ទាប់ពីគាត់មកជួបខ្ញុំនិងជំនួយការរបស់ខ្ញុំ អ្វីដែលយើងចង់បានដូចដែលខ្ញុំបានជម្រាបជូននៅខាងលើ កញ្ញា សុឹម ស្រីនិច អាចធ្វើបានទាំងអស់ ។ នៅពីក្រោយការរាំរបាំអប្សរាគឺមានអ្នកគ្រូ វុធ ចន្ទ័មូលី បង្ហាត់បង្រៀនយ៉ាងយកចិត្តទុកដាក់អស់រយៈពេលមួយឆ្នាំ។ គ្មានអ្វីជាឧបសគ្គទេ បេីសិនជាយេីងមានការតាំងចិត្តយ៉ាងមុតមាំនោះ! ឱកាស..រួមនឹងសមត្ថភាព..ជាពិសេសក្រុមការងារគ្រប់ផ្នែកទាំងអស់ដែលជួយយេីងឲ្យទទួលបានជោគជ័យ🙏អរគុណច្រើនផលិតកម្ម ហង្សមាសនិងរស្មីហង្សមាស ដែលបានចំណាយធនធានផលិត ភាពយន្តខ្នាតធំរឿងនេះ អប្សរាមហាអង្គរ អរគុណតួសម្តែងទាំងអស់ អរគុណក្រុមការងារផលិតគ្រប់ផ្នែក ដែលសហការគ្នាបានយ៉ាងល្អ អរគុណចំពោះការគាំទ្រពីសំណាក់ប្រជាជនកម្ពុជា ។
សូមបញ្ជាក់ថា ការរៀបរាប់ដោយលោក ហ្វៃសំអាង ហើយរូបភាពដោយ លោក កែ វិបុល ៕
ដោយ ៖ សហការី
