🔥ឆ្លងចរន្តអគ្គិសនីឆាបឆេះផ្ទះប្រជាពលរដ្ឋនៅស្រុកព្រៃឈរ​ ទាំងកណ្ដាល​អធ្រាត្រ​

ខេត្ត​កំពង់ចាម៖ ករណីអគ្គិភ័យឆាបឆេះផ្ទះប្រជាពលរដ្ឋ មួយកន្លែងនៅចំណុច នៅភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម នៅយប់ថ្ងៃទី០៦ ខែធ្នូ ឆ្នាំ២០២៤ នៅវេលាម៉ោង២៣​ និង៥០នាទី ភ្លាមនោះ លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម អញ្ជើញដឹកនាំបញ្ជាផ្ទាល់ដល់កម្លាំងជំនាញ ចុះជួយអន្តរាគមន៍ សង្រ្គោះ និងពន្លត់អគ្គិភ័យនោះយ៉ាងយកចិត្តទុកដាក់បំផុត។ 

ក្នុងប្រតិបត្តិការនោះ​ ដោយកម្លាំងជំនាញប្រើប្រាស់រថយន្តពន្លត់អគ្គិភ័យ សរុប៨គ្រឿង និងប្រើប្រាស់ទឹកអស់ ២៨សុីទែន ក្នុងនោះរថយន្តរបស់ ស្នងការដ្ឋាននគរបាលខេត្តកំពង់ចាម ចំនួន០២គ្រឿង ស្រុកព្រៃឈរ ចំនួន០២គ្រឿង ស្រុកកងមាស ចំនួន០១គ្រឿង ស្រុកជើងព្រៃ ចំនួន០១គ្រឿង ស្រុកកំពង់សៀម ចំនួន០១គ្រឿង និងស្រុកចំការលើ ចំនួន ០១ គ្រឿង ។

គួរជម្រាបដែរថា​ ការឆាបឆេះនេះ បានរាលដាលដល់ផ្ទះអមសងខាង ចំនួន០២ខ្នងទៀត កម្លាំងជំនាញបានខិតខំសង្គ្រោះ ដោយធ្វើការពន្លត់រហូតដល់ ម៉ោង០២​ និង៣០នាទីឈានចូលថ្ងៃទី០៧​ ខែធ្នូ​ ឆ្នាំ​២០២៤នេះ​ ទើបគ្រប់គ្រងស្ថានការណ៍បានទាំងស្រុង ។

សូមបញ្ជាក់ថា ករណីអគ្គិភ័យឆាបឆេះនេះ បណ្ដាលមកពីឆ្លងចរន្តអគ្គិសនី តែមិនបណ្ដាលឱ្យមានរងរបួសដល់មនុស្សឡើយ ៕

ដោយ​៖ តារា​