រថយន្តក្រឡុកសីុម៉ងត៍ បុកអ្នកបើកម៉ូតូស្លាប់បុរសម្នាក់ និងរបួសធ្ងន់ម្នាក់

ភ្នំពេញ៖ រថយន្តក្រឡុកស៊ីម៉ង់របស់ក្រុមហ៊ុន(Home Master Group )មួយគ្រឿងក្រោយចេញពីចាក់សីុម៉ង់ត៍ក្នុងបុរីឌឹកមេគង្គរ៉ូយា៉ល់រួចបានបើកចេញមកវិញបុកម៉ូតូមួយគ្រឿងនៅតាមផ្លូវជាតិលេខ៦បណ្តាលឲ្យអ្នកបើកម៉ូតូស្លាប់នៅនិងកន្លែងកើតហេតុ និងក្មេងប្រុសម្នាក់របួសធ្ងន់ ចំណែកអ្នកបើកជនបង្កបានទុករថយន្តចោលរត់គេចខ្លួនបាត់ស្រមោល ។

ហេតុការណ៍នេះបង្កឱ្យមានការភ្ញាក់ផ្អើលឡើងកាលពីម៉ោងជាង៩ព្រឹកថ្ងៃទី១៩ខែកញ្ញាឆ្នាំ២០១៦ នៅតាមផ្លូវជាតិលេខ៦ ខាងមុខក្រុមហ៊ុន(បុរីឌឹកមេគង្គរ៉ូយា៉ល់) ភូមិខ្ទរសង្កាត់ព្រែកលៀប ខណ្ឌជ្រោយចង្វា។

សមត្ថកិច្ចនគរបាលមូលដ្ឋានបានឱ្យដឹងថាជនរងគ្រោះដែលស្លាប់មានឈ្មោះ ង្វៀងយាំុងថាន់អាយុ១៧ឆ្នាំ ស្នាក់នៅភូមិបាក់ខែងលើសង្កាត់ព្រែកលៀប ដែលផ្ទះនៅភូមិ ឃុំអរីយ៍ក្សត្រ័ស្រុកល្វាឯមខេត្តកណ្តាល ចំណែកក្មេងប្រុសដែលរងរបួសធ្ងន់មានឈ្មោះ ជួវយាំុងវិន អាយុ១៤ឆ្នាំ ស្នាក់នៅជាមួយគ្នា បើកម៉ូតូសង់កូរ៉េពណ៌ក្រហមពាក់ស្លាកលេខ កណ្តាល1H 1253 ចំណែករថយន្តបង្កម៉ាក (HINO) ពណ៌ស្ករ ប្រភេទក្រឡុកសុីម៉ង់របស់ក្រុមហុ៊ន Home Master Group ពាក់ស្លាកលេខ ភ្នំពេញ 5 A 1272 រីឯអ្នកបើកបរត្រូវបានគេស្គាល់ឈ្មោះសុីសំណាង អត្តលេខ១០៤៤ (គេចខ្លួនបាត់) ។

ប្រភពព័ត៌មាននៅកន្លែងកើតហេតុបានអោយដឹថា នៅមុនកើតហេតុគេឃើញរថយន្តបង្កបើកបរចេញពី បុរីឌឹកមេគង្គរ៉ូយា៉ល់ឆ្លងផ្លូវជាតិលេខ៦ក្នុងល្បឿនយ៉ាងលឿនក្នុងទិសដៅពីលិចទៅកើត រីឯជនរងគ្រោះជិះម៉ូតូ២នាក់ដឹកអំពៅពីជើងទៅត្បូង ។ ខណះជនរងគ្រោះជិះបានទន្ទឹមទល់មុខបុរីស្រាប់តែរថយន្តបានកាច់ចង្កូតចេញពីក្រុមហ៊ុនបុរីឌឹកមេគង្គរ៉ូយា៉ល់ បុកកិនម៉ូតូជនរងគ្រោះនិងអ្នកបើកបរយ៉ាងពេញទំហឹងបណ្តាលឲ្យអ្នកបើកម៉ូតូស្លាប់ភ្លាមៗនៅក្រោមរថយន្ត និងអ្នករួមដំណើរម្នាក់ទៀតរងរបួសធ្ងន់ ។

ក្រោយកើតហេតុអ្នកបើកបរបានបើករថយន្តទៅឈប់ខាងស្តាំហើយរត់ចូលទៅក្នុងបុរីនៅក្បែរនោះបាត់តែម្តង ហើយនៅកន្លែងកើតហេតុមានសមត្ថកិច្ចនគរបាលមូលដ្ឋាន និងសមត្ថកិច្ចជំនាញចរាចរវាស់វែងនៅកន្លែងកើតហេតុ ហើយយករថយន្តបង្កទៅរក្សាទុកនៅការិយាល័យចរាចរក្រុង រងចាំការដោះស្រាយ ចំណែកសពដឹកយកទៅតំកល់ទុកនៅសង្កាត់ព្រែកឯង ៕ ជ្រោយពេជ្រ