សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ និងម្នាក់ទៀតរងរបួសស្រាល ខណៈស្រវឹងស្រាជោកហើយធ្វើដំណើរត្រឡប់ជិះម៉ូតូមកផ្ទះ បានពាក់កណ្ដាលផ្លូវ ស្រាប់តែធ្លាក់ពីលើម៉ូតូបណ្ដាលឲ្យបោកក្បាលលើផ្លូវជាតិលេខ១វេលាម៉ោង៨និង៤០នាទីយប់ ថ្ងៃទី២០ ខែកញ្ញា ឆ្នាំ២០១៦ ក្នុងភូមិធ្លក ឃុំក្រោលគោស្រុកស្វាយជ្រ ខេត្តស្វាយរៀង ។
សមត្ថកិច្ចនគរបាលចរាចរណ៍ស្រុកស្វាយជ្រំបានអោយដឹងថា បុរសដែលស្រវឹងស្រាហើយធ្លាក់ពីលើម៉ូតូមានឈ្មោះម៉ៅ វិន អាយ៣២ឆ្នាំ មុខរបរកសិករមានទីលំនៅភូមិបន្លាស្អិត ឃុំក្រោលគោ ស្រុកស្វាយជ្រំ ខណៈបានស្លាប់នៅក្នុងមន្ទីរពេទ្យដោយមុខរបួសធ្ងន់ពេក។
រីឯអ្នកបើកបរម៉ូតូរងរបួសស្រាលមានឈ្មោះផល សំអាត អាយុ៣៨ឆ្នាំ រស់នៅភូមិបន្លាស្អិត ឃុំក្រោលគោ ម៉ូតូម៉ាកវ៉េវអាល់ហ្វា ពណ៌ក្រហម អត់ស្លាកលេខ ។
តាមសាក្សីបានអោយដឹងថា មុនកើតហេតុមានបុរស២នាក់បានជិះម៉ូតូមួយគ្រឿងម៉ាកវេវអាល់ហ្វាដោយធ្វើដំណើរពីលិចមកកើត ក្នុងល្បឿនលឿន និងអការស្រវឹងស្រា ហើយមកដល់ចំណុចខាងលើទំនងជនរងគ្រោះដែលរួមដំណើរពីក្រោយងងុយដេក ក៏ធ្លាក់ពីម៉ូតូតែម្ដងទៅ ។
ក្រោយមកប្រជាពលរដ្ឋបានមកចោមរោមមើល និងរាយការណ៍មកសមត្ថកិច្ចមូលដ្ឋានដឹកជនរងគ្រោះមកកាន់មន្ទីរពេទ្យបង្អែកខេត្ត ប៉ុន្តែដោយបុរសឈ្មោះម៉ៅ វិន រងរបួសធ្ងន់ពេក ក៏ដាច់ខ្យល់ស្លាប់ ។
សពត្រូវបានសមត្ថកិច្ចនគរបាលប្រគល់ទៅឲ្យក្រុមគ្រួសារយកធ្វើបុណ្យតាមប្រពៃណីផងដែរ ។
សមត្ថកិច្ចបញ្ជាក់ទៀតថា មូលហេតុ អ្នកបើកបរ និងអ្នករួមដំណើរស្រវឹងស្រា ទើបជួបករណីនេះកើតឡើង ៕ យឹម សុថាន
