សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ និង បណ្តុះបណ្តាលវិជ្ជាជីវៈ បានរៀបចំផ្ដល់អាហារសាមគ្គី មួយពេល ដល់ បុគ្គលិកសាងសង់ផ្សារទំនើប ភ្នំពេញមេហ្គាម៉ល ចំនួន ៦០០នាក់ក្នុង ឱកាស បុណ្យភ្ជុំបិណ្ឌខ្មែរនៅ ផ្សារទំនើប «ភ្នំពេញមេហ្គាម៉ល» កាលល្ងាចថ្ងៃទី២ ៥ ខែកញ្ញា ឆ្នាំ២០១៦ ដើម្បីផ្ដល់ការលើកទឹក ចិត្ដ ដល់កម្មករ បុគ្គលិក ការដ្ឋាន ក៏ដូច ជាផ្ដល់ភាពស្និទ្ធស្នាល ក្នុងមហា គ្រួសារតែមួយផងដែរ ។
តាមការបញ្ជាក់ឲ្យដឹងពី លោក អូស្មាន ហាស្សាន់ ថា ៖ ផ្សារទំនើប ភ្នំពេញមេហ្គាម៉ល ស្ថិតនៅលើផ្ទៃដី សរុបជាង ១៥០,០០០ ម៉ែត្រការ៉េ កំពស់ ៩ ជាន់ និង ២ ជាន់ក្រោមដីនេះ កំពុងសាងសាង់ បានប្រមាណ ៨០% ស្ថិតតាមបណ្តោយមហាវិថី សហព័ន្ធរុស្ស៊ី កែងផ្លូវវត្តនាគវ័ន គ្រោងនឹងបញ្ចប់ការសាងសង់នៅដើមឆ្នាំ២០១៧ ដែលនឹងក្លាយជាផ្សារទំនើបធំជាងគេនៅកម្ពុជា។ ហើយក្រុមហ៊ុន នឹងបន្កការសាង សង់ សណ្ឋាគារមួយ ពីលើផ្សារទំនើបនេះបន្ថែមទៀត ដែលមានផ្ទៃជាង ៥២,000 ម៉េត្រការ៉េ កំពស់១៣ជាន់ មានជាង ៤០០ បន្ទប់។
លោក អូស្មាន ហាស្សាន់ បានមានប្រសាសន៍ថា៖អាគារដ៏ធំមហិមា នេះ អាចផុសចេញជារូបរាងឡើងបាន ក៏ដោយសារប្រទេសយើងមានសុខសន្តិភាព មានអ្នកវិនិយោគ ហើយសិស្សានុសិស្សមានឱកាសរៀនសូត្របានខ្ពស់ខ្ពស់ រហូតក្លាយជាវិស្វករ អ្នកបច្ចេកទេស ដែលមានសមត្ថភាពខ្ពស់ក្នុងការ សាងសង់។ ហើយក៏ដោយសារ មានការចូលរួមសហការគ្នាបានល្អពីគ្រប់ជាន់ថ្នាក់ តាំងពីថ្នាក់ដឹកនាំ អ្នកបច្ចេកទេស រហូតដល់ថ្នាក់កម្មករ។
លោកក៏បានបង្ហាញពីអារម្មណ៍ សប្បាយរីករាយ និងមានមោទនៈ ភាពក្រៃលែង លោកបានបញ្ជាក់ថា៖ អាគារនេះ សាងសង់ឡើងដោយស្នាដៃកូនខ្មែរ ដែលវាមានលក្ខណៈទំនើប ពោរពេញដោយបច្ចេកទេស និងមានភាពរឹងមាំ ខណៈដែលមជ្ឍដ្ឋានមួយចំនួន គិតថា ជាស្នាដៃពីបរទេស។
លោកបញ្ជាក់ថា ៖ ផ្សារទំនើប នេះ មានរចនាបទ របស់កូនខ្មែរយើង ដែលមាន ការច្នៃប្រឌិត ពីមួយថ្ងៃទៅមួយថ្ងៃ ចេះតែមានការកើនឡើងជាលំដាប់។
លោកមានសង្ឃឹមយ៉ាងមុតមាំថា ៖ បន្ទាប់ពីផ្សារទំនើបនេះដំណើរការនៅឆ្នាំក្រោយ នឹងចូលរួមចំណែកកាត់បន្ថយភាពក្រីក្របានមួយកម្រិត ដោយនឹងអាចស្រូបទាញកម្លាំងពលកម្មបានជាង ៣០០០នាក់ ឯណោះ ដើម្បីចូលធ្វើការងារតាមផ្នែកផ្សេងៗ។
ផ្សារទំនើប «ភ្នំពេញមេហ្គាម៉ល» នឹងមានសេវាកម្មចម្រុះជាច្រើនដូចជា កន្លែងលក់សម្លៀកបំពាក់ ភោជនីយដ្ឋាន រោងភាពយន្ត កន្លែងក្មេងលេង ខារ៉ាអូខេ កន្លែងហាត់ប្រាណ ស្ទីម សូណា ហាងលក់សៀវភៅ ឱសថស្ថាន និងសេវាកម្មចម្រុះជាច្រើនទៀត ជាពិសេសមាន Department Store ទំហំ ១០ ០០០ ម៉ែត្រការ៉េ ដែលជាហាងស្នូលរបស់ PARKSON ក្នុងផ្សារទំនើបនេះតែម្តង ៕ សំរិត
