សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យប្រុស ស្រី២នាក់ រួមនិងថ្នាំញៀនចំនួន២៧កញ្ចប់ ត្រូវកំលាំងនគរបាលខណ្ឌសែនសុខបង្ក្រាប និងឃាត់ខ្លួនករណីជួញដូគ្រឿងញៀនកាលពីវាលាម៉ោង១០និង០០នាទីព្រឹក ថ្ងៃទី១៩ ខែតុលា ឆ្នាំ២០១៦ នៅចំណុចក្នុងបន្ទប់ជួល ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ក្នុងប្រតិ្តបត្តការណ៍នេះដឹកនាំដោយលោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ និងមានការចូលរួមពីលោក សាំង សុភះវិចិត្ត អភិបាលរងខណ្ឌសែនសុខ និងកំលាំងសមត្ថកិច្ចជាច្រើនទៀត ។
ជនសង្ស័យទី១ មានឈ្មោះ សំ ស្រីល័ក្ខ ភេទស្រី អាយុ២៤ឆ្នាំ មុខរបរមិនពិត ស្នាក់នៅបន្ទប់ជួលខាងលើ និងមានស្រុកកំណើតភូមិរោងចក្រ សង្កាត់ភ្នំពេញថ្មី ខណ្ឌសែនសុខ និងទី២ឈ្មោះ ណយ សំណាង (ហៅស៊ឹងម៉ៅ) ភេទប្រុស អាយុ១៨ឆ្នាំ មុខរបរមិនពិត ស្នាក់នៅភូមិច្រេស សង្កាត់ភ្នំពេញថ្មី ខណ្ឌសែនសុខ និងមានស្រុកកំណើត ភូមិត្រពាំងអំពិល ឃុំព្រៃឈ ស្រុកព្រៃឈ ខេត្តកំពង់ចាម ។
លោកវរសេនីយ៍ឯក ម៉ក់ ហុង អធិការនគរបាលខណ្ឌបានអោយដឹងថា មុននឹងឈានដល់ការឃាត់ខ្លួនជនសង្ស័យទាំង២នាក់ខាងលើ គឺសមត្ថកិច្ចជំនាញរបស់បានស្រាវជ្រាវ និងស៊ើបអង្កេតអស់រយៈពេលជាច្រើនខែមកហើយ លុះដល់ថ្ងៃខាងលើ ទើបកំណត់មុខសញ្ញា និងឈានដល់ការបង្ក្រាបបានតែម្តង ដោយសង្ស័យជននេះ បានចរាចរគ្រឿងញៀន(ជួញដូរ)។
លោកបន្តថា ក្នុងប្រត្តិបត្តិការខាងលើ សមត្ថកិច្ចចាប់យកវត្ថុតាង រួមមានថ្នាំញៀនចំនួន២៧កញ្ចប់ ក្នុងនោះមាន៦កញ្ចប់ធំ និង២១កញ្ចប់តូច ដាវ១ដើម កាំបិត២ដើម ម៉ូតូ២គ្រឿង និងសម្ភារសំរាប់ប្រើប្រាស់មួយចំនួន ។
បច្ចុប្បន្នជនសង្ស័យប្រុស ស្រីទាំង២នាក់ រួមនឹងវត្ថុតាងកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជួនទៅតុលាចាត់ការបន្ត ៕ តុង សីហា
