សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ស្រវឹងស្រាឡើងជោកខ្លួន បានបើករថយន្តស៊េរីទំនើបមួយគ្រឿងម៉ាក RANGE ROVER ក្នុងល្បឿនលឿន ខណៈមកដល់ផ្លូវកោងមិនបន្ថយល្បឿន ក៏ជ្រុលចង្កូតទៅបុកឃឿនរង្វង់មូលវត្តភ្នំ បណ្ដាលឲ្យក្រឡាប់ផ្អៀងជើងច្រងាង តែសំណាងល្អ មិនបង្កឲ្យម្ចាស់ និងអ្នកដំណើរតាមដងផ្លូវរងរបួស ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងនៅវេលាម៉ោង១២និង៤០នាទី រំលងអធ្រាត្រ ឈានចូលថ្ងៃទី២៤ ខែតុលា ឆ្នាំ២០១៦ នៅត្រង់ចំណុចខាងត្បួងជាប់រង្វង់មូលវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
យោងតាមសាក្សីដែលឃើញហេតុការណ៍គ្រោះថ្នាក់ខាងលើបានឲ្យដឹងថា នៅមុនពេលកើតហេតុ គឺមានបុរសម្នាក់ដែលស្រវឹងស្រា បានបើករថយន្តស៊េរីទំនើបម៉ាក RANGE ROVER ពណ៌ស ពាក់ស្លាកលេខ ភ្នំពេញ ២R.៤៧៧៧ បើកបរតាមបណ្ដោយផ្លូវព្រះនរោត្តម ទិសដៅពីត្បួងទៅជើង ក្នុងល្បឿនយ៉ាងលឿន ខណៈមកដល់ចំណុចផ្លូវកោងមិនបន្ថយល្បឿន ក៏ជ្រុលចង្កូតទៅបុកឃឿនរង្វង់មូលវត្តភ្នំ បណ្ដាលឲ្យក្រឡាប់ផ្អៀងជើងតែម្ដង។
ប្រភពដដែលបានបន្តថា ក្រោយពីកើតហេតុភ្លាមៗ ម្ចាស់រថយន្តបង្កបានគាស់កញ្ចក់ចេញដើម្បីរំដោះខ្លួន ហើយបានសុំឲ្យប្រជាពលរដ្ឋដែលធ្វើដំណើរតាមដងផ្លូវនៅក្បែរនោះ មកជួយរុញរថយន្តបង្កឲ្យមកសភាពដូចដើមវិញ ។
បន្ទាប់ក្រោយមក សមត្ថកិច្ចមូលដ្ឋានបានចុះមកដល់កន្លែងកើតហេតុផងដែរ ក៏ប៉ុន្តែសមត្ថកិច្ចមិនបានឃាត់ម្ចាស់រថយន្តបង្កទុកនោះទេ ដោយបណ្ដោយឲ្យអ្នកបង្កនោះឡើងជិះម៉ូតូគេចខ្លួនទៅបាត់ រួចកម្លាំងសម្ថតកិច្ចជំនាញបានចុះមកវាស់វែងយករថយន្តបង្កនោះទៅរក្សាទុក នៅការិយាល័យចរាចរណ៍ជើងគោក ដើម្បីរង់ចាំដោះស្រាយគ្នាពេលក្រោយ ៕ ព្រែកជ័យ
