ម៉ូតូ២គ្រឿងពន្លះគ្នាបញ្រាសទិសរបួសធ្ងន់ ស្រាល២នាក់នៅក្រុងស្វាយរៀង

ខេត្តស្វាយរៀង៖ មនុស្សប្រុស ស្រី២នាក់រងរបួសធ្ងន់ ស្រាល ដោយសារករណីគ្រោះថ្នាក់ចរាចរណ៍រវាងម៉ូតូ នឹងម៉ូតូពន្លះគ្នាយ៉ាងពេញទំហឹង កាលពីវេលាម៉ោង៨និង៣៥នាទីព្រឹក ថ្ងៃទី២៦ ខែតុលា ឆ្នាំ២០១៦ លើផ្លូវជាតិលេខ ៣១៥ កែងនឹងផ្លូវជាតិលេខ ០១ ភូមិ សាលាស្រុកចាស់ សង្កាត់ សង្កាត់ ព្រៃឆ្លាក់ ក្រុង ស្វាយរៀង ខេត្ត ស្វាយរៀង ។

សមត្ថកិច្ចនគរបាលក្រុងស្វាយរៀងបានឲ្យដឹងថា អ្នកបើកម៉ូតូបង្កហេតុមានឈ្មោះ ភុង សារ៉ន ភេទ ប្រុស អាយុ ៣៣ ឆ្នាំ មុខរបរ កសិករ រស់នៅ ភូមិ ទទា សង្កាត់ ចេក ក្រុង ស្វាយរៀង បើកបរពីត្បូងមកជើង ម៉ូតូ ម៉ាក SUZUKI SMASH V ពណ៍ខ្មៅ ពាក់ស្លាកលេខ ព្រះសីហនុ ១E ០០០៥ ខូចខាតយ៉ាងដំណំ ។ ចំណែកភាគីរងគ្រោះមានឈ្មោះ នួន ស្រីម៉ា ភេទ ស្រី អាយុ ១៨ ឆ្នាំ មុខរបរ និស្សិត រស់នៅភូមិ អណ្ដូងតាសី សង្កាត់ ព្រៃឆ្លាក់ ក្រុង ស្វាយរៀង ខេត្ត ស្វាយរៀង ។

តាមសាក្សីបានប្រាប់ថា មុនពេលកើតហេតុ មានបុរសម្នាក់បានបើកម៉ូតូ susukismasviតែម្នាក់ឯង ដោយធ្វើដំណើរបើកបរពី ត្បូងមកជើង ក្នុងល្បឿនលឿន ហើយក៏បានទៅបុកនឹងស្ត្រីម្នាក់ បើកម៉ូតូហុងដា សេ១២៥ ពណ៌ខ្មៅ ពាក់ស្លាកលេខ ស្វាយរៀង ១h ១៨៩៣ ទិសដៅពីជើងទៅត្បូង បញ្រាសគ្នាពេញទំហឹង បណ្ដាលឲ្យដួលរដូករណែលទាំងសងខាង ។

ក្រោយកើតហេតុ សមត្ថកិច្ចបានយកភាគីទាំងសងខាងមកកាន់មន្ទីរពេទ្យ ព្រមទាំងវាស់វែង និងអូសវត្ថុតាងម៉ូតូទាំង២គ្រឿង មកកាន់អធិការដ្ឋាននគរបាលក្រុងស្វាយរៀង ចាត់ការបន្តតាមច្បាប់ ។

សមត្ថកិច្ចបន្ថែមថា គ្រោះថ្នាក់នេះ កើតឡើងដោយសារ មូលហេតុ ម៉ូតូម៉ាក susukismasviបើកជែងក្នុងស្ថានភាពគ្រោះថ្នាក់ ៕ យឹម សុថាន