សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ កាលពីវេលាម៉ោង១២ និង១៥នាទីថ្ងៃទី៤ ខែវិច្ឆិកាឆ្នាំ២០១៦នេះ កម្លាំងនគរបាលអន្តរាគមន៍ពិសេសសហការជាមួយកម្លាំងការិយាល័យកណ្តាល ប្រឆាំងគ្រឿងញៀន និងកម្លាំងនគរបាលព្រហ្មទណ្ឌដែលដឹកនាំដោយលោកវរ សេនីយ៍ ត្រី លក ញ៉ាវ ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តដោយបានទទួលបទបញ្ជារផ្ទាល់ពីលោកឧត្តមសេនីយ៍ត្រី ម៉ៅ ច័ន្ទមធុរិទ្ធ ស្នងការនគរបាលខេត្តកំពត ។
បើកប្រតិបត្តិការបង្ក្រាបចាប់បានជនសង្ស័យ ជួញដូរនិងប្រើប្រាស់គ្រឿងញៀន៦នាក់ ។ ប៉ុន្តែមានម្នាក់មិនជាប់ពាក់ព័ន្ធ សាធាតុគ្រឿងញៀន ចំណែកឯបុរសម្នាក់ ឈ្មោះខឹម ថុនា សមត្ថកិច្ចដកហូតបានថ្នាំញៀនចំនួន៩កញ្ចប់តូច ។
ករណីបង្ក្រាប ជនសង្ស័យ៦នាក់នេះ នៅទីតាំងកន្លែង ល្បែងហ្គេមបាញ់ត្រីមួយ កន្លែង ដែលជ្រកក្រោមផ្លាកយីហោ (ហ្គូដធូ ហ្គូ) មជ្ឈមណ្ឌលកំសាន្ត លក្ខណៈគ្រួសារ ទល់មុខភោជនីយដ្ឋាន (មានហួត) ខាង ត្បូងគល់ស្ពានថ្មីត្រើយខាងលិច ស្ថិតក្នុងភូមិទ្វីខាងជើង សង្កាត់អណ្តូងខ្មែរក្រុងកំពត ខេត្តកំពត ។
បើតាមប្រភពពីជំនាញបានថ្លែងថា បច្ចុប្បន្នជនសង្ស័យទាំង៦នាក់ត្រូវបាន កម្លាំងជំនាញការិល័យកណ្តាលប្រឆាំងគ្រឿងញៀនឃុំខ្លួនបណ្តោះអាសន្នក្នុងស្នងការដ្ឋាននគរបាលខេត្តនិងសាកសួរតាម នីតិវិធី ដើម្បីកសាងសំណុំរឿងបញ្ជូនទៅកាន់តុលាការចាត់ការទៅតាមផ្លូវច្បាប់ ៕ ហេង សូរិយា
