សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានរងរបួសបែកក្បាលបាក់ធ្មេញយ៉ាងដំណំ ខណៈដែលជិះម៉ូតូបុកគូថរថយន្តកង់ទីន័រ ដែលឈប់លើផ្លូវជាតិលេខ១ពេញទំហឹងកាលពីវេលាម៉ោងរំលងអធ្រាត្រ ឈានចូលថ្ងៃទី៧ ខែមករា ឆ្នាំ២០១៧ ស្ថិតនៅចន្លោះបង្គោលគីឡូមែត្រលេខ១៦៤ លេខ១៦៥ ភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ចនគរបាលក្រុងបាវិតបានអោយដឹងថា ជនរងគ្រោះដែលរងរបួសមានឈ្មោះហម សេងហ៊ូ អាយុ២២ឆ្នាំ មុខរបរលក់ដូរ មានទីលំនៅភូមិព្រៃខ្លា ឃុំពោធិរាជ្យ ស្រុកស្វាយជ្រំ ខណៈបើកបរម៉ូតូម៉ាក Vision ពណ៌ឈាមជ្រូក ស្លាកលេខ ភ្នំពេញ 1BG-1889 ខូចខាតយ៉ាងដំណំ។ រីឯអ្នកបើករថយន្តកង់ទីន័រមិនត្រូវបានស្គាល់ឈ្មោះនោះទេ ក្រោយពេលកើតហេតុឃើញសភាពមិនស្រួល រត់គេចខ្លួនភ្លាមៗ បន្សល់រថយន្តនៅនិងកន្លែង។
តាមសាក្សីបានអោយដឹងថា មុនកើតហេតុមានបុរសម្នាក់បានជិះម៉ូតូមួយគ្រឿង ដោយធ្វើដំណើរពីកើតមកលិចលើកំណាត់ផ្លូវជាតិលេខ១ ដោយយប់ងងឹតផង ក៏បុកពីក្រោយរថយន្តកុងទឺន័រម៉ាក HYUNDAI ពណ៌ស ស្លាកលេខ ភ្នំពេញ3B-1517 ដែលឈប់ចតមិនប្រើភ្លើងសញ្ញាសម្គាល់ពេញទំហឹង លាន់សូរដូចរន្ទះបណ្ដាលអោយមនុស្សនិងម៉ូតូដួលរាបលើផ្លូវតែម្ដង។
ក្រោយពីលឹសូរសំឡេងបែបនេះ ប្រជាពលរដ្ឋបានចេញមកមើល និងរាយការសមត្ថកិច្ចមូលដ្ឋាន និងនាំជនរងគ្រោះមកកាន់មន្ទីរពេទ្យភ្លាមៗ រីឯអ្នកបើករថយន្តបានរត់គេចខ្លួនបាត់ស្រមោលតែម្ដង។
បច្ចុប្បន្ន អ្នករបួសត្រូវបានបញ្ជួនទៅមន្ទីរពេទ្យស្វាយរៀង រីឯវត្ថុតាងទាំងពីរគ្រឿង សមត្ថកិច្ចនគរបាលវាស់វែង និងអូសមករក្សាទុកនៅអធិការដ្ឋាន ក្រុងបាវិតដើម្បីចាត់ការតាមច្បាប់ ៕ យឹម សុថាន
