សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់រួមដំណើរជាមួយមិត្តភក្តិម្នាក់ទៀត ស្រវឹងស្រាឡើងជោកជាំ បានបើករថយន្តក្នុងល្បឿនលឿន មិនប្រយ័ត្នជ្រុលទៅក្បាលនាគ ពុះចែកទ្រូងផ្លូវពេញទំហឹង រងការខូចផ្នែកខាងមុខយ៉ាងដំណំ បែកកាឡេហៀប្រេងម៉ាស៊ីនទៅមុខលែងរួច។
ហេតុការណ៍នេះ បានកើតឡើងនៅវេលាម៉ោង១០និង៣០នាទីយប់ ថ្ងៃទី៨ ខែមករា ឆ្នាំ២០១៧ នៅតាមបណ្ដោយផ្លូវព្រះនរោត្ដម ត្រង់ចំណុចជិតក្រសួងមហាផ្ទៃ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
យោងតាមសម្ដីបុរសម្នាក់ដែលជាអ្នករួមដំណើរជាមួយបានឲ្យដឹងថា នៅមុនពេលកើតហេតុ រូបគាត់ និងមិត្តភក្តិបានចេញមកពីចូលរួមពិធីមង្គលការគេនៅកោះពេជ្រ ដោយផឹកស្រាបៀរស្រវឹងទាំងពីរនាក់ ហើយបើករថយន្តម៉ាកកូរ៉ូឡា ពណ៌សំបកឪឡឹក ពាក់ស្លាកលេខ កណ្ដាល 2A.1969 ដោយបើកតាមបណ្ដោយផ្លូវព្រះនរោត្ដម ទិដៅពីជើងទៅត្បូង ខណៈមកដល់ចំណុចកើតហេតុខាងលើបានរេចង្កូតទៅបុកក្បាលនាគ ពុះចែកទ្រូងផ្លូវពេញទំហឹងតែមិនបណ្ដាលឲ្យក្បាលនាគរងការខូចខាតនោះទេ ចំណែករថយន្តខូចខាតផ្នែកខាងមុខយ៉ាងដំណំ តែមិនបណ្ដាលអោយនណាម្នាក់រងរបួសនោះទេ។ រីឯអ្នកបើកបរ ភ្លាមៗបានបើកទ្វារចុះជិះម៉ូតូឌុបគេចបាត់ដោយបន្សល់ទុកមិត្តភក្តិនៅកន្លែងកើតហេតុម្នាក់ឯង ។
ក្រោយកើតហេតុ សមត្ថកិច្ចជំនាញបានចុះមកវាស់វែង និងស្ទួចយករថយន្តបង្កទៅរក្សាទុកនៅការិយាល័យ ចរាចរណ៍ជើងគោករាជធានីភ្នំពេញរង់ចាំម្ចាស់ចូលខ្លួនដោះស្រាយនៅពេលក្រោយ ៕ ភារ៉ា ដង្កោ
