សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ត្រីម្នាក់បានផឹកស្រាស្រវឹងស្រឿងៗ ពេលប្ដីបបួលទៅដេក ក៏ខឹង ហើយបានលោតពីលើផ្ទះជួលជាន់ទី១បណ្ដាលឲ្យរងរបួសធ្ងន់។
ហេតុការណ៍ខាងលើ បានបង្កការភ្ញាក់ផ្អើលនៅវេលាម៉ោង១០និង៣០នាទីយប់ ថ្ងៃទី១០ ខែមករាឆ្នាំ២០១៧ នៅត្រង់ចំណុចផ្ទះជួល ផ្លូវបេតុង ភូមិទ្រា២ សង្កាត់ស្ទឹងមានជ័យ ខណ្ឌមានជ័យ។
ស្ត្រីចិត្តសឿងរូបនេះ ឈ្មោះ ភិន សុខឡេង អាយុ៤៤ឆ្នាំ មុខរបរលក់លៀសស្នាក់នៅផ្ទះជួលក្នុងកន្លែងកើតហេតុ។ចំណែកប្ដីមានឈ្មោះ យុន សុផល អាយុ៤០ឆ្នាំជាង មុខរបររត់ម៉ូតូឌុបស្នាក់នៅជាមួយគ្នា រួមទាំងមានកូននៅក្នុងបន្ទុក៤នាក់ ស្រី២នាក់និងប្រុស២នាក់ ។
បើតាមប្រភពព័ត៌មានពីអ្នកជិតខាងបានឲ្យដឹងថា នៅមុនពេលកើតហេតុស្ត្រីរងគ្រោះខាងលើ បានអង្គុយហូបស្រាថ្នាំកន្លះលីត្រជាមួយមិត្តភក្រ័ហើយនិងប្ដីនៅមុខបន្ទប់ជួលជាន់ទី១ ដែលជាបន្ទប់របស់មិត្តភក្រ័គាត់ ខណះផឹកអស់ស្រាថ្នាំចំនួនកន្លះលីត្រ ប្ដីបានបបួលទៅដេកបន្ទប់របស់គាត់នៅជាន់ខាងក្រោមព្រោះយប់ជ្រៅហើយយកកម្លាំងធ្វើការនៅថ្ងៃស្អែកបន្តទៀត ពេលនោះស្ត្រីរងគ្រោះបានឆ្លើយថាគ្រាន់តែនៅផឹកបន្តិចទៀតក៏មិនបានដែរ តិចលោតទៅក្រោមឥឡូវ ។ និយាយភ្លាម ស្ត្រីរងគ្រោះក៏លោតតែម្ដង បណ្ដាលអោយសន្លាប់មួយសន្ទុះនិងរងរបួសធ្ងន់បាក់ចង្កេះ ធ្វើឲ្យប្ដីដែលនៅជិត ឈរស្រឡាំងកាំងនិយាយលែងចេញ ដោយនឹកស្មានថាប្រពន្ឋរបស់ខ្លួននិយាយលេង ។
ក្រោយពេលកើតហេតុភ្លាម ស្ត្រីរងគ្រោះត្រូវបានប្ដីនិងប្រជាពលរដ្ឋទាក់ទងរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យរុស្សី ៕ ភារ៉ា ដង្កោ
