បើកបរលឿនខ្វះការប្រុងប្រយ័ត្នជ្រុលបុករថយន្តពីក្រោយស្លាប់ម្នាក់

ភ្នំពេញ៖ បុរសម្នាក់ទំនងជាស្រវឹងជិះម៉ូតូមួយគ្រឿងក្នុងល្បឿនលឿនមិនប្រយ័ត្ន ជ្រុលបុកគូទរថយន្ដឡិចសុិស570 ពីក្រោយដែលបន្ថយល្បឿនកន្លែងភ្លើងស្តុប បណ្ដាលអោយបោកផ្ទុបជាមួយរថយន្ដស្លាប់ភ្លាមៗនៅកន្លែងកើតហេតុ ហើយរថយន្ដគេចខ្លួនបាត់ស្រមោល ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង01រំលងអធ្រាត្រ ឈានចូលថ្ងៃទី11 ខែមករា ឆ្នាំ2017 នៅចំណុចខាងមុខមន្ទីរពេទ្យព្រះអង្គឌួង តាមបណ្ដោយមហាវិថីព្រះនរោត្ដម ស្ថិតក្នុងសង្កាត់ ផ្សារចាស់ ខណ្ឌដូនពេញ រាជធានីភ្នំពេញ។

សមត្ថកិច្ចបានអោយដឹងថា ជនរងគ្រោះដែលស្លាប់មានឈ្មោះ សុីម សុភ័ក្រ ភេទប្រុស អាយុ៣៥ឆ្នាំ ស្នាក់នៅសង្កាត់បឹងកក់ទី១ ខណ្ឌទួលគោក ជិះម៉ូតូធុនធំ ពណ៌សរ គ្មានស្លាកលេខ ចំណែករថយន្ដម៉ាកឡិចសុ ី470 ពណ៌ខ្មៅ មិនចាំស្លាកលេខ គេចខ្លួនបាត់ស្រមោល។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្ដឡិចសុី470 ធ្វើដំណើរតាមបណ្ដោយមហាវិថីព្រះនរោត្ដម ទិសដៅពីត្បូងទៅជើង ក្នុងល្បឿនលឿនល្មម ខណៈមកដល់ចំណុចកើតហេតុ ដែលជាកន្លែងមានភ្លើងស្តុបរថយន្ដក៏បានបន្ថយល្បឿនស្រាប់ជនរងគ្រោះជិះម៉ូតូក្នុងល្បឿនលឿនបានមកបុកគូទរថយន្ដពីក្រោយពេញទំហឹងបណ្ដាលអោយបោកផ្ទុបជាមួយរថយន្ដស្លាប់ភ្លាមៗនៅកន្លែងកើតហេតុ ចំណែកម៉ូតូរងការខូចខាតមួយកំណាត់មុខទាំងស្រុង រឺឯរថយន្ដក្រោយពីឃើញដូច្នេះ ក៏បន្ថែមល្បឿនគេចខ្លួនបាត់ស្រមោលតែម្ដង។

ក្រោយពីកើតហេតុមានបុរសម្នាក់ ដែលមានស្ថានភាពស្រវឹងស្រាហើយអះអាងថា ជាមិត្តភក្តិរបស់ជនរងគ្រោះបានជេរប្រមាថទៅលើក្រុម រថយន្ដសង្គ្រោះបន្ទាន់ និងសមត្ថកិច្ចព្រមទាំងអ្នកសារព័ត៌មានដោយគិតថា រថយន្ដសង្គ្រោះមិនជួយសង្គ្រោះមិត្តភក្តិរបស់គាត់។

ក្រោយមកទើបសមត្ថកិច្ចដឹកសពជនរងគ្រោះទៅតម្កល់ទុកនៅវត្តទឹកថ្លា រង់ចាំក្រុមគ្រួសារទៅទទួលយកទៅធ្វើបុណ្យតាមប្រពៃណី ចំណែកម៉ូតូសមត្ថកិច្ចយកមករក្សាទុកអធិការដ្ឋានខណ្ឌដូនពេញ៕ ព្រែកជ័យ