សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សាលាដំបូងរាជធានីភ្នំពេញ នៅ ព្រឹកថ្ងៃទី២០ ខែមករា បន្តសវនាការសំណុំរឿងបាញ់សម្លាប់លោកឧកញ៉ាអ៊ឹង ម៉េងជឺ កក្រើករាជធានីភ្នំពេញ ដោយគ្មានវត្តមានលោកថោង សារ៉ាត់ ដែលជាមេខ្លោង ពោលគឺ មានតែក្រុមអង្គរក្ស៤នាក់ប៉ុណ្ណោះ ដែលត្រូវបញ្ជូនមកឲ្យអង្គុយស្ដាប់ចម្លើយសាក្សីនៅក្នុងសវនាការ។
មន្ត្រីតុលាការ បញ្ជាក់ថា សវនាការនេះដឹកនាំដោយលោក តុប ឈុនហេង អនុប្រធានសាលាដំបូងរាជធានីភ្នំពេញ និង លោក តុប ឈុនឡុង ជាតំណាងអយ្យការ ។
សវនាការនេះ ផ្ដោតសំខាន់លើការសាកសួរយកចម្លើយពីសាក្សី ដែលជាប្រពន្ធរបស់កងអង្គរក្ស លោក ថោង សារ៉ាត់ ប៉ុណ្ណោះ។ ចំពោះក្រុមអង្គរក្សដែលជាប់ចោទទាំង៤នាក់ បានផ្ដល់ចម្លើយនៅក្នុងសវនាការរួចហើយ លើកលែងតែ លោក ថោង សារ៉ាត់ ម្នាក់ប៉ុណ្ណោះ ដែលមិនទាន់ផ្ដល់ចម្លើយនៅចំពោះមុខក្នុងសវនាការ។
មានសាក្សីជាង៦០នាក់ដែលត្រូវផ្ដល់ចម្លើយក្នុងតុលាការនៅក្នុងសំណុំរឿងឃាតកម្មនេះ ក្នុងនោះមានសាក្សីខ្លះជាឧកញ៉ា មេធាវី សមត្ថកិច្ច ប្រជាពលរដ្ឋ និងប្រពន្ធរបស់ លោក ថោង សារ៉ាត់ ជាដើម ដែលសាក្សីខ្លះជាសាក្សីដោះបន្ទុក ហើយសាក្សីខ្លះជាសាក្សីដាក់បន្ទុក។
លោកទួត លុច ជាមេធាវីការពារក្ដីលោក ថោង សារ៉ាត់បានបញ្ជាក់ថា លោក ថោង សារ៉ាត់ ឡើងសម្ពាធឈាមខ្ពស់ មិនអាចផ្ដល់ចម្លើយក្នុងសវនាការបានទេ។
លោក ថោង សារ៉ាត់ ត្រូវបានតុលាការចោទប្រកាន់ពីបទផ្ដើមគំនិតក្នុងអំពើឃាតកម្មគិតទុកជាមុន តាមមាត្រា២០០ និង ២៨ នៃក្រមព្រហ្មទណ្ឌ ប្រព្រឹត្តកាលពីថ្ងៃទី២២ ខែវិច្ឆិកា ឆ្នាំ២០១៤ នៅក្នុងសង្កាត់ទួលស្វាយព្រៃ ខណ្ឌចំការមន ។ បទល្មើសនេះកំណត់ការផ្តន្ទាទោសដាក់ពន្ធនាគារអស់មួយជីវិត ៕ចេស្តា
