រឿង ភក្កីស្នេហ៍ទ្វេភព របស់ទូរទស្សន៍ក្នុងស្រុក ត្រូវបានក្រសួងផ្អាកការចាក់បញ្ចាំង

ភ្នំពេញ៖ ខ្សែភាពយន្តភាគរឿង ភក្កីស្នេហ៍ទ្វេភព ដែលកំពុងចាក់បញ្ចាំងលើកញ្ចក់ទូរទ្សន៍ PNN ត្រូវបានក្រសួងវប្បធម៌ និងវិចិត្រសិល្បៈស្នើឲ្យផ្អាកការផ្សាយ ក្រោយពីសង្កេតឃើញពីការផលិតខ្សែភាពយន្តនេះ ផលិតឡើងនាំឲ្យចាកខ្លឹមសារដើម។ ការផ្អាកនេះដែរ ក៏ត្រូវបានធ្វើឡើងក្រោយលេចចេញការរិះគន់ជាហូហែកន្លងមកជុំវិញការយកស្នាដៃមរតកអ្នកនិពន្ធមកកាឡៃខុសខ្លឹមសាររឿងដើម។

យោងតាមលិខិតដែលចេញដោយក្រសួងវប្បធម៌ និងវិចិត្រសិល្បៈចេញថ្ងៃទី២០ ខែមករា ឆ្នាំ២០១៧ ដែលចុះហត្ថលេខាដោយលោករដ្ឋលេខាធិការក្រសួងវប្បធម៌ និងវិចិត្រសិល្បៈផ្ញើទៅកាន់អគ្គនាយកទូរទស្សន៍PNNបានបញ្ជាក់ថា ការផ្អាកមិនឲ្យចាក់បញ្ចាំងខ្សែភាពយន្តនេះ ព្រោះតែសាច់រឿងខាងលើ បានកាឡៃប្រឌិតចេញពីស្នាដៃអក្សរសិល្ប៍ខ្មែរ ខុសពីខ្លឹមសារដើម និងបង្កឲ្យមានការភ័ន្តច្រឡំពីសាធារណជន ពិសេសសិស្សានុសិស្ស។ លិខិតខាងលើបញ្ជាក់ដែរថា ការផលិតនេះ ក៏ជាការរំលោភបំពានដល់ច្បាប់ស្តីពីអ្នកនិពន្ធ និងសិទ្ធិប្រហាក់ប្រហែលផងដែរ។

ការប្រកាសឲ្យផ្អាកការចាក់ផ្សាយនេះ ត្រូវបានធ្វើឡើងក្រោយលេចចេញការរិះគន់ជាហូហែ ជុំវិញការផលិតខ្សែភាពយន្តនេះ ព្រោះតែការយកស្នាដៃដ៏ល្អឥតខ្ចោះរបស់អ្នកនិពន្ធជំនាន់ដើម មកកែកាឡៃបន្តិចបន្តួចហើយដាក់ចំណងជើងថ្មី វាជាការធ្វើឲ្យខូចដល់ធាតុដើមរបស់អ្នកនិពន្ធ។ ការផលិតនេះដែរ ក៏ត្រូវបានគេលើកឡើងដែរថា វាជាការបំផ្លាញដល់ស្នាដៃរបស់អ្នកនិពន្ធជំនាន់ដើម ឬជាការលួចស្នាដៃបុព្វបុរសយកទៅកម្ទេចចោលដើម្បីបុព្វហេតុផលប្រយោជន៍ផ្ទាល់ខ្លួន។

គួរបញ្ជាក់ដែរថា ខ្សែភាពយន្តភាគរឿង ភក្តីស្នេហ៍ទ្វេភព ត្រូវបានផលិតឡើងដោយផលិតកម្ម AD MUSIC របស់លោកអ៊ុង ឌុចសិត្ថាវីរៈ។ រឿង«ភក្តីស្នេហ៍ទ្វេភព» គ្រងដំណែងតួឯកដោយលោកអ៊ុន សុទ្ធា ចាប់ដៃគូជាមួយតារាសម្បុរស្រអែមកញ្ញាមឿង សុផាណែត រួមជាមួយនឹងតារាល្បីៗជាច្រើនរូបទៀត។ ខ្សែភាពយន្តនេះ ត្រូវបានចាក់បញ្ចាំងរាល់ថ្ងៃច័ន្ទ ដល់ថ្ងៃពុធ វេលាម៉ោង៨:០០-៩:០០យប់ នៅលើកញ្ចក់ទូរទស្សន៍ភីអិនអិន៕ វឌ្ឍនា