សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ត្រូវបានកម្លាំងអធិការដ្ឋាននគរបាលខណ្ឌសែនសុខឃាត់ខ្លួនដោយចោទពីបទចែកចាយគ្រឿងញៀន ។
ការឃាត់ខ្លួននេះ ធ្វើឡើងកាលពីវេលាម៉ោង១៥និង៣៥នាទី ថ្ងៃទី៣១ ខែមករា ឆ្នាំ២០១៧ នៅចំណុចផ្លូវបេតុង ភូមិវិមានទ្រុង សង្កាត់ក្រាំងធ្នង់ខណ្ឌសែនសុខ ។
ជនសង្ស័យមានឈ្មោះ លី លឹមសេង ភេទប្រុស អាយុ៤២ឆ្នាំ មុខរបរមិនពិតប្រាកដ ស្នាក់នៅភូមិដំណាក់ សង្កាត់ភ្នំពេញថ្មី ខណ្ឌសែនសុខ និងមានស្រុកកំណើតភូមិកំពង់ឫស្សី ឃុំជីរោត៍ទី១ ស្រុកត្បូងឃ្មុំ ។
សមត្ថកិច្ចអោយប្រាប់ថា មុននិងឃាត់ខ្លួនជនសង្ស័យខាងលើ គឺកម្លាំងសមត្ថកិច្ចបានប្រើជំនាញស្ទូច និងអូសទាញ ខណៈនោះជនសង្ស័យជិះម៉ូតូ១គ្រឿង ម៉ាកស្មាស់រីវូ ពណ៌ខ្មៅ ពាក់ស្លាកលេខ កំពង់ចាម 1D-2464 មកតាមការណាត់ ពេលនោះ ជនសង្ស័យបានឃើញសមត្ថកិច្ច ក៍ជិះម៉ូតូរត់និងបោះថ្នាំញៀនចោល ពេលឃើញដូច្នោះ សមត្ថកិច្ចបានដេញតាមពីក្រោយ និងចាប់ឃាត់ខ្លួនជនខាងលើបាន ប៉ុន្តែថ្នាំញៀនមិនត្រូវបានរកឃើញឡើយ សមត្ថកិច្ចបានយកជនសង្ស័យមកធ្វើតេស្តិ៍ទៅលើ ទឹកនោមឃើញមានផ្ទុកសារធាតុញៀន ក៏ឃាត់ខ្លួនតែម្តង។
សមត្ថកិច្ចបានប្រាប់ទៀតថា លុះល្ងាចថ្ងៃដដែលបាននាំជនសង្ស័យខាងលើមកឆែកឆេរបន្ទប់ជួល នៅភូមិដំណាក់ សង្កាត់ភ្នំពេញថ្មី ជាលទ្ធផលមិនមានរកឃើញអ្វីឡើយ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីសាកសួរបន្ត និងកសាងសំណុំរឿងបញ្ជួនទៅតុលាការ ៕ តុង សីហា
