រថយន្ត៣គ្រឿងបុកបន្តគ្នារងការខូចខាតសង្ស័យអ្នកបើកបរខ្វះការប្រុងប្រយ័ត្ន

ភ្នំពេញ៖ រថយន្ត៣គ្រឿងបានបុកបន្តកន្ទុយគ្នា រងការខូចខាតរៀងៗខ្លួន សង្ស័យអ្នកបើកបរខ្វះការប្រុងប្រយ័ត្ន តែមិនគ្រោះថ្នាក់ដល់អ្នកបើកបរនោះទេ។

ហេតុការណ៍នេះ បានកើតឡើងកាលពីវេលាម៉ោង៩និង៥០នាទីព្រឹក ថ្ងៃទី១ ខែកុម្ភៈ ឆ្នាំ២០១៧ នៅចំណុចមុខបុរីពិភពថ្មីផ្សារដីហុយ តាមបណ្តោយផ្លូវភ្នំពេញ ហាណូយ ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។

អ្នកឃើញហេតុការណ៍បានអោយដឹងថា មុនពេលកើតហេតុ គេឃើញមានរថយន្ត១គ្រឿង ម៉ាកតូយ៉ូតា PRIUS ពណ៌ស ពាក់ស្លាកលេខ ភ្នំពេញ 2AH7638 បើកបរដោយស្រ្តីម្នាក់ក្នុងទិសដៅពិត្បូងទៅជើង លុះមកដល់ចំណុចផ្លូវបំបែកកន្លែងកើតហេតុ ស្រាប់តែស្ត្រីនោះបានឈប់រថយន្តប្រុងបត់ឆ្វេងចូលក្នុងបុរីពិភពថ្មីពេលនោះ ក៏មានរថយន្ត១គ្រឿងទៀត ម៉ាកសាំយ៉ុងពណ៌ស ពាក់ស្លាកលេខ ភ្នំពេញ 2AD1493 បើកបរដោយបុរសម្នាក់ក្នុងទិសដៅស្របគ្នា បើកមកពីក្រោយ ក៏ចាប់ហ្វ្រាំងឈប់ ខណៈនោះ ក៏មានរថយន្ត១គ្រឿងទៀត ម៉ាកកូរ៉េ ពណ៌ស ពាក់ស្លាកលេខ ភ្នំពេញ 3A.9656 បើកបរដោយបុរសម្នាក់ក្នុងទិសដៅស្របគ្នាពីត្បូងទៅជើងមកពីក្រោយចាប់ហ្វ្រាំងមិនទាន់ ក៏ជ្រុលទៅបុក និងរថយន្តសាំយ៉ុងពីក្រោយហើយរថយន្តសាំយ៉ុងបានជ្រុលទៅបុក និងរថយន្តយ៉ូតា PRIUS នោះបណ្តាលអោយរងការខូចខាតទាំង៣គ្រឿងតែម្តង ។

ប្រភពពីស្រ្តីអ្នកបើកបររថយន្តម៉ាកតូយ៉ូតា PRIUS បានអោយដឹងថា មុនពេលកើតហេតុ រូបគាត់បានបើករថយន្តខាងលើក្នុងទិសដៅពីត្បូងទៅជើង ពេលមកដល់ចំណុចកើតហេតុ រូបគាត់បានស៊ីញ៉ូបត់ឆ្វេង ចូលក្នុងបុរី ស្រាប់តែមានរថយន្តសាំយ៉ុងបើកមកពីក្រោយបុករថយន្តគាត់តែម្តង។

ចំណែកអ្នកបើកបររថយន្តសាំយ៉ុងវិញ បានអោយដឹងថា រថយន្តPRIUSនោះ មិនបានបើកភ្លើងស៊ីញ៉ូទេ បើកសុខៗក៏ចាប់ហ្វ្រាំងឈប់ ហើយគាត់ក៏ចាប់ហ្វ្រាំងឈប់ដែរ ប៉ុន្តែដោយសារតែរថយន្តកូរ៉េបើកមកបុករថយន្តគាត់ពីក្រោយ ទើបរថយន្តគាត់ជ្រុលទៅបុកនឹងរថយន្តរបស់ស្ត្រីខាងលើនោះ។

ដោយឡែកអ្នកបើកបររថយន្តក៉ូរ៉េបានអោយដឹងថា ដោយសារតែរថយន្តដែលបើកនៅខាងមុខចាប់ហ្វ្រាំងឈប់ទាំងបង្ខំពេក ទើបគាត់ចាប់ហ្វ្រាំងមិនទាន់ បានជ្រុលទៅបុកនឹងរថយន្តសាំយ៉ុងនោះតែម្តង ។

ក្រោយកើតហេតុ ក៏មានសមត្ថកិច្ចចរាចរណ៍ចុះមកវាស់វែង ហើយសម្របសម្រួលដោះស្រាយសងសំណងគ្នានៅនឹងកន្លែងកើតហេតុដើម្បីបញ្ចប់រឿង៕ តុង សីហា